Daniyele 8 - MUKANDA WA MYIDI MUKULU（TSH96）

Bualu buibidi budi Mvidi Mukulu uleja: Tshimpanga ne mbuji wa Mpumbu

1“Mu tshidimu tshisatu tshia bukalenga bua Baltazare, meme Daniyele, mvua mumone bualu bupiabupia budi Mvidi Mukulu mundeje kunyima kua bumvua mumone kumpala.

2Ke tshimvua mumone etshi: Mvua mu Shushane, tshimenga tshikulu tshia ditunga dia Elame, ku muelelu wa mukidi udi dina dia Ulayi.

3Ntangila, meme kumona tshimpanga tshimane, tshitangilangane ne mukidi awu. Tshivua ne nsengu ibidi mile. Lusengu luvua lumene kunyima lututa lupite lukuabu bule.

4Meme kumona tshimpanga tshikuma nsengu ku luseke ludi diba dibuelela, ku luseke ludi ku mutu ne lua kuinshi kua ditunga. Kakutua nyama mukuabu utua mua kutshituila nkanana. Kakuvua muntu utua mua kudipandisha ku bumfumu buatshi. Tshimpanga atshi tshitua tshienza muatshi mutuatshi tshisue. Bukole buatshi buvua buenda budiunda.

5“Pamvua ngela meji ku bimvua mumone, mbuji wa mpumbu kufika, utumina kudi diba dibuelela. Uvua upita pa buloba ne lubilu lukole, kayi ubulenga ne mikonu. Mbuji awu uvua ne lusengu lua dikema lumuenekela pankatshi pa mesu.

6Mbuji wa mpumbu ewu kufika pabuipi ne tshimpanga tshivua ne nsengu ibidi, tshimvua mumone tshimane pabuipi ne mukidi. Mpumbu kuya ne bukole buonsu kudi tshimpanga bua kutshiluisha mvita.

7Meme kumumona ufika kudi tshimpanga, utshikuma ne tshiji tshikole, utshibula nsengu yatshi ibidi. Kubungulujaye tshimpanga panshi, katshiyi ne bukole bua kumutuila nkanana. Kutshidiatakajaye ku mikonu, kakuyi muntu uvua mua kutshipandisha.

8Bukole bua mbuji wa mpumbu kudiunda. Kadi papitshi bukole buende, lusengu lunene elu kutshibuka diakamue. Pa muaba uvualu, kumenapu nsengu mikuabu minene inayi, mitangilangane ku nseke inayi ya buloba.

9“Ku lumue lupite bukese lua ku nsengu ayi, kupatukaku lusengu lupialupia. Kudiundalu ne bukole bupite, lutangila kuinshi, luseke ludi diba dipatukila, ne luseke lua ditunga dipite buimpe.

10Kuluishalu kabidi bia mu diulu. Kuelalu bivule bia kudibi panshi, kabidi ne mitotu ya bungi. Kubidiatakajabu ku makasa.

11Kuluishalu mene mfumu wa bia mu diulu. Kukandikalu mulambu wa kuosha, uvuabu bamulambula ku dituku ku dituku. Kunyangalu muaba wa tshitendelelu, kuupishalu mikiya.

12Bakalupesha bia mu diulu, bishale ku bumfumu bualu. Kubengalu mulambu wa kuosha ne wa buatshia buatshia, bua muoyi mubi mmalu nawu. Lusengu kubenga ditendelela diakane dia Mvidi Mukulu. Malu onsu avualu luenza avua akumbana.

13“Pashishe meme kumona mutumibue wa Mvidi Mukulu wakula. Mutumibue mukuabu kumukonka ne: ‘Malu adibu baleja aa neanenge matuku bungi munyi? Mulambu wa kuosha wa buatshia buatshia nebaubenge matuku bungi munyi? Bubi budi bubutula bintu bionsu nebushale kashidi anyi? Muaba wa tshijila ne bia mu diulu, nebabidiatakaje ku makasa too ne ku diba kaayi?’

14Mutumibue wa Mvidi Mukulu wa kumpala kuandamuna muibidi ne: ‘Matuku 1.150, mu dinda ne mu dilolu, kamuakuikala milambu. Pashishe nebajidile tshiakabidi muaba wa tshijila.’

Dijingulula dia bualu buibidi budi Mvidi Mukulu uleja

15“Meme Daniyele, pamvua ntangila bualu ebu buvua Mvidi Mukulu undeja, pamvua nkeba mua kubujingulula, meme kumona tshintu tshifuane muntu, tshimane kumpala kuanyi.

16Meme kumvua diyi dia muntu difumina ku mukidi wa Ulayi, dimuambila ne: ‘Ngabriyele, umvuija muntu ewu bualu buvua Mvidi Mukulu mumuleje.’

17Ngabriyele kusemena pabuipi nanyi. Pakafikaye, bowa bukole kunkuata. Meme kutua mpala panshi. Kadi kungambilaye ne: ‘Daniyele, udi anu muntu, umanye ne: Mvidi Mukulu udi mukuleje malu a ku nshikidilu wa bidimu.’

18Patshivuaye wakula nanyi, mvua amu mpala panshi, mufue tshipuka. Yeye kundenga, kungimanyika kulu.

19Pashishe kungambilaye ne: ‘Neukumanyishe malu adi ne bua kuenzeka tshikondu tshishindika, tshidi tshiji tshia Mvidi Mukulu tshijika.

20Uvua mumone tshimpanga tshia nsengu ibidi. Tshidi tshileja makalenga abidi: bua bena Madayi, ne bua bena Persa.

21Mbuji wa mpumbu ke bukalenga bua bena Ngreke. Lusengu lunene luvua pankatshi pa mesu ende, ke mukalenga wa kumpala.

22Pakatshibuka lusengu, nsengu mikuabu inayi kumena pa muaba walu. Nsengu ayi ke makalenga makuabu anayi avua apingana pa muaba wa bukalenga bua kumpala. Kadi kabuakuikala ne bukole buvua nabu bukalenga bua kumpala nansha.

23Padi makalenga aa ashikila, benji ba malu mabi bamane kuvudija malu abu mabi, mukalenga wa budisu ne dishima neamueneke.

24Bukole buende nebudiunde, kadi ki nku bukole buende yeye nansha. Neabutule matunga mushindu wa dikema. Malu onsu adiye wenza nealubuluke. Neabutule too ne bantu badi ne bukole, kabidi ne tshisamba tshia tshijila.

25Udi ne budimu bua bungi. Neashime ne bantu bakuabu. Bua diditambisha diende, neabutule bantu ba bungi badi bela meji ne: tudi tusomba talalaa. Neatombokele mukalenga wa bakalenga. Ke diba didibu bamutshibula, kakuyi muntu udi wenza bualu.

26Edi ke diumvuija dilelela dia tshiuvua mumone bua milambu ya kuosha dilolu ne dinda. Kadi ulame munda muebe bualu budi Mvidi Mukulu mukuleje ebu, bualu budi buleja malu a matuku atshidi kule.’

27Diba adi, meme Daniyele, kupungila, kuteketa, disama kunkuata manga matuku. Meme mumane kusanguluka, ke meme kubanga tshiakabidi kukuatshila mukalenga mudimu. Ntshivua amu mpampakana bua bivua Mvidi Mukulu mundeje, bualu tshiwa mubijingulule to.”