1 Korente Diunvuija - MUKANDA WA MYIDI MUKULU（TSH96）
Diunvuija— Diba divuaye mu luendu luende luibidi, Polu uvua mulale ngondu dikumi ne muanda mukulu mu tshimenga tshia Korente mu ditunga dia bena Ngreke. Uvua muasemu Tshisumbu tshia bena ditaba, ne bantu bayua kumpala batendeledi ba mvidie, bikale kabidi bapele.Bualu bua bisabu biatshi bibidi, tshimenga tshia Korente tshivua ne bubanji. Bungendamushinga buvua busongamu nkela. Bisumbu bia bena meji, ne bitendeledi bia mvidie, bivua bia bungi. Kadi tshimenga atshi tshivua ne lumu lubi lua malu a bundu. Nanku pavua mupostolu umona muvua malu a mu ditunga akoka Tshisumbu tshia bena ditaba bapiabapia atshi, uvua upampakana bikole.Polu mumane kumuka mu Korente, kupetaye misangu ne misangu lumu lua malu avua enzekela mu Korente, kadi avua amubungamija. Ke kutuminaye bena tshimenga mikanda mitue ku inayi, ibidi idi mu mikanda ya tshijila, ne ibidi idibu batela mu 1 Kor 5.9-13, ne mu 2 Kor 2.3; 7.8. Mikanda ibidi itudi tushala nayi, Polu mmuyifunde mu luendu luende luisatu, wa kumpala mu Efeze (tangila 1 Kor 16.8), muibidi mu Efeze kabidi, nansha mu Masedoniya.Mukanda wa kumpala mutumina bena Korente ewu udi nenku: Polu mumane kuela badiye utumina mukanda wende muoyi, mumane kuela kabidi Mvidi Mukulu tuasakidila (1.1-9), udi ubela diakamue bena Korente, bua balekele diabulukangana (1.10—4.21), bumushe malu a bundu munkatshi mua Tshisumbu tshia bena ditaba (tshit. 5), balekele kabidi kufundangana kudi balumbuluishi ba bilumbu badi kabayi bena ditaba (6.1-11). Udi uleja kabidi mudi bena ditaba ne bua kunemeka mubidi wabu (6.12-20). Pashishe udi wandamuna ku nkonku mishilangane ivua bena Korente bamuela mu mikanda ivuaye mupete, pa:— dibaka (tshit. 7),— didia dia minyinyi ya nyama ivuabu balambule mvidie; nsombelu wa bena ditaba munkatshi mua bantu badi kabayi bena ditaba (8.1—11.1),— bisangilu bia bena ditaba; didia dia Mfumu (11.2-34),— mapa a Mueyelu wa Tshijila (bit. 12-14),— dibika dia bafue (tshit. 15).Polu udi ujikija mukanda wende ne malu mashilangane (disangisha dia makuta, malu adiye musue kuenza…) pashishe udi ubela mioyi ya ndekelu (tshit. 16).Polu udi umvuija malu onsu patoke, uleja mudi bantu bapeta diandamuna dimpe ku nkonku yonsu ayi, padibu bitaba Kristu ne muoyi umue. Dinanga dia muntu netu ke njila wa kulonda udi ku mutu kua njila mikuabu yonsu (tshit. 13).
