1Muntu udi ne luse kudi bapele, udi usombesha mukuende tshintu.
Udi umuambuluisha bimpe,
udi ulonda meyi a Mvidi Mukulu.
2Anyisha bua kusombesha mukuenu tshintu padiye mu dikenga,
kadi wewe umanye mua kupingaja pa diba tshiuvua musombe.
3Ukumbaje tshiudi mulaye, bua bantu bakuangate ne mushinga;
nenku neupete mu malu onsu bionsu biudi ujinga.
4Bantu ba bungi badi bamona tshintu tshidibu babasomba bu tshintu tshiangula,
tshidibu mua kushala balama bua kukengesha bantu bavua babambuluisha.
5Padi muntu usomba tshintu, udi utua mishiku ku bianza bia bantu,
udi udipuekesha, ubasengelela bua bamupe bintu.
Kadi diba dia kupingaja bintu, badi amu balaya,
pashishe padibu babipingaja badi bakula meyi mabi,
bamba ne: tudi mu tshikondu tshikole.
6Padi muntu uvua musombe bintu musue kubipingaja kudi mfumuabi,
muena bintu abi udi usanka bua bimue bikese bidiye wanji kupeta.
Kadi udi mua kushala kayi ne kantu kabidi,
katshiyi umvuangana ne bantu.
Bantu bakadi amu bamupenda, bamutshipa.
Pa muntu pa kumunemeka, badi bamupenda.
7Nanku bantu bavule kabena basue kusombeshangana bintu.
Katuena mua kuamba ne mbua lukinu to.
Kadi badi badianza kutalama
bua kabavu kubabutuila bintu biabu tshianana.
Kuambuluisha bapele nkuimpe(3.30-31; Tob 12.8b-9)8Kadi ufuile bapele luse,
kupitshishi kubindija bua kupetabu tshintu tshia pa luse.
9Bua kutumikila meyi a Maweja-Nangila,
udi ne bua kuambuluisha bapele.
Bualu kabena ne tshintu, kubipatshi bianza bitupu.
10Bua mulunda webe nansha muanenu, utuule makuta;
kuena mua kuasokoka muinshi mua dibue
bua anyanguke, abole to.
11Ukuate mudimu ne mpetu yebe bu mudi mikenji ya Muena Kulu miambe,
nenku neyikulengelele kupita bikole mpawungi.
12Ulamishe bintu biebe bia kupesha bapele mu mayeba,
nebikusungidile diba dia dikenga.
13Nebiluishe muluishi webe,
kupita ngabu mukole, nansha difuma dia bujitu.
Tshieya(8.13; Nsum 6.1-5)14Muntu muimpe udi udieyeka bua kupikula mukuende.
Kadi muntu udi ulengulula mukuende kena ne mushinga to.
15Muntu yeye mudieyeke bualu buebe,
ntshintu tshiudi anu uvuluka,
bualu uvua mufile muoyi wende bualu buebe.
16Amu muntu mubi kena mua kuvuluka
malu mimpe a muntu uvua mudieyeke bualu buende.
17Amu muntu udi kayi wangata malu adibu bamuenzela ne mushinga,
kena uvuluka muntu uvua mumusungidile to.
18Kadi tshieya ntshibutule bantu bakane bavule,
tshibatekakaja bu mudi tshipepela tshikole.
Ke muvua bantu bakuabu bamuangala mu matunga abu,
kadi bashala batambakana mu matunga a bende.
19Padi muntu mubi uzakila bua kudieyeka,
nebamuase tshilumbu,
nansha muntu udi ukeba kupeta makasa a mushinga kupitshisha,
nebamuase tshilumbu.
20Wambuluisha muanenu bilondeshile biebe biudi nabi,
kadi udimuke bua kuteketshi mu maboku.
Mona tshiebe, kunangidi kua muanenu21Bua kuikala ne muoyi, muntu udi ujinga diambedi:
mayi, biakudia, bilamba ne nzubu wa kulala,
mudi ende malu ashala masokome.
22Mbimpe kudia ne bupele ku nzubu kuebe,
pa mutu pa kudia bimpe ku nzubu kua bende.
23Nansha wewe ne bintu bikese nansha bia bungi,
usanke bua biudi nabi,
nenku kuakumvua bakujane kudi bena mutumba ne udi udiila kua bantu.
24Kuya kua kampanda, kumuka kuya kua kansanga ndikenga!
Bualu kuena ne kaba kasunguluke,
kabidi kuena mua kuikala uyukila ne bantu to.
25Udi upesha bantu biakudia ne biakunua kabayi bakuela tuasakidila,
nenku neumvue amu bakusendeka bamba ne:
26“Wewe muenyi, semena ulongolole mesa!
Umpeshe biakudia biudi muenze…
27Kuena wa apa to!
Ndi mmubikila muntu munene, patuka ku nzubu!
Muanetu udi ulua kummona, ndi ne dijinga dia nzubu!”
28Ke malu adi atonda muntu wa meji bikole:
bamuamba mudiye muenyi,
bamupenda bu muena mabanza.
Who We AreWhat We EelieveWhat We Do
2025 by iamachristian.org,Inc All rights reserved.
