1Mfumu, Mvidi Mukulu wa buloba bujima, utufuile luse.
2Enza bua bisamba bionsu bikumanye ne udi Mvidi Mukulu.
3Olola tshianza tshiebe, bua uluishe bisamba bia bende,
bua bimone ne: wewe ke mfumu!
4Uvua utunyoka bua bilema bietu
bua kuleja bena bisamba bikuabu muudi wa tshijila.
Nanku, mpindiewu ubakengeshe bua kutuleja bumfumu buebe.
5Bena bisamba bikuabu bakumanye,
bu mutudi tuetu kabidi bakumanye ne:
kakuena nwidie mukuabu amu wewe Maweja-Nangila!
6Enzulula kabidi bishima, ne malu ebe a kukema.
7Utuleje bukole bua bumfumu buebe.
8Lundula tshiji tshiebe, utshileje kudi bantu.
9Jimija badi netu lukuna, butula baluishi betu!
10Mpindiewu ela ngonga wa ku nshikidilu,
uvuluka biuvua mumane kulaya.
Pashishe bantu nebalondelangane bia dikema biudi muenze.
11Kapia ka tshiji tshiebe kabutule badi bashala ne muoyi.
Bonsu badi bashipa bantu bebe bajimine!
12Zaaza mitu ya bamfumu ba baluishi betu!
Badi bamba ne: “Kakuena banga bantu bu tuetu to.”
13aSangisha bisamba bionsu bia bena Izrayele!
16bUbapingajile buloba buuvua mubalaye ku tshibangidilu.
17Maweja-Nangila, fuila tshisamba tshiebe luse,
tshidibu binyika dina diebe.
Fuila Izrayele uudi utangila bu muana a bute webe luse.
18Yerushalayime, muaba uudi wikishila,
tshimenga tshidi ne nzubu webe wa tshijila, utshifuile luse.
19Bantu bavulangane pa mukuna wa Siyone, bakutumbishe ne misambu!
Uwuje nzubu webe ne butumbi buebe.
20Kuvidi tshisamba tshiebe tshiuvua mudianjile kufuka.
Kumbaja bivua bambi batuambile mu dina diebe.
21Badi bakutekemena bapete difutu,
bua bantu bajadike ne bambi bebe bavua bamba malu malelela.
22Maweja-Nangila teleja malomba adi bena mudimu bebe bakulomba.
Bua bantu bonsu badi pa buloba bamanye ne:
udi Maweja-Nangila Mvidi Mukulu wa tshiendelele.
Kujingulula tshidi tshimpe23Biakudia bionsu bidi biya mu tshifu,
kadi bimue bidi bilenga bipite bikuabu.
24Mudi tshilakalaka tshisunguluja minyinyi ya tshisuku, tshiumvua mishindu idiyi,
ke mudi muena lungenyi utandula miaku ya dishima.
25Muntu wa muoyi mubi udi ubungamija bantu!
Kadi muntu mumonamona mianda udi munange mua kumuenzela bidi bimukumbanyine.
Mutudi mua kusungula mukaji wa nsongu26Mukaji udi ne bua kuanyisha mulume yonsu udi umusela.
Kadi kudi imue nsongakaji idibu mua kusela,
idi mimpe mipite mikuabu.
27Mukaji wa mpala muimpe udi usankisha bayende,
mmupite bionsu bidi mulume ujinga.
28Pikala mukaji ewu muikale ne malu mimpe, ne lutulu,
bayende udi ne disanka mupite balume bonsu.
29Muntu udi mupete mukaji mulenga wa nanku,
ukadi ne tshiuma tshidi tshipite bikuabu bionsu,
ukadi ne muntu udi mua kumuambuluisha ne udiye mua kueyemena.
30Nzubu udi kayi ne lupangu, bivi badi bamupawula.
Mulume udi kayi ne mukaji, mmuena diakabi,
udi wendakanangana kayi ne kudiye uya.
31Nganyi udi mua kutekemena kudi muivi,
udi wendakana mu tshimenga etshi, diadia.
Ke mudi muntu udi kayi nzubu,
ulala muaba onsu udi butuku bumuidila.
Who We AreWhat We EelieveWhat We Do
2025 by iamachristian.org,Inc All rights reserved.
