1 Bakalenga 6 - MUKANDA WA MYIDI MUKULU（TSH96）

Shelomu udi wibaka nzubu wa Mvidi Mukulu(2 Kul 3.1-14)

1Bena Izrayele bamane kupatuka mu Ejipitu kupita bidimu nkama inayi ne makumi muanda mukulu, mukalenga Shelomu kutuadija kuasa nzubu wa Mvidi Mukulu. Mukalenga Shelomu mumane kushala mu bukalenga bua bena Izrayele bidimu binayi, midimu ya kuasa nzubu wa Mvidi Mukulu kutuadija mu ngondu wa Zive, mmumue ne: ngondu muibidi wa tshidimu.

2Nzubu uvua Shelomu washila Maweja-Nangila uvua ne metre makumi asatu mu bule, metre dikumi mu butshiama, ne metre dikumi ne atanu mu butumbuke.

3Lutanda lua ku tshibuelelu tshia nzubu wa Mvidi Mukulu, luvua metre dikumi mu butshiama, anu bunene bumue ne bunene bua nzubu wa Mvidi Mukulu. Luvua kabidi ne bule bua metre itanu.

4Mu bimana bia ku nzubu wa Mvidi Mukulu muvua madidishi a mabue, mashiya masosu masosu!

5Kuasabu nzubu mikuabu isatu mitentakaja, milamakaja ku bimana bia pa mbelu bia ku tshibambalu tshinene, ne bia ku tshibambalu tshia ndekelu.

6Nzubu uvua kuinshi kua mikuabu uvua metre abidi ne tshitupa mu butshiama. Nzubu muibidi wa pankatshi uvua metre asatu, ne nzubu muisatu wa kulu uvua ne metre asatu ne tshitupa mu butshiama. Bualu tshimana tshia pa mbelu tshia nzubu wa Mvidi Mukulu, katshivua ne mupimbu wa momumue mu butumbuke buonsu to. Tshivua tshienda tshikepela ku tshitupa ku tshitupa, bua musaka wa nzubu kawubuedi mu bimana bia nzubu wa Mvidi Mukulu.

7Bua kuibaka nzubu wa Mvidi Mukulu, bavua bamuibaka amu ne mabue majima, mushindu uvuabu baambule muaba udibu bumbula mabue. Nanku, matuku onsu avuabu bibaka nzubu wa Mvidi Mukulu, muntu kavua umvua mukuma wa ngindu, wa tshisuyi, nansha wa tshiamu tshikuabu.

8Mu nzubu uvua kuinshi kua mikuabu bavua babuelela ku tshiibi tshivua ku luseke lua kuinshi lua nzubu wa Mvidi Mukulu, babanda pa tshibandila tshia tshijengu, bua kuya mu nzubu wa pankatshi, ne bua kuya mu nzubu wa pa mutu.

9Bua kujikija diasa dia nzubu wa Mvidi Mukulu, kuenzabu tshisasa ne mabaya manene ne makese a mutshi wa sedre.

10Kadi nzubu yonsu wa ku nzubu mitentakaja ivuabu balamika ku bimana bia nzubu wa Mvidi Mukulu, uvua ne metre abidi ne tshitupa mu butumbuke. Kutekabu mabaya manene a mutshi wa sedre pa tshimana tshia nzubu wa Mvidi Mukulu.

11Maweja-Nangila kuambila Shelomu ne:

12— Bu muudi ungibakila nzubu ewu, wewe mukumbaje mikenji yanyi, mukumbaje miaku imvua mukuambile, mutumikile meyi anyi onsu, nenku nenkumbaje dilaya dimvua mulaye tatuebe Davide bualu buebe.

13Meme nensombe mu nzubu ewu munkatshi mua bantu banyi bena Izrayele kashidi. Tshiena mua kubalekela to.

Badi balengeja munda mua nzubu wa Mvidi Mukulu

14Bena mudimu bamane kujikija dibaka dia nzubu wa Mvidi Mukulu bu muvua Shelomu mubambile,

15kulamikabu mabaya a mutshi wa sedre ku bimana bia munda mua nzubu kuinshi too ne kulu. Kulamikabu dibaya dia mutshi wa pin panshi pa nzubu.

16Mutantshi wa metre dikumi ne tshimana tshia ku ndekelu kua nzubu wa Mvidi Mukulu, bavua batekapu mikamba minene ya mutshi wa sedre, miasa panshi, mitue ku tshisasa tshia nzubu. Nanku, kupetabu muaba mu nzubu wa Mvidi Mukulu wa kuteka mushete wa ndondu. Bavua babikila muaba awu ne: muaba wa tshijila menemene.

17Tshitupa tshikuabu tshia nzubu wa Mvidi Mukulu tshivua tshishale, mmumue ne: tshibambalu tshinene tshivua kumpala kua tshibambalu tshivua ne mushete wa ndondu, tshivua ne metre makumi abidi mu bule.

18Mabaya a munda mua nzubu wa Mvidi Mukulu avua malengaja, mazola bimuma bia mutshi wa kolokinte, ne bilongu bimane kutayika. Ku bimana bionsu, kuvua kulamika mabaya a mutshi wa sedre. Nanku, dibue dia ku tshimana nansha dimue kadivua dimueneka to.

19Kulongololabu tshibambalu tshivua ku ndekelu, bua kutekamu mushete wa ndondu wa Maweja-Nangila. Tshibambalu atshi tshiena tshipite bikuabu bia mu nzubu wa Mvidi Mukulu.

20-21Tshibambalu etshi, tshivua ne metre dikumi mu butshiama, ne metre dikumi mu butumbuke ne mu bule. Bavua batshilamika tshiamu tshia mpawungi, bu muvuabu balamika munda mua nzubu wa Mvidi Mukulu muonsu. Kumpala kua mushiku wa mbelu wa tshibambalu etshi, bavua bololaku lukanu lua tshiamu tshia mpawungi. Bavua batekaku tshilambuilu tshienza ne mitshi ya sedre, milamika tshiamu tshia mpawungi.

22Nanku, nzubu wa Mvidi Mukulu mujima uvua mulamika tshiamu tshia mpawungi, too ne ku tshilambuilu tshivua pabuipi ne mushiku wa tshibambalu tshivua ne mushete wa ndondu.

23-26Pashishe, kusongabu mutshi wa olive wa ditu, kuenzabu mpingu ibidi ya bakerubine bua kuteka mu tshibambalu tshivua ne mushete wa ndondu. Kerubine yonsu uvua metre atanu mu bule. Kerubine wa kumpala, uvua ne mapuapua, mikale metre abidi ne tshitupa mu bule. Nanku, mapuapua ende onsu avua ne metre atanu mu bule. Kerubine muibidi, uvua kabidi ne metre atanu. Uvua anu bunene bumue, mufuanangane ne Kerubine wa kumpala.

27Kutekabu bakerubine munkatshi mua tshibambalu tshiena ne mushete wa ndondu. Bakerubine abu bavua bolola mapuapua. Dipuapua dia Kerubine wa kumpala divua dilenga ku tshimana tshimue tshia tshibambalu atshi. Dipuapua dia Kerubine muibidi divua dilenga ku tshimana tshikuabu. Kadi mapuapua makuabu abidi avua malengangane munkatshi mua tshibambalu.

28Bakerubine bonsu babidi bavua babalamika tshiamu tshia mpawungi.

29Ku mabaya onsu a ku bimana bionsu bia ku nzubu wa Mvidi Mukulu, mu bibambalu bionsu bibidi, bavua bazola bakerubine, malala a mabue, ne bilongu bimane kutayika.

30Kabidi bavua balamika tshiamu tshia mapwungi too ne ku mabaya avua panshi pa nzubu wa Mvidi Mukulu mu bibambalu bionsu bibidi.

31Bua kuinjila ku tshibambalu tshivua ne mushete wa ndondu, kuenzabu tshiibi tshia mutshi wa olive wa ditu, tshia kunzulula nseke ibidi. Kadi mabaya avua ku tshiibi avua tshia bitanu tshimue tshia tshiibi mu butshiama.

32Ku bitupa bionsu bibidi bia tshiibi, bavua basongaku bakerubine, malala a mabue, ne bilongu bimane kutayika. Kubilamikabu tshiamu tshia mpawungi.

33Kuenzabu kabidi tshiibi tshia kuinjila ku tshibambalu tshinene. Kadi mabaya a mutshi wa olive wa ditu avua ku tshiibi, avua tshia binayi tshimue tshia tshiibi mu butshiama.

34Bitupa bionsu bibidi bia tshiibi bivua bienza ne mutshi wa pin. Bavua balengeja tshitupa tshionsu tshia tshiibi ne nkanu ibidi mizola.

35Bavua basongamu kabidi bakerubine, malala a mabue, ne bilongu bimane kutayika. Kabidi bavua balamika tshiamu tshia mpawungi ku bintu bivuabu basonge ku biibi abi.

36Pashishe, lupangu lua munda mua nzubu wa Mvidi Mukulu, bavua banyungulule ne tshimana tshibaka ne mabue masonge avuabu batentakaja milongu isatu. Mulongu muinayi uvua wa mitshi minene ya sedre.

37Nanku, mu ngondu wa Zive, Shelomu mumane kushala mu bukalenga bidimu binayi, kuenzabu tshitaku tshia nzubu wa Mvidi Mukulu wa Maweja-Nangila.

38Pashishe mu ngondu wa Bule, mmumue ne: ngondu wa muanda mukulu, Shelomu mumane kushala mu bukalenga bidimu dikumi ne tshimue, kujikijabu diasa dia nzubu mujima, anu mushindu uvuabu balongolola bua kuasa.

Nanku, nzubu wa Mvidi Mukulu awu, bavua bamuasa mu bidimu muanda mutekete.