Bele 14 - MUKANDA WA MYIDI MUKULU（TSH96）

Daniyele ne batuangaji ba nwidie Bele

1Mukalenga wa bena Madayi Astyaje, mumane kufua, Koreshe wa bena Persa kupeta bukalenga.

2Daniyele uvua mulunda wa mfumu, uvua ulondelangana nende malu. Mfumu uvua mumuanyishe bikole bipite bia bafidi ba ngenyi ba mfumu bonsu.

3Kadi bena Babilone bavua ne lupingu lua tshimfuanyi tshia nwidie Bele. Bavua batuula ku dituku dionsu bua nwidie awu kilo ya bukula ipatshila ku nkama itanu, mikoku makumi anayi ne litre nkama ibidi ne makumi atanu ya nwinyo.

4Mukalenga uvua utendelela lupingu ku dituku dionsu ulukukuila. Kadi Daniyele uvua ukukuila amu Mvidi Mukulu. Mukalenga kuebeja Daniyele ne:

— Kuena ukukuila Bele bua tshinyi?

5Daniyele kuandamuna ne:

— Tshiena mua kutendelela mpingu mienza kudi bantu to. Ndi nnemeka amu Mvidi Mukulu wa muoyi, wakafuka diulu ne buloba, udi ne bumfumu bua bintu bionsu.

6Mukalenga kumuebeja ne:

— Bele kena nwidie wa muoyi anyi? Kuena mumone bionsu bidiye udia ne unua ku dituku dionsu anyi?

7Daniyele kuseka, kuandamuna ne:

— Mukalenga kudishimi nansha! Lupingu elu kaluena luanji kudia nansha kunua kantu to. Ludi amu diima didibu balamika tshiamu tshikunze.

8Mukalenga kufika munda, kubikidisha batuangaji bende, ubambila ne:

— Nuenu kanuyi bangambila udi udia bionsu bidi bantu balambula lupingu elu, badi banufundila tshibawu tshia lufu.

9Kadi panuikala bajadike mudi Bele ubidia, Daniyele neafue, bualu udi usendeka Bele.

Daniyele kuandamuna mukalenge ne:

— Bienzeke muudi wamba amu!

10Batuangaji ba Bele bavua makumi muanda mutekete, katuyi tubala bakaji ne bana babu. Mukalenga ne Daniyele kuya ku nzubu uvuabu batendelela Bele.

11Batuangaji ba Bele kumuambila ne:

— Mukalenga, tuetu tudi tupatuka mu nzubu udibu batendelela Bele, wewe ufile biakudia ne nwinyo muele mayi, ubilambule Bele. Pashishe winjile tshiibi, utueku tshitampi tshia kakanu kebe.

12Patuikala bapingane dinda, wewe kuyi musangane Bele mudie bintu bionsu, tuetu netufue. Kadi pikalaye mubidie, Daniyele neafue, bualu mmutushiminyine bualu.

13Batuangaji bavua bakula ne kapeja, bualu bavua bumbula mukidi musokome muinshi mua mesa a tshilambuilu. Bavua babuelelamu misangu yonsu bua kudia bintu bivuabu batekela nwidie wabu.

14Nenku batuangaji bamane kupatuka, mukalenga kulambula nwidie biakudia. Pashishe Daniyele kutumina bena mudimu bende diyi, bua batuale butu. Babumiamine mu nzubu wa nwidie mujima. Mukalenga nkayende uvua mujadike tshivua Daniyele wenza atshi. Kujika, kupatukabu bonsu, kuinjila tshiibi, kutuabu tshitampi tshia mukalenga nkayende. Pashishe kuyabu.

15Butuku, bilondeshile tshibidilu tshiabu, batuangaji kufika ne bakaji ne bana babu, kudiabu kabidi kunuabu bionsu bivua bilambula Bele.

16Mukalenga kubika dinda dionsu, kuyaye pamue ne Daniyele ku nzubu wa nwidie.

17Kuebejaye Daniyele ne:

— Tshitampi tshianyi tshidi amu mumvua mutshitue anyi?

Ke Daniyele ne:

— Eyowa, mukalenga tshidi amu bu numvua mutshitue!

18Kadi bobu bamane kunzulula tshiibi, mukalenga utangila pa mesa, kuelaye lubila lukole ne:

— Bele mmunene! Udi nwidie kamuyi mpata!

19Daniyele kubanga kuseka, ukandika mukalenga bua kabuedi munda mua nzubu wa nwidie, umuambila ne:

— Tangila panshi, udi mua kumanya bena makasa aa anyi?

20Mukalenga kuandamuna ne:

— Ndi mumone makasa a bantu balume, a bakaji ne a bana!

21Mukalenga kupeta tshiji, kukuatshisha batuangaji, ne bakaji babu pamue ne bana babu. Batuangaji kumuleja mukidi musokome uvuabu babuelele mu nzubu wa Bele bua kudia bivua pa mesa a milambu.

22Mukalenga kubashipesha, kupaye Daniyele lupingu lua Bele. Yeye kuluvingutula. Kubumbulaye kabidi ne nzubu wa Bele.

Daniyele ne Nyoka wa tshidika

23Bena Babilone bavua batendelela kabidi nyoka munene.

24Mukalenga kuambila Daniyele dituku dikuabu ne:

— Kuena mua kungambila ne: Nyoka wa tshidika ewu kena nwidie wa muoyi to. Udi amu ne bua kumukukuila!

25Daniyele kuandamuna ne:

— Nenkukuile amu Maweja-Nangila Mvidi Mukulu wanyi, bualu amu yeye nkayende ke Mvidi Mukulu wa muoyi.

26Kadi mukalenga wewe muanyishe, nshipe nyoka wa tshidika ewu tshiyi ne muele nansha ne mutshi ku bianza.

Mukalenga kuandamuna ne:

— Ndi muanyishe.

27Daniyele kuangata budimbu, mafuta ne miosa kubisabisha pa kapia bionsu pamue, kubienzaye tukata, kutuelaye mukana mua nyoka. Nyoka kutumina, kutayika. Daniyele kuamba ne:

— Monayi tshintu tshinudi nutendelela!

28Bena Babilone kumvua lumu alu, kunyingalalabu bikole. Kudikungijabu kubengabu mukalenga, bela mbila ne: “Mukalenga mmumane kushala muena Yuda. Mmumane kubutula lupingu lua Bele, washipi Nyoka wa tshidika, wabutudi ne batuangaji!”

29Pashishe kuyabu kudi mukalenga bamuambila ne:

— Utupe Daniyele, wewe mubenge tudi tukushipa, wewe ne bena diku diebe bonsu.

30Mukalenga umona ne: badi bamukanyina bikole, kuanyishaye mua kubapesha Daniyele mu bianza biabu.

31Bena Babilone kuelabu Daniyele mu tshiina tshia nyama ya ntambue. Kushalaye momu matuku asambombu.

32Mu tshiina amu muvua nyama ya ntambue muanda mutekete. Bavua bayidisha dituku dionsu, bantu babidi bashipa ne mikoku ibidi. Kadi musangu awu kabavua bayipesha kantu to; anu bua imone mua kudia Daniyele.

33Tshikondu atshi, muambi Abakuke uvua mu ditunga dia Yuda. Uvua mulambishe musabu mu luesu, muelemu ne tupese tua mampa. Uvua ubituadila bantu bavua banowa biakudia mu madimi.

34Mutumibue wa Maweja-Nangila kuambila Abakuke ne:

— Utuadile Daniyele biakudia biudi nabi ebi. Yeye udi mu Babilone mu tshiina tshia nyama ya ntambue.

35Abakuke kuandamuna ne:

— Maweja-Nangila, tshiena muanji kutua makasa mu Babilone to, kabidi tshiena mumanye muaba udi tshiina tshia nyama ya ntambue to.

36Mutumibue wa Maweja-Nangila kumubakula ku lusongu lua mutu, mumukuatshile ku nsuki, kuya nende lubilu bu lua lupepele too ne ku Babilone, kumutuluila ku muelelu wa tshiina tshia nyama ya ntambue.

37Abakuke kubikila:

— Daniyele, Daniyele, angata biakudia bidi Mvidi Mukulu mukutumine!

38Daniyele kuela lubila wamba ne:

— Mvidi Mukulu wanyi, udi mumvuluke, kabidi kuena ulengulula bantu badi bakunanga!

39Daniyele kutuadija kudia. Mutumibue wa Maweja-Nangila kupingaja kabidi diakamue Abakuke mu ditunga diende.

40Dituku dia muanda mutekete, mukalenga kudidisha madilu a Daniyele. Ufika ku tshiina, winangila munda, kumonaye Daniyele musombe kayi upampakana.

41Mukalenga kuela lubila lukole wamba ne:

— Maweja-Nangila, Mvidi Mukulu wa Daniyele, udi munene, kamuena Mvidi Mukulu mukuabu, amu wewe.

42Mukalenga kutumaye diyi bua bapatule Daniyele mu tshiina. Pashishe kupingajamu bavua bajingila Daniyele lufu, kubadiabu kudi nyama, mfumu mutangile.