Yowele Diumvuija - MUKANDA WA MYIDI MUKULU（TSH96）
Diumvuija— Munkatshi mua bidimu bionsu, dilongesha dia muambi Yowele divua dishale bualu bunene buvua bantu bangata ne mushinga, nansha katuyi bamanye bimpe muambi awu, katuyi nansha bamanye tshikondu tshivuaye mushale mu bantu. Bualu bunene budi mu mukanda wende ke dimanyisha, ne dileja patooke, dia dituku dia nshikidilu, dituku diavua Maweja-Nangila kuleja bukole budiye nabu, dituku diavuaye kulumbuluisha bisamba bionsu. Tshisamba tshia bena Izrayele bilondeshile malu avuatshi tshienzela Mvidi Mukulu watshi, bisamba bikuabu bilondeshile malu avuabi bienzela Izrayele. Kumpala kua dituku dia tshilumbuluilu, malu a dikema, a tshinyangu, ne a kabutu, neenzeke. Neashiye bantu mu dikenga, ku bianza kutupu. Muambi udi ulongesha bukole bua kabutu ka dituku adi, ne tshimfuanyi tshia bishi bidi bibuela bipite bungi mu ditunga, tshia mushipu mukole mupite, tshia kapia kadi kosha bionsu, tshia bena mvita badi banyangakaja ditunga (1.2-12, 15-18; 2.1-11.) Katuena bapete mushindu wa kujadika ne: malu adi muambi utela avua menzeke mu tshikondu tshiende anyi, peshi udi wangata amu bimfuanyi patupu bua kulongesha nabi bantu.Kadi tshidiye wipatshila tshidi tshimueneka patooke. Udi ulomba bua bena Izrayele, badi babula bionsu, kabayi kabidi nansha mua kutendelela Mvidi Mukulu mu nzubu wende, bapingane kudi Musungidi wabu, bamusengelele (1.13-14, 19-20; 2.12-17.) Bantu nebapete lupandu amu padibu banji kujimija bionsu. Bushuwa udi ubalaya bubanji (2.18-27; 3.1-5; 4.17,18-21.) Kadi tshiji tshiende tshidi tshidianjila kubashiya mu dikenga, bapanga bionsu. Mvidi Mukulu nealumbuluishe bisamba bikuabu, abibutule (4.1-16.) Kadi tshisamba tshia bena Izrayele netshituadije kumvua ne: kuikala ne Mvidi Mukulu munkatshi muetu ntshinyi? Mukanda wa muambi Yowele udi utumanyisha ne: dimue dituku bantu bonsu nebikale ne Mvidi Mukulu munkatshi muabu, bualu neapuekeshile pa bantu bonsu Mueyelu wende (3.1-2.) Bena Kristu ba kumpala bavua bamone muvua dilaya adi dikumbane dituku dia Pentekostese (MM 2.16-21.)
