Yudite 4 - MUKANDA WA MYIDI MUKULU（TSH96）

Bena Yuda badi basue kutua nkanana kumpala kua Oloferne

1Bena Izrayele bavua base mu Yudeya kumvuabu lumu, muvua Oloferne mulombodi wa bena myita, uvua ku mutu kua bakuabu, uvua kabidi tshindonde tshia Nebukadnesare, mukalenga wa bena Ashure, mukengeshe matunga makuabu, mupawule ne mubutule miaba yabu yonsu ya kutendelela.

2Kukuatshikabu bowa bunene, pavuaye wenda usemena kuvuabu. Bavua kabidi ne luzakalu bua Yerushalayime ne bua nzubu wa Maweja-Nangila Mvidi Mukulu wabu.

3Batshina bafuminaku mu bupika. Diakamue, kufikabu bua kujidila kabidi nzubu wa Mvidi Mukulu, ne ngesu ne malongu ende, ne tshilambuilu tshiende, binabu banyanga ne mikiya.

4Bobu kutuma bantu ne mikenji mu Samariya mujima, mu Kona, mu Bete-Orone, mu Abele-Mayime ne mu Yeriko, pashishe ku Koba, ku Asore mu tshibandabanda tshia Saleme.

5Kukuatabu nsongu yonsu ya mikuna mitumbuke. Kukoleshabu misoku ya mu ditunga adi. Kutekabu biakudia bikuabu bua myita, bualu batshina bafuminaku ku dinowa bia pa madimi.

6Yowakime, ke uvua mutuangaji munene wa mu Yerushalayime mu tshikondu atshi. Una mutumine bantu bana mu Betuliye, ne mu Betomestayime mukanda, badi buludiludi ne musoku wa Yizreyele, mu mpala mua mpata wa Dotane.

7Kubatuminaye diyi bua kulama njila ya mu mikuna, ivua itungunuka ne ku Yudeya. Ina mipepela bua bantu kuyilama, bualu bana mua kupitshilamu kudi bantu babidi musangu umue.

8Bena Izrayele kukumbajabu menemene bivuabu bajinga kudi mutuangaji munene ne kudi tshipangu tshia bakulu ba bena Izrayele bavua badisangishe ku Yerushalayime.

9Mu ditunga, muntu yonsu una ulomba Mvidi Mukulu diambuluisha ne disuminyina. Bana bajila biakudia bikole.

10Bantu balume ne bakaji babu, bana babu ne bimuna biabu, ne benyi badi basombe mu bena Izrayele, bena mudimu badibu bafuta kabidi ne bapika, kuvualabu bilamba bipandike.

11Bantu bonsu ba mu Yerushalayime, balume bakaji ne bana, kudielabu panshi kumpala kua nzubu wa Mvidi Mukulu. Bavua badilaba butu mu mitu, banala bilamba bia madilu, bua kulomba Maweja-Nangila luse.

12Bana kabidi banyungulule tshilambuilu ne tshilamba tshia madilu. Bantu bonsu pamue, bana basengelela Mvidi Mukulu wa Izrayele bua kalekedi baluishi bakuata bana batekete ne bakaji kabidi, babutula bimenga bidiye mumane kupesha bantu bende. Bana bamusengelela kabidi bua kasankishi bantu benyi bua bamone mua kunyanga nzubu wa Mvidi Mukulu ne mikiya kabidi bamuseka.

13Maweja-Nangila kumvuaye dilomba diabu, kumonaye dikenga diabu. Bantu kutungunukabu ne dijila biakudia matuku a bungi mu ditunga dijima dia Yudeya ne mu Yerushalayime, kumpala kua nzubu wa Maweja-Nangila muena bukole buonsu.

14Yowakime, mutuangaji munene pamue ne batuangaji bonsu, ne bantu bakuabu bavua bakuata mudimu mu nzubu wa Maweja-Nangila, kuvualabu bilamba bia madilu, kulambulabu Mvidi Mukulu milambu ya kuosha ya buatshiabuatshia, ya mapiku ne ya budisuile.

15Bavua balaba butu pa bifulu biabu. Bavua batendekena Maweja-Nangila muabu muonsu bua ambuluishe bena Izrayele.