Sira (34) - MUKANDA WA MYIDI MUKULU（TSH96）

Biuma bidi ne njiwu(Luk 12.15-31)

1Kulala tshitabala bua kupeta biuma, kudi kudia mubidi.

Kuelangana meji bua kupeta bintu, kakuena kuladika tulu.

2Kusumpaka bua biuma kudi kupangisha muntu mua kuikisha,

bu mudi disama dikole dipangisha muntu mua kulala tulu.

3Muntu mubanji udi wenza mudimu mukole,

bua kuvudija biuma,

padiye ulekela, udi usanka ne bintu biende.

4Mupele udi wenza mudimu mukole bua kupeta bikese,

padiye ulekela mudimu udi ubuela mu dikenga.

5Muntu udi unanga biuma kena mua kushala muntu muakane.

Kadi udi ukeba mabuejila,

neikale muntu mubi.

6Bantu ba bungi badi babutuka bua biuma.

Dikenga didi dibakuata kabayi bamanye

7Biuma mbuteyi bua badi babikeba muabu muonsu.

Bantu bonsu badi kabayi ne meji badi bapia mu buteyi buabi.

8Muena biuma udi kayi ne tshilema,

udi kayi ukeba biuma muende muonsu udi ne disanka.

9Muntu wa nanku utudi mua kuela kalumbandi udi penyi?

Udi pa buende, mmuenze malu a kukema munkatshi mua bantu!

10Muntu udi amu mua kuenza nanku kashidi anyi?

— Padibi nanku, mbimpe kusanka.

Bantu babala ku minu badi bafika ku dibenga bualu bubi.

11Bantu ba mushindu awu nebashindame mu diakalenga,

kabidi bantu nebambe malu mimpe avuabu benze.

Didia dia tshibilu(Nsum 23.1-3)

12Pawikala musombe ku mesa bua kudia ne muntu udi ne muanzu,

udinemeke mu diakula, kuambi ne:

“Ebi mbipite bionsu bindi meme mua kudia.”

13Vuluka ne: padi mesu ebe ne lukuka ntshilema.

Ku bifukibua bionsu, disu ndipite diodi ku bubi.

Ke padidi didila pa bualu buonsu.

14Lekela kuangata tshintu

tshidi muenyi webe utangila bua kuangata,

bualu nudi mua kufuilakana nende mu dilongu.

15Tangila dijinga dia mukuebe bu diebe wewe,

ela meji a malu onsu audi wenza.

16Diaku tshidibu bakupesha, ke mudi muntu mukolesha bimpe wenza.

Kuikadi mudiavi, bualu bantu mbabenga budiavi.

17Leja muudi mukolesha bimpe,

udianze kujikija kudia kumpala kua bantu bonsu.

Lekela kudia ne budiavi bua bantu kabavu kukupenda.

18Pawikala ku mesa ne bantu tshisumbu,

kuambudi tshiakudia kumpala kua bakuabu.

19Muntu mukolesha bimpe

udi wanyisha biakudia bikese bidibu bamupesha!

Nenku pikalaye mulale, udi umona mua kueyela bimpe.

20Muntu udi udia pa ndiilu udi ulala tulu tuimpe,

udi ujuka diba diakane, udiumvua ne dikanda!

Kadi muntu muena mudi, kena ulala bimpe,

udi uluka, umvua tshilunguilu!

21Pikalabu bakuenzeja bua kudia bintu bipite bungi,

juka uya kuluka, upepeja tshifu.

22Muananyi wa balume, teleja, kuena mua kumpepeja to.

Neushishe kumvua bimpe bindi nkuambila.

Mu bionsu biudi wenza, ikala ne meji,

nenku kuakupeta bubeedi nansha bumue to.

23Bantu ba bungi badi batumbisha muntu udi ubapesha biakudia bia bungi ne muoyi muimpe,

lumu luende ludi lushala kashidi.

24Muntu muena buiminyi,

badi bamujana mu musoku mujima,

bua tshilema tshiende.

Maluvu(Mis 104.15; Nsum 20.1; Mb 10.19; Yesh 5.22)

25Paudi unua maluvu kudileji muudi tshilobu.

Bualu maluvu mmafikishe bantu ba bungi ku dikasa dibi.

26Bu mudi nsenda uteta tshiamu pa kutshiela mu tshikutu tshia kapia, ke mudi maluvu asokolola bena

ditambisha badi baluangana mvita.

27Maluvu adi asankisha muntu,

padiye uanua pa nnuinu.

Muntu kayi munue maluvu udi mua kusanka anyi?

Bualu Mvidi Mukulu uvua muafuke ku tshibangidilu bua kudisankisha.

28Wewe munue maluvu pa diba kabidi pa nnuinu,

udi ne disanka ne musangelu.

29Kunua maluvu kupitshisha kudi kufikisha ku matandu,

bantu batetukilangane pambidi.

30Bunuavi budi buvudija lonji lua muntu

mutshimbakane,

too ne mudiye ulenduka.

Budi bumulundula, budi bumutapisha ne mputa.

31Mu didia dia tshibilu, mudi maluvu a bungi,

epuka mua kutandangana ne muena mutumba nebe,

nansha mua kumupepeja, panudi bamana kunua, bashala nutshionkomoka.

Kumuedi nsenda, kumupendi, kunanyi mabanza diba adi to.