Ezra Diumvuija - MUKANDA WA MYIDI MUKULU（TSH96）

Diumvuija— Bantu bavua bafunde mukanda wa Ezra ne wa Nehemya ke bavua bafunde kabidi mikanda ibidi ya Kulondolola kua malu (tangila Diumvuija ku 1 Kulondolola). Mbafunde mikanda yonsu eyi ne meji amue, bipatshila bualu bua momumue.Mukanda wa Ezra udi ubanga ne mukanda wa Koreshe, mukalenga wa bena Persa, uvua muanyishe bua bena Yuda baye kuibakulula nzubu wa Mvidi Mukulu wa mu Yerushalayime (tshit. 1). Nanku bantu ba bungi bavua mu bupika, bavua bapingana kuabu (tshit. 2). Mudimu wabu wa kumpala mu Yerushalayime ngwa kujula tshilambuilu, ne kulongolola tshiakabidi ditendelela (tshit. 3). Kadi padibu bakeba kulongolola nzubu mene wa Mvidi Mukulu, baluishi babu bakuabu badi babenga. Ke mudibu ne bua kutumina balombodi ba mbulamatadi wa bena Persa mikanda. Ba-lombodi abu bamane kujadika muvuabu banyishe mudimu awu, bena Yuda bavua mua kubanga kuibakulula nzubu (tshit. 4 too ne ku tshit. 6).Tshitupa tshibidi (tshit. 7 too ne ku tshit. 10) tshidi tshitulondela muvuabu batume mutuangaji Ezra, kunyima kua mvula bu lukama, kudi mukalenga Artashasta bua kusonsola bena Yuda, ne kulongolola malu a Mvidi Mukulu bimpe mu Yerushalayime.Mukanda wa Ezra udi utuleja mutudi ne bua kuitaba Mvidi Mukulu, ne kusomba bimpe panu. Udi uleja kabidi muoyi mukole ne tshisumi bivua mutuangaji awu nabi bua kupingaja bena Yuda ku ditendelela dilelela dia Mvidi Mukulu. Ke tshikondu tshidi tshisumbu tshia bena ditaba ba menemene tshibanga. Yezu muine kunyima kua bidimu, nebamulele munkatshi mua bantu ba nanku, nebamuakidile kudi bena ditaba, “bapele” badi batekemena Mvidi Mukulu nkayende.