Yirmeya 26 - MUKANDA WA MYIDI MUKULU（TSH96）

Badi bakeba kushipa Yirmeya

1Yoyakime, muana wa Yoshiya, mumane kubuela mu bukalenga bua bena Yuda amu matuku makese, Maweja-Nangila kuambila Yirmeya ne:

2— Meme Maweja-Nangila ndi nkupa mukenji ewu. Uye kuimana mu lupangu lua nzubu wa Mvidi Mukulu. Uyukile ne bantu bonsu badi bafume mu bimenga bia Yuda bua kutendelela. Wambuluile bantu bionsu bindi mukutumine diyi bua kubambila. Kushiyi kalu nansha kamue to.

3Ndi mutekemene se: nebateleje. Muntu yonsu adilengeje. Ndi musue kubatumina dikenga bua malu mabi adibu benza. Kadi bobu bateleje, tshiakubanyoka to.

4Ubambile ne: Maweja-Nangila udi wamba ne: “Ntelejayi, londayi mikenji yanyi imvua munupe.

5Nulame malu adibu banuambila kudi bambi bena mudimu banyi. Mvua munutumine bambi matuku onsu, kadi kanuvua babateleje to.

6Panudi kanuyi nuteleja, nengupule nzubu wa Mvidi Mukulu ewu, bu mumvua mupule wa mu Shilo. Nenteke Yerushalayime bu tshilejilu tshidi bantu ba bisamba bionsu bia pa buloba, batela padibu baditshipa mutshipu.”

7Batuangaji, bambi, ne bantu bonsu bavua muaba awu, kumvuabu muvua Yirmeya umanyisha bantu bualu ebu mu lupangu lua nzubu wa Mvidi Mukulu.

8Yirmeya mumane kumanyisha bantu bonsu aba tshivua Maweja-Nangila mumuambile, kumukuatabu, bamba ne:

— Bamushipe!

9Mmunyi mudi mulumiana ewu mua kuambila bantu mu dina dia Maweja-Nangila ne: nebupule nzubu wa Mvidi Mukulu ewu, muvuabu bupule wa mu Shilo; nansha ne: tshimenga etshi netshibutuke, bantu kabayi kabidi basombamu.

Nanku bantu bonsu bavua mu nzubu wa Mvidi Mukulu kunguilabu bua kuluisha Yirmeya.

10Balombodi ba mu bukalenga bua bena Yuda bamane kumvua bivua bienzeka, kumukabu mu nzubu wa bukalenga, kubandabu ku nzubu wa Mvidi Mukulu. Kuyabu kusomba kumpala kua tshiibi tshipiatshipia tshia nzubu wa Mvidi Mukulu bua kuteleja tshilumbu.

11Ke batuangaji ne bambi kuambila balombodi aba ne bantu bavua muaba awu ne:

— Muntu ewu, mbimpe bamushipe, bualu uvua muambe tshimenga tshia Yerushalayime bibi. Nuenu mene nuvua badiumvuile.

12Kadi Yirmeya kuambila balombodi bonsu ba mu bukalenga ne bantu bonsu bavua muaba awu ne:

— Maweja-Nangila ke uvua muntume bua kunumanyisha bionsu binuvua bumvue, bualu mmubenge nzubu ewu ne tshimenga etshi.

13Mpindiewu, nudilengeje, nuakaje nsombelu yenu, nuteleje tshidi Maweja-Nangila Mvidi Mukulu wenu wamba. Nanku kakunutumina dikenga divuaye munuambile to.

14Meme ndi mu bianza bienu. Nungenzele munudi bamone ne: mbimpe.

15Kadi nuenu banshipe, numanye ne: nudi bashipe muntu udi kayi ne bualu. Nanku nebanunyoke bualu buanyi, nuenu ne bantu bonsu badi basomba mu tshimenga etshi. Bualu Maweja-Nangila mmuntume menemene bua kunuambila malu onsu aa.

16Nanku balombodi ba mu bukalenga ne bantu bonsu kuambila batuangaji ne bambi ne:

— Kabashipi muntu ewu nansha! Bualu mmutuambile menemene malu mu dina dia Maweja-Nangila Mvidi Mukulu wetu.

17Ke bakulu bakuabu ba mu tshipangu tshia Bakulu kuambila bantu ne:

18— Mu tshikondu tshia Izkiya, mukalenga wa bena Yuda, muvua muambi mukuabu, dina diende mMika, wa mu Mereshete. Uvua muambile bantu bonsu ba mu Yuda ne: Maweja-Nangila wa bukole buonsu udi wamba ne:

“Siyone neikale bu budimi budibu babundulula.

Yerushalayime neashale bu mu dikolu.

Mukuna, muaba udi nzubu wa Mvidi Mukulu,

newikale bu ditu.”

19Kadi mukalenga Izkiya ne bantu ba mu Yuda bavua bashipeshe muambi Mika anyi? Too. Kadi bavua amu bamanye ne: Maweja-Nangila ke udi wakula. Nanku bavua bakeba kutalaja tshiji tshiende. Diba adi, Maweja-Nangila kavua mubatumine dikenga divuaye muambe. Kadi mpindiewu, tuetu bashipe muntu ewu, netudikebele makenga makole.

Yoyakime udi ushipesha muambi Uriya

20Mu tshikondu atshi, muambi mukuabu uvua wambila bantu malu mu dina dia Mvidi Mukulu. Dina diende divua Uriya, muana wa Shemaya, wa mu Kiriyate-Yeyarime. Uvua wambila bantu malu mafuanangane ne a muambi Yirmeya, ubela bikole bena mu tshimenga tshia Yerushalayime, ne bantu bonsu bavua basomba mu ditunga dia Yuda.

21Mukalenga Yoyakime, bena mvita bende bonsu, ne balombodi bende ba mu bukalenga, kumvuabu malu onsu avua Uriya muambe. Nanku, mukalenga kukeba bua kumushipesha. Kadi muambi Uriya kumanya bualu. Bu muvuaye ne bowa kunyemenaye mu Ejipitu.

22Nanku, mukalenga Yoyakime kutuma Elnatane, muana wa Akbore, ne bantu bakuabu mu Ejipitu.

23Kukuatabu Uriya muaba awu. Kumupatulabu mu Ejipitu. Kumufilabu kudi mukalenga. Awu kushipesha Uriya. Kuelabu tshitalu tshiende mu tshiina tshivuabu bela bitalu bia bantu bonsu ba tshianana.

24Kadi Ayikame, muana wa Shafane, ke uvua mulame muambi Yirmeya bimpe. Nanku bualu bua Ayikame, bantu kabavua mua kukuata Yirmeya kumushipa to.