Dielulula Diumvuija - MUKANDA WA MYIDI MUKULU（TSH96）

Diumvuija— Mukanda wa Dibadika udi utuleja ku ndekelu, mudi bena Izrayele bafika ku mikalu ya buloba bulaya. Mukanda wa Dielulula dia Mikenji udi ne mayuki asatu avua Moshe muyukile ne bena Izrayele (1.1—4.43; 4.44—28.68; 28.69—30.20). Moshe udi ubavuluija midimu ivua Mvidi Mukulu muenzele bantu bende, bua padiye mubanange kayi upungila: mmutue nabu ndondu, mmubaludike bimpe bidimu makumi anayi bivuabu bapitshila mu tshipela, mmubalame bimpe bua baluishi babu kababenzedi bibi, mmubapeshe mikenji yende, mmubalaye ne malaya. Kadi mukanda ewu kawena amu wambulula patupu malu menzeka nansha mikenji bidi mu mikanda idi kumpala eku. Moshe udi ulongeshamu muende muonsu, ulomba amu kulomba bantu bua bavuluke mudi Maweja-Nangila ubananga ne muoyi umue. Bua nanku basungule njila wa kudisanga ne Mvidi Mukulu mulelela. “Bena Izrayele, telejayi: Maweja-Nangila, Maweja-Nangila nkayende udi Mvidi Mukulu wetu. Unange Maweja-Nangila Mvidi Mukulu webe muebe muonsu, ne muoyi webe mujima, kabidi ne bukole buebe buonsu” (6.4-5. Tangila Mat 22.37). Miaku eyi ke ntuadijilu wa SHEMA, mmomumue ne: wa miaku idi bena Izrayele batendelela nayi Mvidi Mukulu ku dituku ku dituku, batonda kabidi nayi ditaba diabu.Mu bitupa bia ndekelu binayi, tudi tubala: 1. “Musambu wa Moshe,” wa kutumbisha nawu Mvidi Mukulu, kumuela tuasakidila (tshit. 32); 2. mushindu udi Moshe wela bisamba dikumi ne bibidi bia bena Izrayele lupemba (tshit. 33); 3. mudi Yoshuwa upingana pa mutu pa Moshe bua kufikisha bena Izrayele mu buloba bulaya (tshit. 31); 4. ne lufu lua Moshe (tshit. 34).Tshitupa tshikulu tshia mukanda wa Dielulula dia Mikenji ke “Mukanda wa Mikenji” uvuabu basangana mu Yerushalayime mu nzubu wa Mvidi Mukulu mu tshikondu tshia mukalenga Yoziyase (2 Bak 22). Ke mukanda uvua mukalenga nsongalume awu muidikije mua kulongolola nawu malu a Mvidi Mukulu mu ditunga diende. Malu avua mu mukanda awu tudi mua kuabala kabidi mu mikanda mikuabu (Bakalenga, Yirmeya, Mat 4.4,7,10; Mar 12.32).Mukanda ewu udi uyuluija mubadi wawu, wa kale nansha wa lelu, ne: muntu udi ukeba diakalenga, neadipete amu padiye utumikila miaba yonsu, ne mu malu ende onsu, kabidi ne muoyi umue, Mvidi Mukulu, Mufuki ne Musungidi wa bantu.