Ebrewu Diunvuija - MUKANDA WA MYIDI MUKULU（TSH96）
Diunvuija— Mukanda ewu kawena umueneka bu mukanda mutumina bantu to. Udi umueneka amu bu dilongesha dinene dienza kumpala kua musumba wa bantu. Amu miaku ya ndekelu ya mu tshit. 13 (diela dia muoyi), idi imueneka bu mukanda mutumina bantu. Kadi mu ntuadijilu wa mukanda ki mbafunde dina dia muntu uvua muufunde. Ki mbaleje badiye utumina mukanda wende. Mbaufundile mu Italiya (13.24) anyi?Mukanda awu mmutumina bena Kristu badi bantu bapepeja, bakengesha bua ditaba diabu. Nanku bena Kristu mbafuane kuvila ditaba diabu. Ke mudi mufundi ubakolesha ku muoyi bua balame bimpe ditaba diabu. Udi ubaleja patoke ne: Kristu udi upita bantu bonsu, kabidi ne batumibue mene ba Mvidi Mukulu. Mudimu kabidi uvua Kristu mukuate bua kutusungidila udi upita midimu mikuabu yonsu.Miaku ya kumpala ya mukanda ewu ikadi itujadikila ne: Mvidi Mukulu mmudileje muende muonsu mudiye, musangu umue bua kashidi munda mua muanende Yezu Kristu (1.1-3). Tudi mua kutapulula dilongesha edi mu bitupa binene bibidi. (Munkatshi mua dilongesha diende, mufundi udi ufila kabidi mibelu misangu ne misangu).— 1.4—10.18: Tshitupa tshia kumpala etshi tshidi tshileja bunene bupite bua Kristu: udi upita bambi (1.1), upita batumibue ba Mvidi Mukulu (1.4—2.18), upita Moshe ne Yoshuwa (3.1—4.13). Udi mutuangaji munene umuepele wa ndondu mupiamupia, udi upita batuangaji banene bonsu ba mu ndondu wa kale (4.14—7.28). Uvua mudilambule musangu umue bua kashidi. Ke mudi mulambu wende umuepele mupite milambu mivule ya kale (8.1—10.18).— 10.19—13.17: Mu tshitupa tshibidi udi wanji kukolesha bateleji bende ku muoyi, bua bananukile mu njila wa ditaba (10.19-39). Pashishe udi uleja bilejilu bimpe bia ditaba bia bantu ba mu ndondu wa kale (tshit. 11), ulomba bena Kristu bua mesu abu atangile Yezu, bua bamone mua kulama lutuulu kumpala kua baluishi babu (12.1-11). Mumane kubabela musangu wa ndekelu (12.12—13.19), udi wela bantu lupemba, ubela ne muoyi (13.20-25).Bua kuambuluisha bantu badi bamuteleja, bua kabateketshi mu maboku, mulongeshi ewu kena amu ubela to. Kadi udi uleja patoke mudi bena Kristu ne bua kukenga panu. Udi ubumvuija kabidi tshivua Kristu wipatshila: ku lufu luende uvua upetesha bantu lupandu luvua milambu mikuabu kayiyi mua kubapetesha. Nanku, udi ulomba babadi ba mukanda wende bua babuele pabu mu mulongu wa bantu bapite bungi badi bitaba Kristu, bamulonda bu mfuki wa lupandu lua kashidi bua bonsu badi bamutumikila.
