Tobite 11 - MUKANDA WA MYIDI MUKULU（TSH96）

Mesu a Tobite adi atabala

1Padibu basemena pabuipi ne musoku wa Kaserine tshimenga tshidi mutumba ne Ninive, Rafayele kuamba ne:

2— Tobiyase, udi mumanye mushindu utuvua bashiye tatuebe.

3Tudianjila kumpala kua mukajebe bua kulongolola nzubu bangabanga ne difika dia muena kuebe pamue ne bonsu batudi nabu.

4Kudianjilabu bonsu babidi pamue. Rafayele kuambila Tobiyase ne: udilongolole, wangata kanyonga ka mushipa tuye naku. Kadi mbua wa Tobiyase uvua ubalonda mu nyima.

5Musangu awu, Ana uvua musombe ku muelelu wa njila mutangila ku bule luseke luvua muanende ne bua kuvuila.

6Diakamue kumumonaye pa bule uvua, kuelaye bayende diyi ne:

— Ke muanebe wawa, uvua ne muntu uvua muye kumufila ku luendu!

7Rafayele kudianjila kuambila Tobiyase kayi muanji kufika pabuipi ne tatuende ne:

— Ndi mujadike ne mesu a tatuebe neatabale.

8Umulabe kanyonga ka mushipa pa mesu: buanga nebutangalaje nsonga idi mu mesu, neijike. Nanku tatuebe neamone bimpe.

9Musangu awu, Ana kunyema lubilu, kupukila muanende mu tshitupa, umusengelela, udila ne muadi, wamba ne:

— Pambakumonyi muananyi, mpindiewu ndi mua kufua ne disanka.

10Kadi Tobite kujuka kupatuka wenda ububuta ku tshiibi tshia ku lupangu.

11Tobiyase kusangila nende, muikale ne kanyonga ka mushipa mu tshianza, kukapuinjilaye mu mesu a tatuende, mumukuate bimpe, wamba ne:

— Kolesha muoyi, tatu!

Umuela buanga mu mesu, mumukuata.

12Pashishe ne minu ya bianza biende bibidi, udi ukupula bitatutatu bia nsonga bitoke kutuadija ku ndekelu kua mesu.

13Tobite kumupukila, udila, wamba ne:

— Ndi nkumona tshiakabidi, wewe udi usankisha mesu anyi padiwu akumona!

14Kutendelelaye kabidi, wamba ne:

— Mvidi Mukulu atumbe!

Batumbishe dina diende dinene!

Batumibue ba Mvidi Mukulu bonsu ba tshijila batumbe!

Mvidi Mukulu wa butumbi, atulame amu kutulama!

Batumibue bende bonsu ba tshijila batumbe kashidi!

Bualu Maweja-Nangila uvua muntumine dikenga edi,

kadi mpindiewu ndi mmona tshiakabidi muananyi Tobiyase!

15Tobiyase kubuela mu nzubu ne musangelu mupite, wenda utumbisha Mvidi Mukulu ne diyi dikole. Kumvuijaye tatuende muvua luendu luende lupite bimpe, muvuaye mupete biuma bia tatuende, ne kabidi muvuaye musele Sara, muana wa Raguwele. Kuambaye kabidi ne:

— Sara ukadi pa kufika, udi pabuipi ne tshiibi tshia tshimenga tshia ditunga dia Ninive.

16Tobite kusanka, wenda utumbisha Mvidi Mukulu, kuyaye kuakidila mukaji wa muanende ku tshiibi tshia ditunga dia Ninive. Bena Ninive bavua bamumona wenda ne dikanda, kabayi bamulombola kudi muntu, bavua bakema bikole. Tobite uvua wakula patoke kumpala kuabu, ubamanyisha mudi Mvidi Mukulu mumufuile luse kabidi ne mudiye mumutabeje mesu.

17Padiye ufika pabuipi ne Sara, mukaji wa muanende Tobiyase, udi umuela lupemba, wamba ne:

— Wetu awu! Muananyi wa bakaji, Mvidi Mukulu atumbe, bualu yeye ke udi mukufikishishe muetu munu! Mvidi Mukulu ele tatuebe lupemba. Ele kabidi ne muananyi Tobiyase lupemba, kabidi akuele ne wewe muananyi wa bakaji lupemba! Wetu awu, buelaku mu nzubu, usomba ne disanka ne musangelu!

18Bena Yuda bonsu bavua mu Ninive bavua basanka dituku adi.

19Akikare ne Nadabe, bana ba balume ba muanabu ne Tobite kufikabu kabidi bua kusanka pamue nende.