1 Yowanane Diumvuija - MUKANDA WA MYIDI MUKULU（TSH96）
Diumvuija— Bantu badi bumvuija Mikanda ya tshijila badi bamba ne: mupostolu Yowanane mmufunde mikanda isatu. Kadi dina diende kadiena dimueneka mu mukanda nansha umue wa ku isatu ayi. Mu mukanda wa kumpala kabena baleja nansha mufundi, nansha bantu mene badiye utumina mukanda wende. Mukanda wa kumpala ewu udi utumanyisha amu malu adi atangila Bisumbu bia bena ditaba bia mu tshikondu atshi (ku ndekelu kua lukama lua kumpala lua bidimu kunyima kua diledibua dia Yezu). Balongeshi ba malu a dishima, badi bamane kubuela mu Bisumbu bia bena ditaba, bakadi batuadija kubipambula mu njila wa ditaba dilelela. Nanku mufundi wa mukanda ewu udi wipatshila malu abidi:— udi musue kukolesha babadi ba mukanda ku muoyi, bua badisange mu bulelela ne Mvidi Mukulu, kabidi ne Muanende Yezu Kristu, pa kulonda njila wa dinangangana dia bushuwa;— udi ukeba kabidi kuluisha bantu aba badi balongesha malu adi abengangana ne Lumu lua Disanka. Balongeshi ba dishima aba badi balongesha ne: “Bia panu bionsu mbintu bibi. Nanku Kristu, Muana wa Mvidi Mukulu, kena mua kudienza muntu, kuangata mubidi (nanku balongeshi aba badi basunguluja Yezu wa panu, ne Kristu udi kayi ne mubidi). Bantu badi bapeta lupandu, ke amu badi ne dimanya disunguluke dia Mvidi Mukulu, kabayi babuelakana mu malu a panu. Dimanya nkayadi adi didi ditusungidila, nansha katuyi tunanga muntu netu, katuyi tulonda mikenji.” Ke malu a dishima adi mukanda ewu uluisha.Mu ntuadijilu wa mukanda (1.1-4), mufundi udi umanyisha tshidiye wipatshila: udi musue kuambuluisha bena ditaba bua badisange menemene ne Mvidi Mukulu, kabidi ne Yezu Kristu, banangangane mu bulelela. Bua bamone mua kuenza nanku, badi ne bua kuitaba muabu muonsu bidi bantu bavua bamone, kabidi bumvue Yezu Kristu babalongeshe. Mufundi udi ulomba babadi ba mukanda bua basombe mu butoke, bualu Mvidi Mukulu udi butoke. Ke mudibu ne bua kulama mukenji wa dinanga (1.5—2.17). Pashishe udi umanyisha ne: baluishi banene ba Kristu nebamueneke. Ke bena dishima badi bamba ne: Yezu kena Kristu, kena Musungidi wa bantu (2.18-29). Pashishe udi umvuija mushindu udi bana balelela ba Mvidi Mukulu ne bua kusomba panu: kuenza bidi Mvidi Mukulu musue, kunangangana, kuitaba Yezu Kristu ne muoyi umue (3.1-24). Mumane kumvuija babadi mudibu mua kusunguluja bulelela ne ntupakanyi (4.1-6), udi upingana ku bualu bua dinanga: bantu badi bakeba kudisanga ne Mvidi Mukulu, badi ne bua kulonda njila wa dinanga, bualu Mvidi Mukulu udi dinanga (4.7-21). Ku ndekelu kua mukanda wende, udi uleja mudi ditaba ditshimuna bionsu, uvuluija babadi mu tshikosu malu manene avuaye ulongesha (5.1-21).Mukanda ewu udi utuleja patoke nsombelu muimpe udi bena Kristu ne bua kuikala nende. Nanku udi mua kuambuluisha bena ditaba bua balekele kuitaba malu a dishima. Udi ujadika kabidi ne: kuitaba Yezu Kristu ne kunanga muntu netu, ke malu manene abidi adi enda pamue.
