1Bana banyi, telejayi mibelu yanyi meme tatuenu,
nuyilonde bua kanufiki ku njila mibi.
2Bualu Maweja-Nangila udi utumbishila tatu mu bana bende.
Udi unemesha mamu mu bana bende ba balume.
3Muntu udi unemeka tatuende udi udijimijila mibi yende.
4Muntu udi unemeka mamuende, udi bu muntu udi ukunguja biuma.
5Muntu udi unemeka tatuende, neapete disanka mu bende bana.
Maweja-Nangila neateleje milombu yende.
6Muntu udi unemeka tatuende nealale matuku a bungi pa buloba.
Udi utumikila Maweja-Nangila neasankishe mamuende mumuledi.
7Muntu wa nanku neakuatshile baledi bende mudimu,
bu mudi mupika ukuatshila bamfumu bende mudimu.
8Nemeka tatuebe mu bionsu biudi wamba nansha wenza.
Nenku yeye neakuele lupemba.
9Lupemba ludi baledi bela bana babu,
ludi lushindika nzubu ya bana babu.
Kadi mulawu udi baledi abu mua kuela,
udi ushimbula nzubu ya bana.
10Kuena mua kuditumbisha pa bualu budi bupula tatuebe lumu,
bualu bundu buende ki ndumu luebe to.
11Butumbi bua muntu budi bufuma ku kanemu kadiye uleja tatuende.
Kadi mamu udibu kabayi banemeka udi ukuatshisha bana bende bundu.
12Muananyi, ambuluisha tatuebe mu bukalakaje buende.
Kumukengeshi patshidiye ne muoyi.
13Nansha lungenyi lua tatu luenda luteketa, umufuile luse.
Kuena mua kumupepeja bualu utshidi wewe ne dikanda dionsu to.
14Bualu Maweja-Nangila kakupua muoyi bimpe biudi wenzela tatuebe,
biobi abi nebikupikule ku malu ebe mabi.
15Maweja-Nangila neakuvuluke dituku diebe dia dikenga.
Malu ebe mabi neajimine bu mudi
mabue a mayi a mvula enguluka padi munya utema.
16Muntu udi ulengulula tatuende
udi bu muntu udi usendeka Maweja-Nangila.
Udi ufikisha mamuende munda,
Maweja-Nangila udi umuela mulawu.
Bupuekele17Muananyi, enza malu ebe onsu ne bupuekele.
Nebakunange kudi bantu badi Mvidi Mukulu muanyishe.
18Paudi wenda upeta mianzu ke paudi mua kutamba kudipuekesha.
Nanku Maweja-Nangila neakutokele ku muoyi.
20Bualu Maweja-Nangila nkayende ke udi ne bukole bupite.
Bantu bapuekele badi bamutumbisha.
21Lekela kukeba mua kumanya tshidi tshikupita,
nansha kujingulula tshidi tshikutamba bukole.
22Keba mua kumanya mikenji idi Mvidi Mukulu mukuelele.
Kukebi mua kumanya malu adi Mvidi Mukulu mukusokoke!
23Lekela kuipatshila malu adi makupite,
malu adibu bamane kukuleja
mmapite adi lungenyi lua muntu mua kumanya.
24Bantu ba bungi mbapambuke ku meji avuabu belangana,
bualu meji abu mabi mmanyange lungenyi luabu.
26Muntu wa malu makole udi muena diakabi.
Muntu udi ukeba njiwu neafuilemu.
27Muena malu makole udi udikebela makenga.
Kabukebakeba nkabumonamona.
28Dikenga dia muena ditambisha kabena mua kudijikija.
Bualu bubi mbumane kuasa miji munda muende.
29Muntu wa lungenyi, nsumuinu idibu bamuelela idi imutua ku muoyi.
Muntu udi ukeba meji udi uyiteleja ne ntema.
Diambuluishangana dia bu wetu30Bu mudi mayi ajima kapia kadi kalunduka,
ke mudi dipa dia pa luse dijimija mibi.
31Muntu udi wenzelangana bimpe udi wela meji ku matuku ende adi kumpala,
neapete diambuluisha pikalaye mubuele mu dikenga.
Who We AreWhat We EelieveWhat We Do
2025 by iamachristian.org,Inc All rights reserved.
