Estere ngreke E - MUKANDA WA MYIDI MUKULU（TSH96）

Mukanda udibu babingisha nawu bena Yuda 1 Telejayi muvua mukalenga mufunde mukanda: “Meme Artashasta, mukalenga munene, ndi ngela ba mienampala batshidi bakuata mudimu mu bitupa bia buloba lukama ne makumi abidi ne muanda mutekete bidi mu bukalenga biangatshile ku Inde too ne ku bena Kushe, muoyi. Ndi ngela kabidi bantu badi bangitaba bimpe muoyi. 2 “Bantu ba bungi badi baditambisha bibi padi bantu ba kalolu babenzela bimpe misangu mipite bungi. 3 Kabena ne mushindu wa kusanka bua bionsu bidibu bapeta. Kadi mbasue amu kuenzela bana betu bibi. Kabidi badi belela bantu badi babenzela bimpe tshitungu. 4 Kabena basanka bua bidi bantu bakuabu babenzela, kadi bua ditambisha diabu, badi bateleja amu bena lutambishi badi bapanga bidi bimpe. Nenku, badi bela meji ne: badi mua kuepuka ku tshilumbu kudi Mvidi Mukulu, udi ubenga bubi. 5 “Misangu mivule kabidi, badi ku mutu badi bapesha balunda badibu bananga mianzu ya kulongolola midimu yabu, pashishe badi badilekela kudibu. Badi mua kudibueja mu dikasa dibi dia kashidi ne kushala mu bilumbu bia lufu lua bantu badi kabayi ne bualu. 6 Balunda aba badi mua kunyanga muoyi muimpe wa bantu badi balombola, padibu babasuishila malu a dishima. 7 Eyowa, bantu badi bakuata mudimu wabu bibi, badi benza malu mabi mapite. Udi mua kujadika bia nanku, kadi ki amu mu nsumuinu ya kale idibu badielela nansha. Kadi udi mua kubimona bikuenzekela matuku aa. 8 Nanku, mu matuku adi kumpala, ndi mua kudikolesha bua bantu bonsu bikale mu bupole ne ditalala mu bukalenga buanyi. 9 Bua bionsu abi, nenshintulule bidi bikengela mua kuenza, nenkenkete biakane malu onsu adibu bammanyisha. 10 “Tuteke tshilejilu tshia Amane, muana wa Amedata: mmuena Masedoniya, muntu muenyi mu tshisamba tshia Persa, kena ne muoyi mulenga wa bu wetu. 11 Kadi meme kumuakidila, meme kudia ne bulunda bu mundi mudie ne bantu ba matunga onsu, kupetaye muanzu wa ‘Tatu wa bukalenga’. Bantu bonsu bavua binama kumpala kuende, bualu uvua muntu mu nyima muanyi ne muanzu munene. 12 Kena mutekele ditambisha diende to. Uvua ukeba bikole bua kunyenga bumfumu ne kunshipa. 13 Ku malu onsu ende a dishima, uvua musue kunsuishila bua meme kushipesha Mordekayi, muntu uvua mumpandishe, ne mungenzele bimpe, kabidi ne Estere, udi kayi kadiwu mu bukalenga buanyi, kabidi ne tshisamba tshiende tshijima. 14 Ke mushindu uvuaye wela meji bua tuikale katuyi ne bantu badi ku tshietu, kadiyi ne bukalenga, kabidi bua amone mua kuangata bukalenga bua bena Persa kubupesha bena Masedoniya. 15 Kadi tuetu, tudi bajadike ne: bena Yuda badibu bamba mua kubutula kudi muena lonji ewu, ki mbena buenzayi to. Badi bakumbaja mikenji yabu bimpe. 16 Bualu badi kabidi bana ba Mvidi Mukulu wa mulu, Mvidi Mukulu munene, udi mulame bukalenga buanyi butungunuke biakane, biangatshile tshikondu tshia bankambua banyi too ne lelu. 17 “Kanuena mua kuangata ne mushinga mikanda ivuabu banutumine kudi Amane, muana wa Amedata to. 18 Bualu mufundi wa mikanda eyi, mbamana kumowa ne bena diku diende, ku tshibuelelu tshia tshimenga tshia Suze. Mvidi Mukulu mfumu wa bintu bionsu bidiku, wamunyoki ne dinyoka didi dimukumbanyina. 19 Nulamike mukanda ewu mu masangu onsu a njila. Anyishayi bua bena Yuda badienzele malu bilondeshile mudi bibidilu amu biabu. 20 Bambuluishayi mu mishindu yonsu bua kuipata bantu badi basue kubaluisha bua kubabutula mu dituku di-vuabu bamana kujadika mua kubashidisha, mmumue ne matuku dikumi ne asatu a ngondu wa Adare. 21 Bualu Mvidi Mukulu udi mfumu wa bionsu mmukudimune dituku edi dia kubutula bena Yuda, dishale dituku dia disanka dia bantu bende bavuaye musungule. 22 Nuenu kabidi, nuteke dituku edi mu matuku a bibilu bia ditunga, nuikale nudivuluka, nutua tshianga nusanka. 23 Biangatshile lelu, dituku edi didi dileja mudi bantu bapatuka mu njiwu minene, kundi meme kabidi ne kudi bena Persa ba muoyi muimpe, kabidi didi divuluija bantu bonsu badi bangela tshitungu ne: nebadikebele kabutu. 24 Nemfikile tshitupa tshionsu tshia buloba munda ne tshimenga tshionsu, padibi kabiyi bilama mikenji yanyi eyi. Nebashipe bantu, neboshe nzubu. Muntu nansha umue kena mua kushala ne muoyi nansha. Nansha nyunyi ne nyama ya tshisuku nebizakale nebinyememu kashidi.”