Yezekiyele 25 - MUKANDA WA MYIDI MUKULU（TSH96）

Mvidi Mukulu udi ukanyina bena Amone

1Maweja-Nangila kungambila ne:

2— Mpindiewu, Yezekiyele, wambile bena Amone tshibawu tshindi mubafundile.

3Ubambile bua bateleje tshindi meme Maweja-Nangila mbambila ne: “Nuvua nuseka pavuabu banyanga muaba wanyi wa tshijila, pavuabu babutula ditunga dia bena Izrayele, pavuabu baya ne bena Yuda mu bupika.

4Nanku, ndi ntuma bendakanyi ba bisamba bia bende, ba kudi diba dipatukila, bua bakuate ditunga dienu. Nebase mpangu yabu mu buloba buenu, nebasemu mitanda yabu. Nebadie bimuma bienu, nebanue mabele anudi nawu.

5Nennyangakaje tshimenga tshienu tshinene tshia Raba, tshishale muaba wa kudishila nyama ya tumelu. Ditunga dijima dia bena Amone nedishale muaba wa kudishila mikoku. Diba adi, nenujadike ne: meme ndi Maweja-Nangila.

6“Meme Maweja-Nangila Mvidi Mukulu ndi ngamba ne: nuvua batuta bikashi, batupika basanka, pavua dikenga dikuata bena Izrayele. Nuenu kuleja munuvua bapeje, balekele bantu banyi lukinu.

7Nanku, nennuleje bukole buanyi. Nennufile kudi bantu benyi. Nebanunyenge bionsu binudi nabi. Kanuakuikala kabidi tshisamba tshia bantu to. Kanuakuikala ne ditunga to. Nennubutule bonsu kashidi. Diba adi, nenujadike ne: meme ndi Maweja-Nangila.”

Mvidi Mukulu udi ukanyina bena Mowabe

8“Meme Maweja-Nangila Mvidi Mukulu ndi ngamba ne: Bena Mowabe bavua bamba ne: bena Yuda badi anu tshisamba bu mudi bisamba bikuabu bionsu.

9Nanku nentume bantu bua baluishe badi basombela mu bimenga bidi ku mikalu ya ditunga dia Mowabe. Nebabinyange bionsu bilondangane, nansha bidi bipite buimpe bu mudi Bete-Yeshimote, Baale-Meyone ne Kiriyatayime.

10Nentume bantu bendakanyi badi bafume ku luseke ludi diba dipatukila, bua bakuate ditunga dia bena Mowabe, bu muvuabu bakuate dia bena Amone. Nanku matuku adi kumpala, bantu kabakuvuluka kabidi bena Mowabe to. Dina diabu nedijimine kashidi.

11Nennyoke bena Mowabe. Diba adi nebajadike ne: meme ndi Maweja-Nangila.”

Mvidi Mukulu udi ukanyina bena Edome

12“Meme Maweja-Nangila Mvidi Mukulu ndi ngamba ne: Bena Edome bavua basombuela bikole bena Yuda. Nanku bena Edome mbena tshibawu tshikole.

13Kadi meme Maweja-Nangila Mvidi Mukulu ndi njadika ne: Nennyoke bena Edome bikole. Nembutule bantu ne nyama bidi mu ditunga diabu. Ditunga nedishale tshipela, biangatshile ku tshimenga tshia Temane too ne ku tshia Dedane. Bantu ba mu ditunga dia Edome nebafue mu mvita.

14Bantu banyi bena Izrayele nebasombuele bena Edome mu dina dianyi. Bena Izrayele nebabanyoke bikole, mushindu udi tshiji tshianyi tshilomba. Bena Edome nebalonge mudibu ne bua kuntshina. Meme Maweja-Nangila Mvidi Mukulu, ndi njadika bualu abu.”

Mvidi Mukulu udi ukanyina bena Peleshete

15“Meme Maweja-Nangila Mvidi Mukulu ndi ngamba ne: Bena Peleshete bavua benze bibi. Bualu bua lukuna lua kale luvuabu nalu, bavua basombuele baluishi babu ba kuonsu eku ne muoyi wa tshinyangu, babashipa.

16Nanku, meme Maweja-Nangila Mvidi Mukulu ndi mbamanyisha ne: Nembanyoke. Nembutule bantu bonsu aba badi bafume ku Kaftore, baye kusomba ku muelelu wa mayi manene.

17Nembasombuele, nembanyoke bibi. Diba adi, nebamanye ne: meme ndi Maweja-Nangila.”