1 Timote Diumvuija - MUKANDA WA MYIDI MUKULU（TSH96）
Diumvuija— Tatuende wa Timote uvua muena Ngreke, mamuende muena Yuda, uvua mumane kubuela mu Tshisumbu tshia bena Kristu. Polu kupetangana ne Timote musangu wa kumpala mu tshimenga tshia Listra (tshimenga tshia mu buloba bua Aziya Mukese, budi lelu mu ditunga dia Turkiya), mu luendu luende luibidi (MM 16.1-3). Bituadija diba abi Timote kushala mulunda wa Polu, kabidi muambuluishi wende munene. Uvua umufila mu ngendu mivule. Misangu ne misangu Polu kumutuma mu Bisumbu bia bena ditaba, bua akosemu bilumbu, alongolole malu mu bupole. Ke padibu batela dina diende misangu mivule mu mukanda wa Malu Menza (tshilejilu: 17.14-15; 18.5; 19.22), nansha mu mikanda ya Polu (tshilejilu: 1 Kor 4.17; 16.10-11; Fil 2.19-24; 1 Tes 3.2-6, a.n.). Batu binyika mikanda ibidi mitumina Timote, ne mukanda mutumina Tite, dina ne: “Mikanda ya bulami.” Bualu Polu udi umvuijamu njila udi “balami” ba bena ditaba ne bua kulonda mu mudimu wabu munene wa kulombola Tshisumbu.Mu mukanda wa kumpala mutumina Timote, Polu udi ulongesha malu manene asatu:— Udi udimuja Tshisumbu tshia bena ditaba ku njiwu ya balongeshi ba dishima, badi balongesha bantu malu a bena Yuda, baasambakaja ne a bena bisamba bikuabu. Badi balongesha ne: bia panu bionsu bidi bibi; badi mua kupeta lupandu, ke amu bantu bakese badibu balongesha malu masokome. Balongeshi aba badi balongesha kabidi mudi bantu ne bua kujila biakudia bikuabu, kabidi mudibu ne bua kubenga kubuela mu dibaka.— Pashishe Polu udi ulongesha malu adi atangila ditendelela dia Mvidi Mukulu, bulongolodi bua Tshisumbu tshia bena ditaba, ne nsombelu wa balombodi batshi.— Udi umvuija kabidi Timote mudiye mua kuenza mudimu wende bimpe, mudiye ne bua kulama bisumbu bishilangane bia bena ditaba mu bupole, bua ikale “muena mudimu wa tshitembu wa Yezu Kristu” (4.6).Tudi mua kuabuluja mukanda ewu mu bitupa binene bibidi:— Dilongesha didi ditangila Tshisumbu tshijima tshia bena ditaba, ne bamfumu babu (tshit. 1 too ne tshit. 3).— Dilongesha didi ditangila midimu mene ya Timote (tshit. 4 too ne tshit. 6).Tshisumbu tshia bena ditaba, ne bamfumu babu, kabena ne bua kuitaba Kristu bu bampofu nansha. Badi ne bua kudifila muabu muonsu kudi Yezu Kristu, Musungidi wetu, bashindamena mu dimutumbisha, ne mu dimukukuila (2.3-6).
