Yona Diumvuija - MUKANDA WA MYIDI MUKULU（TSH96）

Diumvuija— Mukanda wa Yona udi ulonda ntatu ivua muambi mupete, pavuaye ukeba kudiongoloja, unyema, kayi musue kuya kuvua Mvidi Mukulu umutume. Kadi malu adibu batulondela adi ne malongesha manene munda muawu. Ke mutudi mua kuteka lusumuinu elu kabidi munkatshi mua mikanda ya meji a bena Izrayele.Lusumuinu lua Yona ludi lutulongesha malu manene: Mvidi Mukulu kena unanga amu bena Izrayele nkayabu. Nansha benyi badi bamuangata ne mushinga, udi ubaleja mudiye ubananga. Padi bantu bateleja mibelu yende, badilengeja bushuwa, kena musue kubanyoka kabidi to, bualu udi muena luse. Mvidi Mukulu udi mufuki wa bionsu, udi upetesha bantu muoyi, ubafikisha kabidi ku lufu. Muambi kena mua kufika munda padi Mvidi Mukulu musue kujimijila bantu mibi yabu to.Mukanda wa Yona udi utumvuija kabidi, ne muoyi wa kalolu, kabidi pa kutusekesha, ntatu, makenga, milandu ne mpata, bidi muambi mua kupeta, nansha muntu mukuabu, udi Mvidi Mukulu utuma ku mudimu. Udi utulongesha ne: Mvidi Mukulu kakulekela muambi wende mu dikenga nkayende. Kakuanyisha kabidi bua muambi wende amunyeme aye kule. Bualu Mvidi Mukulu kena upungila bua kuamba kuambulula, kumvuija bantu ne: Ndi nnanga yonsu wa kunudi.Yezu uvua muangate malu a Yona bua kumanyisha nawu bantu dibika diende ku bafue. Uvua mmvuluije kabidi bantu ba mu tshikondu tshiende tshilejilu tshia bena Ninive bavua badilengeja (Mat 12.38-42).