1Mukalenga Maweja-Nangila, ndi nkuela tuasakidila.
Ndi nkutumbisha, wewe Mvidi Mukulu wanyi.
Ndi nkuela amu wewe tuasakidila,
2bualu wewe uvua mundame,
mungambuluishe,
munsungidile,
mumpatule mu mateyi avua bena bijanu ne bena dishima banteya.
Uvua mungambuluishe pavua bantu bankina.
3Wewe kundeja muudi ne luse luvule.
Uvua ne diyi anu dimue mu bionsu biuvua wamba
bua bavua bamane kunkuata.
Wewe kunsungidila kudi benzavi aba, bavua basue kunshipa.
Mu makenga mavule avua mankuate, bavua bakeba kunsukumina,
4wewe kumpatula mu kapia kakole kavua kanjingila,
ne mu ndimi ya kapia kamvua tshiyi mutemeshe.
5Wewe kumpandisha ku lufu,
ne kudi bantu badi bakula meyi mabi a
dishima,
6ku miketa idibu bela kudi muena mukosu.
Muoyi wanyi uvua usemena ku lufu,
nkavua mikolu ku tshiina,
7baluishi bavua bannyungulukila nseke yonsu,
kakuyi muntu udi mua kungambuluisha.
Meme kukeba muntu udi mua kungambuluisha, nansha kumupeta!
8Nenku, wewe Maweja-Nangila, ndi muvuluke ne:
udi muakane, udi utuenzela matuku onsu bimpe,
bualu udi upandisha bonsu badi bakutekemena,
udi ubasungidila kudi bantu babi.
9Meme kukutendelela panu apa,
kukusengelela bua umpandishe.
10Meme kukubikila bikole ne: “Maweja-Nangila, udi Tatu wanyi,
kundekedi mu dikenga, pandi tshiyi ne muntu udi mua
kungambuluisha kumpala kua bena ditambisha.
11Nentumbishe dina diebe tshiyi ndekela,
nengimbe misambu bua kukuela tuasakidila.”
Udi mumane kuteleja kulomba kuanyi,
12wewe kumpandisha ku kabutu,
kungumusha mu makenga.
Ke pandi musue kukuela tuasakidila muvule,
kutumbisha dina diebe,
wewe Maweja-Nangila bua bilenga bionsu biudi muenze.
Mutudi mua kukeba meji(14.20-27)13Pantshivua muana, tshiyi muanji kumanya mudi panu,
mvua nkeba meji patoke,
ntendelela Maweja-Nangila.
14Kumpala kua nzubu wa Mvidi Mukulu, mvua ntendelela bua kuapeta,
mvua muakebe muanyi muonsu,
15Diba adi, meji akola,
bu mudi tumuma tua nwinyo tupia,
kuenzawu mpokolu wa disanka dianyi.
Meme kulonda njila muakane,
biangatshile ku buana buanyi makasa anyi avua enda mu njila wa meji.
16Nansha meme muteye matshi kakese, mvua mpeta meji,
meji avua andongesha malu manene.
17Ndi mulubuluke bualu buawu.
Ke pandi mvuluka
udi mundongeshe mua kupeta meji.
18Meme kupangadika kabidi bua kuenza tshidiwu angambila,
meme kusuminyina dienza bimpe.
Meji ki mmamfuishe bundu to.
19Mvua muluangane bikole bua kuapeta,
mvua muenze muanyi muonsu bua kukumbaja diyi dia Mvidi Mukulu.
Misangu mivule, mvua ntendelela muele bianza mulu,
ntonda mumvua mulengulule meji.
20Kadi meme kutuma muoyi wanyi kudiwu,
meme kuapeta pamvua mutekele malu mabi onsu.
Kutuadija ku mbangilu, meji kumpetesha lungenyi,
ke pandi tshiyi mua kualekela kashidi.
21Muoyi wanyi mujima, uvua amu bua kulamata kudiwu,
ke pandi mupete bilenga bia mushinga mukole ebi.
22Maweja-Nangila kumpa dipa dia kuakula bimpe,
meme kukuata nadi mudimu wa kumutumbisha.
23Nuenu badi kabayi ne meji,
semenayi kundi, nubuele mu kalasa ka Meji.
24Nudi nuindila tshinyi bua kuakeba,
panudi nawu dijinga?
25Ndi nnujadikila ne:
“Nudi mua kuapeta kanuyi baasumbe.
26Kuatayi mudimu bikole, bua nuenu kuapeta.
Meji adi pabuipi menemene.
27Ndi nnujadikila ne: mvua mukuate mudimu mukese,
kupeta disanka divule.
28Longayi bindi mulongeshe, nubiangate ne mushinga,
panudi nukuata nabi mudimu nenupete tshiamu tshia mpawungi tshipite bungi.”
29Nusanke bua luse lua Maweja-Nangila,
kanuikadi ne bundu bua kumutumbisha.
30Kumbajayi midimu yenu, diba kadiyi dianji kupita.
Maweja-Nangila neanufute pakumbana diba.
Who We AreWhat We EelieveWhat We Do
2025 by iamachristian.org,Inc All rights reserved.
