1Pikalabu bakusungula bua kulongolola tshibilu tshia didia,
kudiangatshi bu muntu munene.
Tangila badibu babikila bonsu bu bena mulongu nebe,
anji kubapesha bia kusomba, pashishe uye kusomba pebe.
2Pawajikija midimu yebe yonsu, uye kusomba webe muaba, bua kusanka nabu,
bobo nebakuele kalumbandi bua mudimu webe mulenga uudi mubenzele!
3Wewe muikale mukulumpe mupite bakuabu ku bidimu, udi mua kuyukila.
Kadi udi mua kulonda amu biudi mumanye,
kupangishi mua kuimbabu misambu to.
4Padi bantu bateleja misambu, lekela kutungunuka ne mayuki.
Kuleji bantu dimanya diebe diba didi kadiyi dia kudileja.
5Misambu idibu bimba mu didia dinene,
idi mimpe bu dibue dia mushinga mukole,
dilengeja ne tshiamu tshia mpawungi.
6Biombelu bidibu bimba padibu banua maluvu mimpe,
bidi bu dibue dia mushinga mukole dia mayi a matamba, dilengeja ne mpawungi.
7Paudi nsongalume, udi mua kuyukila paudi ne bualu bua kuamba,
kadi udi mua kuakula musangu umue anyi ibidi, anu padibu bakuebeja bualu.
8Amba malu a bungi mu tshikosu,
ikala bu muntu udi mumvue bualu, kadi enza bu udi kuyi mubumvue.
9Paudi usomba munkatshi mua bantu,
kukebi bua bakuteleje amu wewe to,
muaba udi bakulakaje kuena mua kubayukidila miyuki kuyi wela meji to.
10Bu mudi muela wa mvula udianjidila dikubakuba,
ke mudi lumu lua muntu udi udinemeka lumudianjidila.
11Padi diba dikumbana, juka uye kuebe lukasa, kunengakanyi to.
12Pawafika kuebe, wikisha, wenza bionsu biudi musue,
kadi kuenji bibi, kuakudi meyi a ditambisha.
13Kadi tumbisha Mukufuki bua bionsu ebi,
bualu yeye ke udi mukupe bilenga bionsu bivule ebi.
TSHITUPA TSHINAYIDitshina dia Mvidi Mukulu14Muntu udi utshina Maweja-Nangila udi wanyisha mibelu yende.
Badi bamukeba biangatshile ku dinda,
badi bamupeta ubatokela ku muoyi.
15Muntu udi ukeba mua kujingulula mikenji ya Maweja-Nangila,
neayimanye bimpe.
Kadi mikenji eyi idi ilenduisha muena mpala ibidi.
16Badi batshina Mvidi Mukulu badi bamanya tshidiye musue.
Malu abu malenga neakenke bu muendu.
17Muntu udi wenza bibi udi ubenga mibelu,
udi ukeba pa kubingila bua kuenza muende mudiye musue!
18Muntu wa meji udi uvuluka bionsu bidibu bamba, wela meji,
kadi muena tuseku, ne muena diditambisha kena utshina bualu nansha bumue.
19Kuena mua kuenza bualu kuyi muanji kuela meji,
bua kuvu kunyingalala bua biuvua muenze!
20Lekela kuenda mu njila wa njiwu,
bua kututshi dikasa ku dibue!
21Lekela kuyila mu njila udi kayi mumanyike.
22Udimuke bua bidi mua kukuenzekela.
23Mu bionsu biudi wenza anji kudikonkonona,
kuenza nanku nkulonda meyi a Mvidi Mukulu.
24Muntu udi ulonda mikenji ya Maweja-Nangila udi wenza tshidiyi yamba,
udi utekemena kudi Maweja-Nangila kabena mua kumutuisha bundu.
Who We AreWhat We EelieveWhat We Do
2025 by iamachristian.org,Inc All rights reserved.
