1 Bamakabe 15 - MUKANDA WA MYIDI MUKULU（TSH96）

Mukalenga Antiyokuse VII udi ufundila Simeyone mukanda

1Antiyokuse VII, muana wa mukalenga Demetriyuse I, pavuaye mutshikale ku bidiila bia bena Ngreke, kutuminaye Simeyone, mutuangaji munene, kabidi mfumu wa ditunga dia bena Yuda, ne bena ditunga bonsu mukanda.

2Uvua mufunde ne:

— Meme mukalenga Antiyokuse, ndi ngela Simeyone, mutuangaji munene, kabidi mfumu wa bena Yuda, kabidi ne ditunga dijima dia bena Yuda, muoyi.

3Baluishi bakanyenga bukalenga bua bankambua banyi. Ndi nkeba kuakajilula bumfumu abu amu bu mutuabu bangabanga. Ke pandi mumane kusangisha bisumbu bia bena mvita bitule, kabidi ndi ne majuwa a mvita malongolola bimpe.

4Ndi njinga kubuela mu ditunga bua kulondakajabavuabanyanga ditunga dietu, ne bimenga bivule bidi ku bumfumu buanyi.

5Mpindiewu ndi nkushindikila meyi onsu atua bakalenga bandi mupingane bela bua bitadi ne milambu binudi kanuyi ne bua kufuta.

6Ndi nkuanyisha bua wenze nkanu ya bubanji mu diebe ditunga.

7Kanuena ne bua kufuta bitadi bua tshimenga tshia Yerushalayime ne bua muaba wa tshijila. Bintu bionsu bia lufu biudi nabi, nzubu ya bimana bikolesha iudi nayi, kabidi iudi utangila, bidi bishala bintu biebe.

8Mabanza audi nawu kudi mukalenga ne audi mua kupeta pashishe, tudi malekela bituadije ku mpindiewu ne kashidi.

9Diba dingapeta bukalenga mu ditunga dianyi, nenkupe lumu lunene, wewe ditunga diebe, kabidi ne nzubu wa Mvidi Mukulu. Nanku buloba bujima nebujadike muudi ne lumu.

Antiyokuse VII udi ubunda Trifene mu Dora

10Tshidimu tshia 174, Antiyokuse kubuela mu ditunga dia bankambua bende. Bena mvita bonsu batua badisange kudiye. Trifene utua mushale ne bantu amu bakese.

11Antiyokuse kulondakaja Trifene. Awu pende kunyema mu Dora ku muelelu wa mayi manene.

12Uvua mumanye bimpe mutua dikenga, bualu bena mvita bende batua bamushiya.

13Antiyokuse kuela tshimenga tshia Dora munkatshi ne mvita, uvua ne bena mvita binunu lukama ne makumi abidi, kabidi ne babandi ba pa tubalu binunu muanda mukulu.

14Utua munyungulule tshimenga ku mukuna, matu matuangane pa mayi kumpala kua tshisabu. Nenku nansha ku mukuna nansha pa mayi, muntu kavua upatuka nansha ubuela mu musoku to.

Badi babangulula ndondu ne bena Rome

15Numenyuse ne bavua bamushindikije batumine ku Rome, batua ne mikanda mifundila bakalenga ba matunga mashilangane. Telejayi mutua mukanda awu:

16— Meme Lusiyuse, mulombodi wa bena Rome, ndi ngela mukalenga Ptolemeye muoyi.

17Mienampala ya bena Yuda, mifuma kudi Simeyone mutuangaji munene, ne kudi bena Yuda, mmifike kuetu kunu bu balunda kabidi bu bantu batudi batua nabu ndondo, bua tuenzulule ndondu yetu ya kale.

18Mmituale ngabu wa mpawungi wa mushinga wa kilo 500 ya nkanu mitoke ya mushinga mukole.

19Ke patudi tufendila bakalenga ba matunga mashilangane mukanda bua kabenzedi bena Yuda bibi, kababaluishi bobu, bimenga biabu, nansha ditunga diabu. Kabena mua kutua ndondo ne bantu badi baluisha bena Yuda to.

20Nanku tuanyishi mua kuangata ngabu kudi bena Yuda abu.

21Pikala bantu benzayi banyema mu matunga abu, batua kuenu aku, bafilayi kudi mutuangaji munene Simeyone, bua abanyoke bilondeshile mudi mikenji yabu.

22Mulombodi Lusiyuse, utua mutume mukanda kudi mukalenga Demetriyuse, kudi Atale, kudi Ariyarate, ne kudi Arsake.

23Bavua bautume kabidi mu matunga onsu aa: ku Samsame, ku Sparte, ku Delose, ku Mindose, ku Sikiyone, ku Kariye, ku Samose, ku Pamfiliya, ku Likiye, ku Alikamase, ku Rodese, ku Faseliye, ku Kose, ku Side, ku Arvade, ku Ngortine, ku Knidose, ku Shipre ne ku Sirene.

24Bavua bautentule kabidi bua kutumina Simeyone mutuangaji munene.

Antiyokuse VII udi upula ndondo ne Simeyone

25Nenku mukalenga Antiyokuse kunyungulula kabidi tshimenga tshia Dora ne mvita. Uvua utuma matuku onsu bena mvita bua baluishe tshimenga, wenzeja kabidi matempu a mvita bua kuluangana nawu. Ke bivua bipangisha Trifone ne bantu bende mua kubuela ne kupatuka mu tshimenga.

26Simeyone kutumina Antiyokuse bena mvita, bapiluke binunu bibidi bua kumuambuluisha ku mvita, kabidi ne nkanu mitoke ya mushinga mukole, ne mpawungi ne bintu bivule.

27Kadi Antiyokuse uvua mubenge bua kubakidila, mubenge kabidi ne bionsu bivuabu bumvuangana bangabanga ne Simeyone. Ukavua muluishi wende.

28Antiyokuse kutumina Simeyone Atenobiyuse, umue wa ku “balunda ba Mukalenga,” bua kuambila Simeyone ne:

— Udi mukuate Yope, Ngezere ne tshimenga tshikolesha tshia Yerushalayime. Bimenga ebi bidi mu bukalenga buanyi.

29Udi munyange bitupa bia buloba ebi. Udi muenzele ditunga bibi. Kabidi udi mfumu wa misoku ya bungi idi yanyi meme.

30Pingaja bimenga bionsu biudi mukuate. Ufute bitadi bua miaba yonsu iudi mukuate, idi kayiyi mu Yudeya.

31Paudi kuyi musue kuitaba, neufute kilo 13.000 bua bimenga ebi ne kilo 13.000 ya nkanu mitoke ya mushinga mukole bua bionsu biuvua munyange ne bua bitadi biuvua mubenge kufuta. Wewe mubenge netufike bua kuluangana nebe mvita.

32Atenobiyuse, “mulunda wa Mukalenga” Antiyokuse, kuyaye mu Yerushalayime. Kumonaye bubanji buvua Simeyone nabu, mesa, ne bintu bikuabu bia mpawungi, ne bia biamu bia mushinga mukole, bivua mu tshidiilu tshiende, ne butumbi bua bukalenga bua Simeyone. Kadi kumanyishaye Simeyone bivua mukalenga muambe.

33Simeyone kumuandamuna ne:

— Tuetu katuena banyenga bantu buloba buabu. Katuena biba tshintu tshia bende nansha. Tudi bangate amu bumpianyi buetu, buloba bua bankambua betu buvuabu batunyenga kudi baluishi betu tshikondu kampanda.

34Tudi bakuate mudimu bua batupingajile bumpianyi bua bankambua betu.

35Kadi bua tshimenga tshia Yope ne tshia Ngezere, biudi ulomba, bantu babu mbanyange bintu bietu ne bia bena ditunga. Tudi tufuta kilo ya nkanu mitoke ya mushinga mukole 2.700, bua kushintakaja ne bimenga ebi.

Atenobiyuse kupuwa vii!

36Kupinganaye kudi mukalenga ne tshiji tshikole. Kumumanyishaye bionsu bivua Simeyone muakule, kabidi ne bionsu bia lumu bivua bimunyingulula. Ke mukalenga kufika munda bikole.

Kendebeye, mulombodi munene wa bena mvita, udi uluisha buloba bua Yudeya

37Trifone kubuela mu majuwa, kunyema mu tshimenga tshia Ortosiya.

38Ke mukalenga kuteka Kendebeye mfumu mutangidi wa tshiluilu tshia misoku idi ku muelelu wa mayi manene. Kumupaye musumba wa tshiluilu tshia ku makasa ne tshia babandi ba pa tubalu.

39Uvua utuma diyi bua base mitanda yabu, batangilangane ne Yudeya, basulula tshimenga tshia Kedrone, bakolesha biibi biatshi, kabidi baluishe bena Yuda. Mukalenga Antiyokuse pende kulondakaja Trifone ne nwita.

40Kendebeye kuya mu Yamniya, kubunda bena Yuda misangu mivule, kubuela misangu ne misangu mu ditunga diabu dia Yudeya. Kukuataye bantu mu lukanu, kubashipa.

41Kuasululaye Kedrone, kutekamu babandi ba pa tubalu ne bena mvita ba ku makasa bua bamone mua kuluisha ditunga dia Yudeya, balama njila idi miyemu. Ke muvua mukalenga mutume diyi nanku.