Tshibangidilu 45 - MUKANDA WA MYIDI MUKULU（TSH96）

Yozefe udi udimanyisha kudi bana babu

1Yozefe kupanga mua kukolesha muoyi kumpala kua bantu bende. Ke kupatuishaye bantu bonsu pa mbelu, kushala anu nkayende ne bana babu. Kudimanyishaye kudibu.

2Yozefe kudila bikole. Muadi wende kumvuika kudi bena Ejipitu bonsu. Bavua bumvue bualu ebu ne mu nzubu wa mukalenga wa bena Ejipitu.

3Yozefe kuambila bana babu ne:

— Meme ndi Yozefe wenu! Kadi bushuwa tatu wanyi utshidi ne muoyi anyi?

Bana babu kuzakala bikole. Kupangabu mua kuandamuna.

4Yozefe kubambila ne:

— Semenayi pabuipi nanyi.

Basemena, kudimanyishaye, wamba ne:

— Meme ndi muanenu Yozefe, unuvua bapane bua baye nanyi mu Ejipitu.

5Kadi kanutshinyi, kanupampakanyi bua panuvua bampane. Mvidi Mukulu ke uvua muntume kumpala kuenu, bua mmone mua kunupandisha.

6Mpindiewu tudi mu tshidimu tshibidi tshia tshiyole. Kumpala eku kutshidi bidimu bikuabu bitanu, bidi bantu kabayi mua kudima nansha kunowa.

7Mvidi Mukulu ke udi muntume kumpala kuenu mu ditunga edi bua meme kunulamina biakudia, bua kunupandisha nuenu ne ndelanganyi yenu yonsu mushindu ewu wa dikema.

8Nuenu kanuena bantume munemu to. Anu Mvidi Mukulu ke udi munteke bu diboku dia bukole dia mukalenga wa bena Ejipitu, bua meme kutangila bintu bionsu bia mu nzubu muende ne kushala mulombodi wa ditunga dijima dia Ejipitu.

9Nanku pinganayi lukasa bua kuangata tatu wanyi. Numuambile ne: “Yozefe webe udi wamba ne: Tatu afike kuneku lukasa, bualu Mvidi Mukulu mmunteke mulombodi wa ditunga dijima dia Ejipitu.

10Tatu neasombe pabuipi nanyi mu ditunga dia Ngoshene, pamue ne bana bende, bikulu bende, too ne bimuna biende: mikoku, mbuji, ngombe ne bionsu bidiye nabi.

11Kuneku meme nemmudishe bimpe, kayi mua kukenga tshintu, yeye ne bena diende bonsu, kabidi ne bimuna biende. Bualu bidimu bikuabu bia tshiyole bitshidi bishale bitanu.”

12Kubambila kabidi ne:

— Nuenu bonsu, kadi nangananga wewe Binyamine, nudi bamone ne: Udi wakula nenu ke meme!

13Nanku nuye kumanyisha tatu muanzu undi nawu mu Ejipitu. Numulondele bionsu binudi bamone munemu. Pashishe nupingane ne tatu kuneku lukasa.

14Yozefe ne Binyamine kupukilangana, kuasa miadi.

15Yozefe kupukila bana babu bonsu, udila amu kudila. Amu diba adi bobu kukimina kuyukila nende.

Mukalenga wa bena Ejipitu udi ubikidisha Yakobe mu Ejipitu

16Mukalenga wa bena Ejipitu kumvua lumu lua difika dia bana babu ne Yozefe. Kusankaye pamue ne balombodi ba mu bukalenga buende.

17Kuambilaye Yozefe ne:

— Ambila bana benu, bambuishe nyama yabu bujitu lubilu, bapingane mu ditunga dia Kenaane,

18bua bangate tatuabu ne diku diende dijima, bafike nende apa. Nembasunguile muaba muimpe udi ne biakudia bia bungi, mu ditunga dia Ejipitu.

19Wewe wambile bana benu, bua bangate matempu a munu mu Ejipitu, baye nawu bua kuambuilamu bakaji babu ne bana, kabidi ne tatuabu.

20Kabena mua kunyingalala bua bintu biabu bidibu bashiya mu Kenaane to. Bualu bintu bionsu bimpe bidi mu ditunga dia Ejipitu nebikale bienu.

21Bana ba Yakobe kuenza bionsu abi. Yozefe kubapesha matempu, bu muvua mukalenga wa bena Ejipitu muambe, ne bintu bia kudia mu njila.

22Kupeshaye muanabu yonsu tshilamba tshimpe. Kadi kupeshaye Binyamine bilamba bitanu, ne nkanu ya tshiamu tshitoke tshia mushinga mukole nkama isatu.

23Pashishe kutuminaye tatuende nyama ya mpunde milume dikumi, miambule bintu bimpe bia mu Ejipitu. Kumutuminaye kabidi nyama ya mpunde mikaji dikumi, miambule ntete ya kuenza bukula, mampa, ne biakudia bikuabu bia tatuende kudia mu njila.

24Yozefe kubela bana babu ne: “Kanutandianga-nyi mu njila to.” Kulayanganabu nende, kuya.

25Bana babu ne Yozefe kumuka mu Ejipitu, kupingana mu ditunga dia Kenaane, muaba uvua tatuabu Yakobe.

26Kuambilabu tatuabu ne:

— Muanebe Yozefe utshidi ne muoyi! Yeye ke udi ulombola ditunga dijima dia Ejipitu.

Yakobe uvua mupuwe kayi wenza bualu! Kavua muitabe bivuabu bamuambile to.

27Bana bende kumulondela kabidi bionsu bivua Yozefe mubambile. Yakobe umona matempu avua muanende Yozefe mumutumine, kutukijaye muoyi wa munda.

28Kukemaye kabidi, wamba ne:

— Mbikumbane! Yozefe wanyi meme utshidi ne muoyi! Ndi musue kumonangana nende, pantshidi ne muoyi apa.