Agayi Diumvuija - MUKANDA WA MYIDI MUKULU（TSH96）

Diumvuija— Bena Yuda bavua mu bupika mu Babilone mvula bu makumi atanu (587-538 bgbg ne Y.K.) Bamane kupingana mu ditunga diabu, muambi Agayi udi ukuata mudimu, ubela bena Yuda, bua basulule nzubu wa Mvidi Mukulu wa mu Yerushalayime, uvua baluishi bashimbule. Nanku mu mukanda ewu, mudi malongesha avua muambi mulongeshe bantu mu dina dia Mvidi Mukulu, mu tshidimu tshia 520 bgbg ne Y.K.Bena Yuda ba kumpala bavua bafume ku bupika, bapingane mu ditunga diabu, biangatshile ku tshidimu tshia 538 bgbg ne Y.K. Bayua ne bua kuasulula nzubu wa Mvidi Mukulu, uvua bena Babilone babutule mu tshidimu tshia 587. Kadi bavua batekete mu maboku lukasa. Ke mudi muambi ubela balombodi ba bantu, bua batungunuke ne mudimu awu. Nanku mu tshidimu tshia 520, bantu kubangulula mudimu awu. Agayi kusonsola bana babu, ubajadikila ne: tudi tushala bapele, mpeta bintu bikese mu madimi etu, bualu katuena tuibakulula nzubu wa Mvidi Mukulu udi munyanguke (1.1-14). Udi ubamanyisha kabidi ne: nzubu mupiamupia neikale ne lumu lupite lua wa kale, uvuabu babutule (2.1-9). Bantu ba Mvidi Mukulu bamane kuasulula nzubu awu, kabakuikala kabidi ne mikiya, nansha ne bupele, bidibu nabi mpindiewu to (2.10-20). Mvidi Mukulu udi ulaya kabidi Zerubabele, mulombodi wa ditunga, wa ku ndelanganyi ya Davide, mudiye ne bua kupeta lumu lunene matuku atshivuavua (2.20-23).Malu abidi avua akolesha bena Izrayele ku muoyi, pavuabu bamane kufuma mu bupika bua mu Babilone: bualu bua kumpala: ditekemena dia kupeta nzubu wa Mvidi Mukulu wa lumu lupite lua wa kumpala; bualu buibidi: diambuluisha dia Mvidi Mukulu divuabu batekemene ku mudimu wa muntu wende, uvuaye mubalaye bua kudisunguila. Nanku Agayi udi usonsola bena Izrayele, bua balekele kutekesha mu maboku, bakuate mudimu ne manza abidi, badilongolole ku malu mapiamapia adi Mvidi Mukulu mubalongoluele.