Estere ngreke F - MUKANDA WA MYIDI MUKULU（TSH96）
1 Mordekayi kuamba ne:— Malu adi menzeka aa, amu Mvidi Mukulu ke udi muenza. 2 Ndi muvuluke tshilota tshimvua mumone pa bualu ebu, ntshimana kukumbana. 3 Meme kumona mpokolu mukese ushala musulu, pashishe bukenka, diba ne mayi mapite bungi. Musulu munene: ke Estere udi mukalenga musela mubanjija bu mukalenga mukaji. 4 Nyoka ya bidika minene ibidi: ke Amane ne meme muine. 5 Bantu, ke aba badi bumvuangana mua kubutula bena Yuda. 6 Bantu bavua bakeba diambuluisha kudi Mvidi Mukulu, yeye kubasungidila ku njiwu, ke bena Izrayele, bena tshisamba tshianyi. Maweja-Nangila Mvidi Mukulu mmutumushe ku makenga onsu avua atutatshisha, mmumpandishe, tuetu bantu bende! Uvua mutuenzele bishima ne malu a kukema bidi kabiyi bienzekela bantu ba bisamba bikuabu. 7 Uvua mudianze kutulongoluela malu mishindu ibidi, bumue budi butangila bantu bende, bukuabu budi butangila bantu ba bisamba bikuabu. 8 Kadi malu abidi aa mmamana kukumbana amu bu muvuawu, pa diba ne tshikondu tshivua Mvidi Mukulu mujadike bua kulumbuluisha bantu bonsu. 9 Nenku, Mvidi Mukulu udi ulama bantu bende, udi wenzela bantu badi bamulamate biakane. 10 Ke padi bantu abu ne bua kuenza tshibilu tshia disanka matuku abidi mu ngondu wa Adare, ke mu matuku dikumi ne anayi ne mu matuku dikumi ne atanu. Badi ne bua kudiungija kumpala kua Mvidi Mukulu bua kusanka. Ndelanganyi yonsu ya mu tshisamba tshia Mvidi Mukulu, neyikale yenza tshibilu etshi mu bikondu bionsu.Miaku ya ndekelu 11 Munkatshi mua tshidimu tshinayi tshia bukalenga bua Ptolemeye ne Kleyopatre, Dosite uvua udiamba mudiye mutuangaji muikale kabidi muena Levi, ne muanende wa balume Ptolemeye kulalabu mukanda ewu uvua ne malu adi atangila bibilu bia Purime. Kujadikabu ne: mukanda ewu mmulelela, Dimuandamuna kudi Lisimake, muana wa Ptolemeye, umue wa ku bantu badi mu Yerushalayime.
