Tite Diumvuija - MUKANDA WA MYIDI MUKULU（TSH96）

Diumvuija— Tite uvua muena Kristu, kayi muena Yuda. Nanku uvua muntu wa mu bisamba bikuabu (Ngal 2.1-3). Uvua umue wa ku balunda ne bambuluishi ba Polu. Uvua wenza muende muonsu bua kupingaja diumvuangana munkatshi mua bena Korente ne Polu (2 Kor 7.6-16). Uvua mupete mukanda ewu, pavuaye mu tshidila tshia Kreta. Polu uvua mumutume muaba awu bua atangile midimu ne bulongolodi bia Tshisumbu tshia bena ditaba bavua mu tshidila atshi (1.5).Mbangilu wa mukanda ewu ntshikepeshilu tshia dilongesha dia Polu (1.1-4). Pashishe mupostolu udi umvuija ngikadilu milenga idi bamfumu ne baludiki ba Tshisumbu tshia bena ditaba ne bua kuikala nayi (1.5-16). Udi umvuija Tite kabidi bidiye ne bua kuenzela bisumbu bishilangane bia bena ditaba: bakulakaje, bakaji bakulumpe (badi ne bua kulongesha bansongakaji), bansonga, ne bapika (2.1-15). Pashishe udi uvuluija bena Kristu mudibu ne bua kusomba panu mu disanka ne bupole, kakuyi diabulukangana (3.1-11). Udi ujikija mukanda ne mibelu ya pa buayi, kabidi ne dimuela muoyi (3.12-15).Mubadi wa mukanda ewu amanye ne: mukanda ewu kawena amu mutumina Tite nkayende to (tudi mua kuamba bualu bua momumue bua mikanda ibidi mitumina Timote). Malu manene adibu batulongeshamu adi atangila Bisumbu bia bena ditaba bia mu bikondu bionsu: mudibu ne bua kulongolola bimpe malu a mu Tshisumbu tshia bena Kristu, kabidi mudi bamfumu ne bena Kristu ne bua kusomba panu mu dinanga ne mu bobumue.