1 Kulondolola 11 - MUKANDA WA MYIDI MUKULU（TSH96）

Badi bajidila Davide, mukalenga wa bena Izrayele(2 Sam 5.1-3)

1Bisamba bionsu bia bena Izrayele, kuya kudi Davide mu Ebrone. Kumuambilabi ne:

— Tudi bena muntu. Tudi bena diku diebe.

2Kadi kale patshivua Shawule mukalenga, ukavua ulombola bena Izrayele mu mvita yabu. Kabidi Maweja-Nangila Mvidi Mukulu webe ukavua mumane kukuambila ne: “Wewe Davide newikale mukalenga wa bantu banyi bena Izrayele. Newikale mfumuabu.”

3Bakulu bonsu ba bena Izrayele kuya kudi mukalenga Davide mu tshimenga tshia Ebrone. Davide kutua nabu ndondu kumpala kua Maweja-Nangila. Bobu kumujidila bua ashale mukalenga wa bena Izrayele, bua kukumbaja diyi dia Maweja-Nangila divua Samuwele muambe.

Davide udi ukuata Yerushalayime(2 Sam 5.6-10)

4Davide ne bena Izrayele bonsu kuya kuluisha bena mu tshimenga tshia Yerushalayime. Bavua batshinyika kabidi dina dia ne: Yebusa, bualu bena Yebusa bavua basa mu buloba abu, ke bavua basomba mu tshimenga atshi.

5Bena Yebusa kuambila Davide ne:

— Kuakubuela mu tshimenga tshietu to! Kadi Davide kukuata nzubu mukolesha ne bimana uvua pa mukuna wa Siyone. Bantu kushisha kuinyika mukuna awu ne: “Tshimenga tshia Davide.”

6Davide kuamba ne: “Muntu wadianza kushipa muena Yebusa, neashale mfumu mulombodi wa bena mvita bonsu.” Nanku Yowabe, muana wa Seruya, kudianza kushipa muena Yebusa. Ke yeye kushala mfumu wa tshiluilu.

7Davide kuya kusomba mu tshimenga tshibaka ne bimana bikolesha. Ke padibu batshinyika ne: “Tshimenga tshia Davide.”

8Pashishe Davide kuibaka nzubu mikuabu ivua nunyungulule muaba uvuabu binyika ne Milo. Kadi, Yowabe uvua ulongolola miaba mikuabu ya mu tshimenga.

9Nanku bukole bua Davide buvua buende buvulangana, bualu Maweja-Nangila wa bena Izrayele uvua nende.

Bena mvita ba Davide(2 Sam 23.8-39)

10Davide uvua ne bena mvita ba bukitu. Bobu pamue ne bena Izrayele, kukokela Davide mukalenga wabu, muvua Maweja-Nangila muambe. Kushalabu bamulamate matuku onsu avuaye mu bukalenga.

11Mena a bena mvita ba Davide bavua ne bukitu avua nenku: Ishebaale, muena Akmoni, uvua mfumu wa “Tshisumbu tshia bena mvita Makumi asatu.” Dituku dikuabu, Ishebaale uvua mushipe bantu nkama isatu mu mvita ne musongolu.

12Elazare, muana wa Dodo, muena Akowa, uvua wa mu “Tshisumbu tshia bena mvita basatu.”

13Elazare uvua pabuipi ne mukalenga Davide mu musoku wa Pase-Damime, tshikondu tshivua bena Peleshete badisanga bua kubaluisha. Bena mvita ba bena Izrayele kunyemabu. Muaba awu muvua budimi bua ntete ya orje.

14Elazare ne bantu bavuaye nabu bavua bela mualu wa mvita munkatshi mua budimi abu. Kutangalajabu bena Peleshete, kubatshimuna. Maweja-Nangila uvua muambuluishe bena Izrayele bua batshimune, badie lumu.

15Dituku dikuabu, pavua bena Peleshete basa mu tshibandabanda tshia bena Refayime, bantu basatu ba mu “Tshisumbu tshia bena mvita Makumi asatu” kuya kudi Davide mu lubuebue luvua pabuipi ne nyongolu wa Adulame.

16Davide uvua musokome mu muaba wende mukole. Kadi mulombodi wa buloba wa bena Peleshete, uvua mu musoku wa Davide wa Betleyeme.

17Davide kumvua nyota, kukonka bantu bende ne:

— Udi mua kumpesha mayi a kunua, a mu tshiina tshia mayi tshidi ku tshiibi tshia mu Betleyeme nnganyi?

18Nanku bena mvita bende basatu, kupitshila munkatshi mua mitanda ya bena Peleshete. Kusunabu mayi mu tshiina atshi. Kuyabu kupa Davide. Kadi, Davide kavua musue kunua mayi awu to. Kuitshikijaye panshi bua kualambula Maweja-Nangila,

19wamba ne:

— Mvidi Mukulu wanyi, meme tshiena mua kunua mayi aa to! Bualu meme munue mayi aa, ndi bu muntu munue mashi a bantu bavua baye kusuna mayi aa, bualu bavua bamba kufua pa kuasuna.

Nanku Davide kubenga bua kunua mayi awu.

Ke muvua bena mvita basatu abu baleja bukitu buabu nanku.

20Abishayi, muanabu ne Yowabe, ke uvua mfumu wa “Tshisumbu tshia bena mvita Makumi asatu.” Abishayi uvua mushipe dituku dimue bantu nkama isatu ne musongolu. Nanku Abishayi kupeta lumu lunene mu “Tshisumbu tshia bena mvita Makumi asatu” atshi.

21Uvua mumanyike bikole munkatshi muabu, mubapite bonsu ku bukitu. Nanku, kushalaye kabidi mfumuabu. Kadi kavua mupite “Tshisumbu tshia bena mvita basatu” to.

22Benaya wa mu tshimenga tshia Kabseyele, muana wa Yoyada, ne muikulu wa muena mvita wa bukitu, uvua muleje bukitu buende misangu ya bungi. Benaya ke uvua mushipe ba Ariyele babidi ba bena Mowabe. Dituku dikuabu, tshikondu tshivua mvula wa neje uloka, Benaya kubuela mu tshiina tshia mayi, bua kushipa nyama wa ntambue uvua mu tshiina amu.

23Benaya kabidi uvua mushipe muena Ejipitu, muntu mule wa kafiondu, muntu wa metre abidi ne tshitupa, uvua ne musongolu munene mufuanangane ne mubambu wa kukuma nawu madiba. Benaya uvua ne mutshi wa patupu. Kubundaye muntu awu mvita, kumunyengaye musongolu wende, kumushipa nawu.

24Ke malu avua Benaya muenze, mamupeteshishe lumu munkatshi mua tshisumbu tshia bena mvita ba bukitu makumi asatu.

25Benaya uvua mumanyike bikole munkatshi mua tshisumbu tshia bena mvita Makumi asatu. Kadi kavua mupite “Tshisumbu tshia bena mvita basatu” to. Davide kumuteka mulombodi wa bena mvita bavua ne bua kulama mukalenga.

26Mena a bakuabu bena mvita avua nenku: Ashayele muanabu ne Yowabe, Elanane muana wa Dodo wa mu musoku wa Betleyeme,

27Shamote wa mu tshimenga tshia Arore, Elese muena mu tshimenga tshia Palone,

28Ira muana wa Ikeshe muena mu Tekowa, Abiyezere wa mu tshimenga tshia Anatote.

29Sibkayi wa mu tshimenga tshia Usha, Ilayi wa mu tshimenga tshia Akowa,

30Marayi wa mu tshimenga tshia Netofa, Elede muana wa Baana wa mu Netofa,

31Itayi muana wa Ribayi wa mu tshimenga tshia Ngibeya mu buloba bua Binyamine, Benaya wa mu tshimenga tshia Piratone,

32Urayi wa ku misulu ya mu Ngaashe, Abiyele wa mu tshimenga tshia Bete-Araba,

33Azmavete wa mu tshimenga tshia Bakurime, Eliyaba wa mu tshimenga tshia Shaalbone,

34bana ba balume ba Asheme muena mu Ngizone, Yonatane muana wa Shage muena mu Arare,

35Akiyame, muana wa Sakare, muena mu Arare, Elifale muana wa Ure,

36Efere muena mu Mekere, Akiya muena mu Palone,

37Esro muena mu Karmele, Naarayi muana wa Ezbayi,

38Yowele muanabu ne Natane, Mibare muana wa muena Agri,

39Seleke muena Amone, Narayi muena mu Beyerote, muambudi wa bia mvita bia Yowabe, muana wa Seruya,

40Ira wa mu diku dia Yetere, Ngarebe wa mu diku diabu,

41Uriya muena Iti, Zabade muana wa Alayi,

42Adina muana wa Shiza, wa mu bamfumu ba tshisamba tshia Rubene, uvua ne bena mvita makumi asatu,

43Anane muana wa Maaka, Yosafate wa mu Metene,

44Uziya wa mu Ashetarote, Shama ne Yeyele bana ba balume ba Otame wa mu Aroyere.

45Yediyayele, muana wa Shimri, ne Yoka wabu wa mu Tise.

46Eliyele wa mu Makaya, Yeribayi ne Yoshavya bana ba balume ba Elname, Itma wa mu ditunga dia Mowabe,

47kabidi ne Eliyele, Obede ne Yashiyele ba mu Soba.