1Nuenu bakalenga, telejayi numvue. Nuikale bateya ntema, banulongeshe nuenu badi ne bumfumu munkatshi mua bantu.
2Teyayi matshi, nuenu balombodi ba bantu badi ne disanka dia bisamba bia bantu binudi nukuba, kabidi nuenu badi badisua bua bungi bua matunga anudi nawu.
3Numanye ne: nudi bapete kudi Maweja-Nangila, Mvidi Mukulu Muena Kulu bumfitmu ne bukalenga. Yeye ke wakakenketa ngenzelu yenu, kabidi neamone majinga enu.
4Nansha nuenu nukuatshile bukalenga buende mudimu ne bukole. Panuikala kanuyi nulumbuluisha mu buakane, kanuyi nulama mikenji, kanuyi nulonda mudi Mvidi Mukulu musue,
5nenupete diakamue dinyoka dikole lukasa luonsu, bualu bonsu badi ne mianzu nebabalumbuluishe ne disu dikole.
6Mvidi Mukulu neafuile bantu bapuekele luse, neabalekele mibi yabu, kadi ngenzelu ya bantu baneme, nebayitangile ne disu dikole.
7Maweja-Nangila, Mfumu wa bantu bonsu, nealumbuluishe muntu yonsu, kena ulekela muntu nansha yeye ne mianzu. Yeye ke wakabika baneme ne bakese, udi ubalama bonsu mushindu umue.
8Kadi neakenkete bikole nsombelu wa badi ne mianzu.
9Nuenu bamfumu, ke bandi ngambila, bua nuikale bamanye mudi meji, kanuyi mua kupambuka.
10Badi balonda mikenji ya tshijila bu mudiyi, nebikale bantu ba tshijila. Badi balonga mudiyi yamba, nebadipandishe dituku dia tshilumbuluilu.
11Nenku, telejayi miaku yanyi ne ntema, nuyilonge ne disanka, nenuikale bantu ba bushuwa.
Mbipepele bua kupeta Meji12Meji adi abalakana kule, kaena abuitshidila to. Badi baananga badi baamona lukasa. Badi baakeba badi baapeta kabidi.
13Badi baajinga, wowu adi adianza kudileja kudibu.
14Muntu udi ujuka mu dinda bua kuapeta, kakuikala ne lutatu, neaasangane mamuindile kumbelu.
15Udi uditatshisha bua kuapeta, udi ushala muntu wa lungenyi, udi ulonga bua kumanya mudiwu, kakuikala ne ntatu to.
16Bualu wowu mine adi akeba badi baakanyine. Adi aya kudibu ne disanka, kabidi adileja mu meji onsu adibu beela.
17Meji adi atuadija munda mua muntu diba didiye ne dijinga dia kulonga mudiwu.
18Kujinga mua kulonga mudi meji nkuananga. Kunanga meji nkulama mikenji yawu, kulama mikenji ya meji nkuepela bubi!
19Kuepela bubi, kudi kutusemeja pabuipi ne Mvidi Mukulu.
20Badi bajinga Meji, badi bashala bakalenga ba bushuwa.
21Nuenu balombodi ba bantu, panuikala nujinga kushala mu nkuasa wa bumfumu, nemekayi mudi Meji anuambila, nenudie bumfumu kashidi.
Mufundi udi umvuija mudi Meji22Ndi musue kumvuija tshidi Meji, mudiwu mapatuka. Tshiakunusokoka bualu nansha bumue. Kadi nendeje mudi Meji matuadija. Neanumanyishe patoke mushindu udiwu, tshia kulekela kalu nansha kamue ka ku malu a bulelela.
23Tshiena musue kuikala ne muoyi mubi wa kulama bindi mumanye. Bualu dijinga dia mushindu ewu kadiena diumvuangana ne Meji to.
24Buloba nebulengele pikala bena meji bavule, bualu mukalenga wa lungenyi udi mua kulama bantu bende bimpe.
25Nenku anyishayi mibelu indi nnupa eyi, neinulengelele.
Who We AreWhat We EelieveWhat We Do
2025 by iamachristian.org,Inc All rights reserved.
