1 Bakalenga Diumvuija - MUKANDA WA MYIDI MUKULU（TSH96）

Diumvuija— Ku ntuadijilu, mikanda ibidi ya bakalenga ivua mukanda umuepele. Bavua bafundamu malu avua menzeka kunyima kua malu adi mikanda ya Samuwele itulondela. Mu ditapulula dia mpindiewu, mukanda wa kumpala wa bakalenga udi utulondela malu a mu bukalenga bua Shelomu, muana wa Davide, ne malu a bakalenga ba kumpala bavua bamupingana mu nkuasa.Davide mumane kukulakaja, katshiyi ne bukole bua kulongolola bimpe malu a mu bukalenga buende, ke bana bende ba balume babidi kuenza muabu muonsu bua kusonsola bantu, ewu ne: nunsungule meme, mpingane tatu mu nkuasa wa bumfumu, wawa ne: to, nunsungule anu meme (1.1—2.12). Kadi Shelomu kudia bukalenga. Bukalenga buende mbutambe kumanyika, bualu Shelomu ke uvua muashishe nzubu wa Mvidi Mukulu ne nzubu wa Bukalenga. Kadi ku ndekelu kua matuku ende a panu, Shelomu kuela Mvidi Mukulu nyima, kutendelela mvidie ya bisamba bikuabu (2.13—11.43). Ke Mvidi Mukulu kuanyisha bua bukalenga buende buabuluke: bisamba bia ku mutu kua ditunga kubenga bukalenga bua muana wa Shelomu, kudisunguila wabi mukalenga (12.1—14.20). Nanku bituadija ku diba adi, bidimu bu nkama ibidi bilondangane, mu ditunga kushalamu makalenga abidi, bua Yuda ne bua Izrayele. Padi mvita imueneka, pamue apa, adi ambuluishangana mu mvita ayi, pamue apa, aluishangana wowu mene nkayawu (14.21—22.53).Mukanda ewu udi utuleja patoke mudi mukalenga wa ditunga ne bua kuikala muntu wa Mvidi Mukulu. Padiye unemeka Mvidi Mukulu, udi uyisha ditunga kumpala. Padiye wela Mvidi Mukulu nyima, utendelela mvidie mikuabu, udi ufikisha ditunga ku kabutu. Misangu ne misangu, bambi badi bajuka munkatshi mua bantu bua kuvuluija bakalenga bidi Mvidi Mukulu musue. Mukulu wa bambi ke Eliya (tshit. 17 too ne ku tshit. 19; 21).