2 Kulondolola 20 - MUKANDA WA MYIDI MUKULU（TSH96）

Badi baluisha bukalenga bua bena Yuda. Yosafate udi utendelela Maweja-Nangila

1Pashishe, bena Mowabe ne bena Amone kudisangisha ne bena Meyuni, buakuluisha Yosafate.

2Bantu kufika, bua kumanyisha mukalenga Yosafate ne:

— Bena mvita bapite bungi mbafike bua kukuluisha. Bena mvita aba mbafumine dishiya dia Mayi manene a luepu, ku ditunga dia bena Edome. Mpindiewu mbasombele mu Ashashone-Tamare, mmomumue ne: mu Ene-Ngedi.

3Yosafate kumvua bowa, ujinga kukonka Maweja-Nangila. Kuambilaye bena Yuda bonsu bua bajile biakudia.

4Bena Yuda ba mu bimenga bionsu bia mu ditunga, kufika mu Yerushalayime, bua kulomba diambuluisha kudi Maweja-Nangila.

5Yosafate kuimana munkatshi mua bena Yerushalayime, ne bena Yuda bakuabu bonsu. Kutangilaye ku lubanza lupialupia lua nzubu wa Mvidi Mukulu.

6Kutendelelaye, wamba ne:

— Maweja-Nangila, Mvidi Mukulu wa bankambua betu, wewe udi musombe mu diulu. Bisamba bionsu bidi ku bumfumu buebe! Wewe udi ne bukole buonsu, kabidi ne bumfumu. Nanku, kakuena muntu udi mua kutua nkanana kumpala kuebe.

7Wewe Mvidi Mukulu wetu ke uvua muipate bena ditunga edi pafiki bantu bebe bena Izrayele. Buloba ebu, kuena mubupeshe ndelanganyi ya mulunda webe Abrahame kashidi anyi?

8Ndelanganyi ayi kusombamu, kukuashila muaba wa tshijila bua kuntendelelamu. Pashishe kuambabu ne:

9“Padi dikenga ditukuata, nansha tshipupu, mvita, disama dikole dia tshiambu, nansha tshiyole tshia nzala, netufike anu ku muaba wa tshijila eku, — kuudi wewe, bualu udi musombeku. — Nenumbikile mu dikenga dietu, bua wewe kunteleja, kutuambuluisha.”

10Nanku mpindiewu, tangila bena Amone, bena Mowabe, ne bena Edome, badi batuluisha. Pavua bankambua betu bapatuke mu Ejipitu, uvua mubakandike bua kabafiki mu buloba bua bantu aba to. Bankambua betu bayile njila mukuabu. Kabavua bababutula to.

11Kadi bobu badi batupingajila bibi lelu, batuipata mu buloba buuvua mutupeshe!

12Maweja-Nangila Mvidi Mukulu wetu, kuena mua kubanyoka anyi? Katuena ne bukole bua kuluangana ne bena mvita aba bungi nenku, badi bavua kutuluisha. Tudi bapange tshia kuenza. Ke patudi batangile kuudi, tukusengelela.

13Bena Yuda bonsu, bakaji kabidi ne bana, bavua bimane kulu kumpala kua muaba wa tshijila.

Maweja-Nangila udi wambuluisha bena Yuda bua batshimune

14Munkatshi mua tshisangilu, Mueyelu wa Maweja-Nangila kutulukila Yaziyele, muena Levi, muana wa Zekarya, muikale kabidi muikulu wa Benaya. Benaya uvua muana wa Yeyele, ne muikulu wa Mataniya, ndelanganyi ya Ashafe.

15Yaziyele kuela diyi ne:

— Telejayi bimpe, nuenu bonsu badi basombe mu Yerushalayime, kabidi nuenu bena Yuda, ne nangananga wewe Yosafate. Maweja-Nangila udi unuambila ne: “Kanutshinyi, kanupampakanyi, bua bungi bua bena mvita aba. Mvita eyi ki nyenu to, kadi idi yanyi meme Maweja-Nangila.

16Malaba nenupueke, nuye kudi baluishi benu badi banu-vuila ku luseke lua njila wa bilongu. Nenupetangane nabu ku ndekelu wa lubuwa ludi lutangilangane ne tshipela tshia Yeruwele!

17Kanuakuikala ne tshilumbu tshia kubaluisha muaba awu to. Nuenu bena Yerushalayime ne bena Yuda, nuimane amu muaba awu, numone mundi nnupikula. Kanutshinyi, kanupampakanyi. Malaba nuye kudibu. Nengikale nenu.”

18Yosafate kudiela panshi kumpala kua Maweja-Nangila. Bena Yuda bonsu, ne bena Yerushalayime kabidi, kudiela panshi bua kutendelela Maweja-Nangila.

19Pashishe bena Levi ba mu tshiota tshia Kekate ne tshia Kora kujuka, kutumbisha Maweja-Nangila Mvidi Mukulu wa Izrayele ne diyi dikole.

20Patshiatshia kuyabu bonsu mu tshipela tshia Tekowa. Pa kuyabu, Yosafate kubambila ne:

— Bena Yerushalayime, bena Yuda, ntelejayi! Tekemenayi kudi Maweja-Nangila Mvidi Mukulu wenu. Nenupete bukole. Tekemenayi kudi bambi bende. Nenutshimune mvita!

21Yosafate kumyuangana ne bantu, kuteka bena misambu kumpala kua bena mvita. Bena misambu bavua bavuale bilamba bia tshijila, batumbisha Maweja-Nangila, bamba ne: “Tumbishayi Maweja-Nangila, bualu dinanga diende ndia kashidi!”

22Pavuabu batuma musambu wa kutumbisha Mvidi Mukulu, Maweja-Nangila kubueja tshimvundu munkatshi mua bena Amone, bena Mowabe, ne bena Edome, bavua bafike bua kuluisha bena Yuda. Nanku bena lukinu babu kuluishangana nkayabu.

23Bena Amone ne bena Mowabe kutuadija kuluisha bena Edome, kubashipa bonsu. Pashishe bena Amone ne bena Mowabe kushipangana nkayabu.

24Bena Yuda kuya muaba uvuabu mua kumona tshipela. Kukebabu muaba uvua baluishi babu. Kumonabu anu bitalu nkayabi bilale panshi. Kakuvua muntu nansha umue uvua munyeme.

25Yosafate ne bantu bende kutuadija kupawula bintu bivua muaba uvua bitalu abi. Kusanganabu nyama ya bungi, bintu bia bubanji, bilamba, ne bintu bikuabu bia mushinga mukole. Bavua banenga matuku asatu bua kuambula bintu abi, bualu bivua bipite bungi. Kadi kabavua mua kuambula bionsu to.

26Dituku dinayi, kusangilabu mu tshibandabanda tshia Beraka. — Muaba awu, batshidi bawinyika dina edi too ne lelu, bualu mmuaba uvuabu belela Maweja-Nangila tuasakidilae. —

27Bantu bonsu ba mu Yerushalayime, ne bena Yuda bakuabu, pamue ne Yosafate uvua ubalombola, kupinganabu mu Yerushalayime ne disanka. Maweja-Nangila uvua mubasankishe, bualu uvua mubapandishe mu bianza bia baluishi babu.

28Kubuelabu mu Yerushalayime, benda bimba lunzenze, tshisanji ne mpungi, batangile ku nzubu wa Maweja-Nangila.

29Bakalenga ba bisamba bikuabu bamane kumvua ne: Maweja-Nangila Mvidi Mukulu mmutshimune baluishi ba bena Izrayele, kumutshinabu.

30Nanku bukalenga bua Yosafate kushala mu ditalala, bualu Mvidi Mukulu wende uvua mumupeshe bupole nseke yonsu ya mu ditunga diende.

Ndekelu wa bukalenga bua Yosafate(1 Bak 22.41-51)

31Yosafate uvua mubuele mu bukalenga bua bena Yuda muikale ne bidimu makumi asatu ne bitanu. Uvua mushale mukalenga mu Yerushalayime bidimu makumi abidi ne bitanu. Mamuende wa Yosafate uvua Azuba, muana wa Shili.

32Yosafate uvua muenze malu mimpe, ulonda tshilejilu tshia tatuende Asa, usankisha Maweja-Nangila.

33Kadi kavua mukandike miaba ivua bantu baya kutendelela mvidie. Nanku bantu kabavua bitabe Mvidi Mukulu wa bankambua babu muabu muonsu to.

34Malu onsu makuabu a Yosafate, mbaafunde mu: Mukanda wa Malu a Yeku, muana wa Anani. Mukanda ewu bavua baubueja mu mukanda wa bakalenga ba bena Izrayele.

35Kadi Yosafate, mukalenga wa bena Yuda, uvua mudisangishe kabidi ne Akaziya, mukalenga wa bena Izrayele, muntu wa nsombelu mubi.

36Kumwanganabu bua kuenza matu manene adi mua kuya miaba mile. Bavua benzela matu awu mu tshisabu tshia Eshiyone-Ngebere.

37Kadi muambi Eliyezere, muana wa Dodava, wa mu tshimenga tshia Maresha, uvua muambile Yosafate ne:

— Bu muudi mumvuangane ne Akiziya, Maweja-Nangila neabutule matu audi muenzeje.

Bushuwa, majuwa kaakaya kule to. Kudinawu mu mayi.