Sira 2 - MUKANDA WA MYIDI MUKULU（TSH96）

Tukuatshile Maweja-Nangila mudimu, tutekemene kudiye

1Muananyi, pawikala ukeba kukuatshila

Meweja-Nangila mudimu,

udianze kudilongolola padibu bakuteta.

2Ukoleshe muoyi, ujadike malu.

Kupamakanyi diba didi dikenga dikukuata.

3Ulamate Mvidi Mukulu, kumulekeledi nansha.

Neutshimune pawikila pa kufua.

4Anyisha bionsu bidi bikuenzekela.

Ulame lutulu nansha bantu bakudiwula.

5Bantu badi bamanya tshiamu mpawungi,

padibu batshiteka mu kapia.

Badi Mvidi Mukulu mutokele munda

badi babamanyina padibu babakengesha.

6Paudi utekemena kudi Mvidi Mukulu

yeye udi ubambuluisha.

Londa njila wa buakane, utekeme kudiye.

7Nuenu badi batshina Maweja-Nangila,

tekemenayi luse luende.

Kanumubengi bua kunuyi kubuela mu bubi.

8Nuenu bantu badi batshina Maweja-Nangila,

tekemenayi kudiye.

Kanuena nupanga dienu difutu.

9Nuenu bantu badi batshina Maweja-Nangila,

tekemenayi diakalenga kudiye,

disanka dia kashidi ne luse luende.

10Tangila bantu bavua badianjidile kumpala kuenu:

Mvidi Mukulu ukadi mufuishe muntu uvua mutekemene kudiye bundu anyi?

Mvidi Mukulu ukadiku utulekele muntu

uvua umutshina muende muonsu anyi?

Mvidi Mukulu ukadiku mulengulule muntu uvua umutendelela anyi?

Mvidi Mukulu ukadi mubenge kuteleja bantu badi bamulomba diambuluisha anyi?

11Bualu Maweja-Nangila, muena luse ne dinanga,

udi ubafuila luse bua malu mabi abu,

udi ubapandisha padibu mu dikenga.

12Bantu badi kabayi ne dikanda, kabayi ne muoyi mukole,

mbena diakabi.

Bantu badi ne mioyi ibidi,

mbena diakabi.

13Muntu udi utekesha mu maboku kayi utekemena kudi Maweja-Nangila,

mmuena diakabi!

Maweja-Nangila kena umulama to.

14Nuenu bantu badi kabayi bananukila, nudi bena diakabi!

Panukonka Maweja-Nangila nenuenze tshinyi?

15Bantu badi batshina Maweja-Nangila badi bumvua diyi diende.

Badi bamunanga badi benza bidiye musue.

16Bantu badi batshina Maweja-Nangila badi bamusankisha,

badi bamunanga badi balama meyi ende.

17Bantu badi batshina Maweja-Nangila badi badilongolola

diba dionsu bua kumuenzela mudimu.

Badi badipuekesha kumpala kuende, bamba ne:

18“Tudi basue kuditeka mu bianza bia Maweja-Nangila,

pa mutu pa kuditeka mu bianza bia bantu.

Bualu mudi bunene bua Maweja-Nangila,

ke mudi bunene bua luse luende!”