Tobite 10 - MUKANDA WA MYIDI MUKULU（TSH96）

Tobite ne Ana badi ne dipampakana

1Kadi Tobite, uvua ubadika ku dituku ku dituku, bungi bua matuku adi muntu wende mua kufika ku Raguyese ne adiye mua kupingana. Padi matuku awu apita, muana kavua muanji kupingana nansha.

2Tobite, kuela meji ne: “Bumue, badi mua kuikala banji kuindija muana kudiye muye anyi? Ngabayele mmumane kufua, muntu udi mua kupingaja makuta kenaku anyi?”

3Ke kutuadijabu kupampakana bikole.

4Pashishe mukajende Ana kuela kasala ne:

— Muananyi mmumane kufua! Katuena mua kumonangana nende ne muoyi.

Uvua udila, utendakana wamba ne:

5— Ndi muena diakabi pambakulekedi uya muananyi, wewe uvua unsankisha!

6Kadi Tobite kuandamuna mukajende ne:

— Kuena mua kuakula bia nanku to, mukajanyi musuibue. Muana udi bimpe. Kudi bualu kampanda buvuabu kabayi batekemena, bumue ke budi buanji kubajingakaja, bualu muntu udibu baye nende, mmuanetu, muntu mumanyike. Kusumpakanyi kabidi bualu bua muanebe to, muena kuanyi, bualu ukadi pa kufika.

7Ana kuandamuna ne:

— Kuena mua kumbela to, lekela kunshima. Muananyi mmumane kufua.

Nenku dituku dionsu uvua umuka ku nzubu lukasa, uya kutangila amu ku njila uvua muanende muyile. Bualu kavua musue kuteleja kabidi muntu to. Pavua butuku buila, uvua ubuela mu nzubu bua kudila amu kudila butuku bujima, kayi ulala tulu.

Tobiyase udi ujinga kupingana kudi tatuende

8Matuku dikumi ne anayi mamane kupita, avua Raguwele mutshidipe bua kuenza tshibilu tshia dibaka dia muanende wa bakaji, Tobiyase kuambila tatuende muenu ne:

— Ndekele mpingana kuetu. Ndi nujadika ne: tatu ne mamu badi bela meji ne kabena kabidi mua kumonangana nanyi to. Ndi nkusengelela, undekele mpingana kudi tatuanyi. Mvua mukumvuije muvua mushindu wa nsombelu umvua mushiye nende tatu diba dimvua mumbuke kuetu.

9Kadi Raguwele uvua wandamuna amu Tobiyase ne:

— Anji kuikala kuanyi, muananyi. Ndi ntumina tatuebe bantu bua bamuambile malu ebe.

Tobiyase kubenga ne:

— Too, ndi nkusengelela, undekele mpingana bua kumonangana ne tatu.

10Pashishe Raguwele kufila Sara kudi Tobiyase, kumupayisha ne bintu biende: bapika balume ne bapika bakaji, ngombe ne mikoku, mpunde ne tumelu, bilamba, nkanu ya biamu bitoke ne malonga.

11Raguwele kubatuma ne disanka, kulayangana ne Tobiyase, wamba ne:

— Muananyi, ndi nkujingila luendu luimpe ne bukole bua mubidi. Maweja-Nangila muena kulu anulombole ne muena kuebe Sara! Ndi njinga kumona benu bana tshiyi muanji kufua.

12Kuambilaye muanende Sara ne:

— Uye kudi tatuebe muenu. Bituadija ku mpindiewu, baledi ba bayebe badi bu baledi bebe menemene. Uye mu ditalala muananyi. Ndi musue kumvua mudibu bakutua makumbu kudi bantu pantshidi ne muoyi apa.

Pashishe kulayanganaye nabu, kuyabu.

13Kadi Edna kuambila Tobiyase ne:

— Muananyi musuibue, Maweja-Nangila akupingaje kuenu bilenga. Ampeshe matuku mavule bua meme kumona bana banudi nulela ne mukajebe Sara bangabanga ne meme kufua. Maweja-Nangila mmujadika ne: Ndi mufile muananyi kuudi bua muulame bimpe. Kumukengeshi to. Muananyi wa balume, waya bimpe! Bituadija ku lelu ungangate bu mamuebe, kabidi Sara ikale bumuanenu wa bakaji, bua mikale ne diakalenga dia momumue bonsu mu matuku onsu atu tshidi ne muoyi!

Pashishe, Edna kubela bonsu babidi mu tshitupa, kulayangana nabu ne disanka.

14Pashishe, Tobiyase kumuka kua Raguwele kumushiya ne disanka ne musangelu, wenda wela Maweja-Nangila mfumu wa diulu ne buloba, mukalenga wa bukwa panu, tuasakidiba bua pavuaye mumuambuluishe mu luendu luende. Raguwele kumubela wamba ne:

— Maweja-Nangila akututshishe dikasa dimpe, bua umone mua kunemeka baledi bebe matuku onsu autshidi panu!