Rome Diumvuija - MUKANDA WA MYIDI MUKULU（TSH96）

Diumvuija— Bidimu bikese kunyima kua lufu ne dibiika bia Yezu Kristu, bena Yuda bakuabu, bavua bamane kubuela mu Tshisumbu tshia bena ditaba, bu Akuila ne Priskila (tangila MM 18.2), bakavua batuadija kutangalaja Lumu lua Disanka too ne mu Rome, tshimenga tshikulu tshia bukalenga bua makalenga. Nanku Tshisumbu tshia kumpala tshia bena ditaba tshikavua ku Rome, diba ditshivua Polu ulongesha mu Siriya, mu Aziya Mukese (ke tshitupa tshia Turkiya tshidi mu Aziya), ne mu ditunga dia bena Ngreke. Mvidi Mukulu uvua mutume Polu “too ne ku ndekelu wa buloba”. Ke muvua Polu ne dijinga dia kuya ku Rome, kutungunuka ne luendu too ne ku ditunga dia Espanye. Kadi katuena bajadike mudiye mufike ne ku Espanye nansha. Bua kulongolola luendu luende, uvua wanji kutumina “nuenu bonsu badi mu Rome” (1.7) mukanda. Ke bena Kristu bavua basombe mu tshimenga atshi. Bamue ba kudibu bavua ne tshibidilu tshia kusangila kua Priskila ne Akuila (tangila 16.3-5).Mu mukanda ewu Polu udi umvuija bena ditaba ba mu Rome mudimu udiye nawu pambidi pa bantu badi kabayi bena Yuda. Ke mukanda udi umvuija bimpe bitambe malu manene onsu avua Polu mulongeshe. Yeye mene udi umvuija dilongesha diende mu tshikosu: Lumu lua Disanka ke bukole budi Mvidi Mukulu usungidila nabu bonsu badi bitaba, kutuadijia ne bena Yuda, pashishe ne bantu ba bisamba bikuabu kabidi (1.16). Diumvuangana munkatshi mua bisumbu bibidi bia bena ditaba abi divua bualu bukole mu tshikondu atshi. Lukonku lukole luvua nangananga lua ne: bantu ba bisamba bikuabu, padibu babuela mu Tshisumbu tshia bena ditaba, badi ne bua kulama kabidi mikenji ya Moshe, ya bena Yuda anyi? Polu udi umvuija meji adiye nawu pa tshilumbu atshi mu mikanda mikuabu kabidi, nangananga mu mukanda mutumina bena Ngalate. Mu mukanda mutumina bena Rome ewu Polu udi ujadika musangu umue ne: Lumu lua Disanka lundi ndongesha ndua bantu bonsu (1.16). Pashishe udi umvuija mudi Mvidi Mukulu usungidila muntu yonsu udi mujimine, padiye utekemena kudiye (1.18—8.39).Pashishe udi umvuija tshilumbu tshia bamue bena Izrayele batshidi babenga kuitaba Kristu. Udi wamba ne: dibenga diabu kadiena mua kujikila bidi Mvidi Mukulu musue kukumbaja njila nansha. Bualu dinanga didi Mvidi Mukulu utunanga nadi neditshimune bionsu (bit. 9-11). Luse ludi Mvidi Mukulu uleja mpindiewu bantu badi kabayi bena Yuda, ludi ne bua kubavuluija mudi Mvidi Mukulu ubabikila bonsu ku nsombelu mupiamupia (12.1—15.13).Ku ndekelu kua mukanda wende, Polu udi umanyisha dijinga diende dia kuya ku Rome. Udi wela kabidi bantu ba bungi muoyi (15.14—16.27).Bonsu badi bakeba kumanya meji adi Mvidi Mukulu nawu a kusungidila bantu kudi Yezu Kristu, badi ne bua kubala mukanda ewu. Nebakatshile bunene ne buimpe bua meji adi Mvidi Mukulu nawu (11.33-36). Nebikale kabidi ne dijinga dia kutendelela Mvidi Mukulu muabu muonsu mu bulelela, pa kukumbaja bidiye musue.