Rome 1 - MUKANDA WA MYIDI MUKULU（TSH96）

Diela dia muoyi

1Meme Polu, muena mudimu wa Yezu Kristu, udi Mvidi Mukulu mubikile bua ngikale mupostolu, udiye musungule bua mmanyishe bantu Lumu luende lua Disanka, ndi nnutumina mukanda ewu.

2Mvidi Mukulu uvua mumane kutulaya Lumu lua Disanka elu ku kale mukana mua bambi bende. Bavua balufunde mu Mikanda ya tshijila.

3Uvua mulukumbaje kudi Muanende Mfumu wetu Yezu Kristu, uvuabu balele ne mubidi wa muntu mu diku dia mukalenga Davide;

4kadi ku bukole bua Mueyelu wa Tshijila uvua umueneka Muana wa butumbi wa Mvidi Mukulu, pavuabu bamubisha ku lufu.

5Kudiye ke kudi Mvidi Mukulu mumpeshe dipa dia kuikala mupostolu, bua meme kusaka bantu ba bisamba bionsu, bua bitabe Lumu lua Disanka, batumikile Mvidi Mukulu, bua dina dia Yezu dipete lumu.

6Nuenu kabidi nudi bamue ba ku bantu abu. Mvidi Mukulu mmunubikile bua nuikale bantu ba Yezu Kristu.

7Nuenu bonsu badi mu Rome, badi Mvidi Mukulu unanga, badiye mubikile bua nuikale bende ba tshijila, ndi nnutumina mukanda ewu. Dinanga ne bupole bia kudi Mvidi Mukulu Tatu wetu, ne bia kudi Mfumu Yezu Kristu, bishindame munda muenu.

Polu udi ujinga kumonangana ne bena ditaba ba mu Rome

8Bangabanga ndi ngela Mvidi Mukulu tuasakidila, mu dina dia Yezu Kristu, bualu buenu bonsu. Bualu mu buloba bujima badi bayukila bua ditaba dienu.

9Mvidi Mukulu undi nkuatshila mudimu ne muoyi wanyi onsu, bualu ndi ndongesha Lumu lua Disanka lua Muanende, mmumanye ne: bualu bundi ngamba mbulelela. Udi mumanye kabidi mundi nnuvuluka diba dionsu,

10misangu yonsu indi ntendelela. Ndi ndomba kudi Mvidi Mukulu, pikalaye musue, bua ampeteshe mushindu wa meme kufika kuenu.

11Bualu ndi njinga bikole kunumona, bua kunutuadila mapa makuabu a Mueyelu wa Tshijila adi mua kunukolesha mu ditaba.

12Ndi ngamba ne: ndi njinga kuikala munkatshi muenu, bua tukoleshangane ku muoyi mu ditaba, meme nkolesha ditaba dienu, nuenu nukolesha dianyi.

13Bana hetu, ndi musue mmanye ne: mvua mujadike misangu ne misangu bua kufika kuenu aku. Kadi too ne lelu bavua amu bampumbishe. Mvua mujinge bua mudimu undi nkuata upete tshipeta ne kuenu kabidi, bu mudiwu wenda udiunda mu matunga makuabu a pa buloba.

14Bualu ndi muena dibanza kudi bantu bonsu, kudi badi bashidimuke ne badi kabayi bashidimuke, kudi bavua balonge ne bavua kabayi balonge.

15Ke pandi njinga kunutuadila nuenu kabidi badi basomba mu Rome Lumu lua Disanka.

Lumu lua Disanka ludi ne bukole

16Nanku tshiena ne bowa pandi ndongesha Lumu lua Disanka. Bualu ludi bukole budi Mvidi Mukulu ukuata nabu mudimu, bua kusungidila bantu bonsu badi bitaba, kutuadija ne bena Yuda, pashishe ne bantu ba bisamba bikuabu.

17Bualu Lumu lua Disanka ludi luleja mudi Mvidi Mukulu ubingisha bantu ku mesu kuende, amu bua ditaba nkayadi. Biangatshile ku ntuadijilu too ne ku ndekelu njila wa kulonda udi amu wa ditaba. Bualu Mukanda wa tshijila udi wamba ne: “Udi ubinga ku mesu kua Mvidi Mukulu bua ditaba, neikale ne muoyi.”

Bantu badi bena tshibawu

18Bualu Mvidi Mukulu udi ufikila munda mu diulu, bua bubi buonsu ne malu mabi onsu, bidi bantu benza ku buenzavi buabu, bakandika bulelela bua kabukuatshi mudimu pa wowu.

19Mvidi Mukulu udi ubanyoka, bualu bia Mvidi Mukulu bidi bantu mua kumanya bidi bimueneka ku mesu kuabu. Mvidi Mukulu nkayende mmubalejebi patoke.

20Bualu katshia Mvidi Mukulu ufuka buloba, bilenga biende bidi kabiyi bimueneka ku mesu, — nkuamba ne: bukole buende bua tshiendelele, ne bu-Mvidi Mukulu buende, — bidi bimueneka mu midimu ivuaye muenze. Ke muaba udi bantu mua kubimanya. Nanku badi bapila ku mesu kuende.

21Bualu badi bamanye Mvidi Mukulu, kadi kabena bamunemeka. Kabena bamuela tuasakidila mudibu ne bua kuela Mvidi Mukulu nansha. Kadi meji abu adi matatakana. Mioyi yabu ya bupote idi miwule tente ne miidima.

22Badi baditemba ne: tudi bena meji, kadi badi bantu bapale.

23Pa mutu pa kukukuila Mvidi Mukulu wa butumbi udi kayi ufua, badi batendelela mpingu ya bantu badi bafua, ya nyunyi, ya nyama ya bidimba binayi, ne ya bilandadi.

24Ke pavua Mvidi Mukulu mubafile ku nkuka idi mu mioyi yabu, bua kuenzabu malu a bundu, babuelelangana mu nzubu.

25Badi bumusha bulelela budi butangila Mvidi Mukulu, bapingaja dishima. Badi batendelela bintu bidi Mvidi Mukulu mufuke, babikuatshila mudimu, pa mutu pa kutendelela Mubifuki, kumuenzela Yeye nkayende mudimu. Yeye mene atumbe kashidi! Amene.

26Ke pavua Mvidi Mukulu mubafde ku bijingajinga bia bundu. Bakaji babu mene badi balekela bulongolodi bua Mvidi Mukulu, bua kubuelelangana mu nzubu.

27Momumue kabidi balume badi babenga kubuelela bakaji babu mu nzubu. Mioyi idi ibajukuka kapia bua kusaminanganabu muoyi. Balume nkayabu badi benzelangana malu a bundu. Ke mudibu bapeta bobu nkayabu dinyoka dikumbanyina bubi buabu.

28Bu muyuabu babenga kumanya Mvidi Mukulu, Mvidi Mukulu mmubafile ku butshimbakane, bua kuenzabu bivuabu kabayi mua kuenza.

29Badi buwule tente ne malu mabi a mishindu yonsu: bubi, lukuka, tshikisu; badi ne lubabu munda tente, bashipangana, batandangana; bikale kabidi ne budimu, kabidi ne bibidilu bibi. Badi bena lubuakabuaka,

30bajanangana; badi bakina Mvidi Mukulu, baleja dikamakama, baditambisha, baditemba. Badi bela meji ku malu mabi mapiamapia adibu mua kuenza. Badi batombokela baledi babu.

31Kondu kabu ka munda kakena kabapisha ku bualu nansha bumue. Kabena bakumbaja bidibu balaya. Badi ne muoyi mupape, kabayi bafuila bantu luse.

32Badi bamanye bimpe tshilumbuluilu tshia Mvidi Mukulu, bamanye mudi bantu badi benza malu a mushindu ewu bakumbanyina lufu. Kadi badi amu batungunuka ne dienza dia malu a nanku, batua kabidi benji ba malu mabi makumbu.