Tobite 14 - MUKANDA WA MYIDI MUKULU（TSH96）

1Ke muvua Tobite muimbe musambu bua kuela Mvidi Mukulu tuasakidila nanku.

Lufu lua Tobite

2Tobite kufua mu ditalala muikale ne bidimu lukama ne dikumi ne bibidi. Kumujikabu bimpe mu ditunga dia Ninive. Tobite utshivua ne bidimu makumi asambombu ne bibidi, diba divuaye mushale mpofu. Kadi musangu udi mesu ende atuadija kumona tshiakabidi kushalaye mubanji. Uvua upesha bapele bintu bia pa luse ne muoyi wa kalolu. Uvua wela amu kuela Mvidi Mukulu tuasakidila, umutumbisha bua bumfumu buende.

3Pakavuaye pa kufua, kubikidishaye muanende Tobiyase, umubela, umuambila ne:

— Muananyi, angata bana bebe,

4uye lukasa mu Madayi. Ndi ngitaba miaku ya Mvidi Mukulu ivua muambi Nahume muambe, utandisha bena Ninive. Bionsu bivuaye muambe bua bena Ashure ne bena Ninive nebikumbane, nebabakengeshe. Bionsu bi-vuabu bambe kudi bambi ba Izrayele, bavua Mvidi Mukulu mutume nebienzeke. Malu onsu avuabu bambe neakumbane amu kukumbana pa diba diawu. Mu Madayi, neusombe mu ditalala dipite dia mu Ashure nansha mu Babilone. Bualu ndi mujadike menemene ne: bidi Mvidi Mukulu muambe nebikumbane, bionsu kabidi nebienzeke. Muaku onsu uvua muambi muambe udi ukumbana. Bamue ba ku bana betu batshidi mu buloba bua bena Izrayele nebabatangalaje, nebaye nabu mu bupika kule bashiye ditunga edi. Ditunga dionsu nedishale amu tshipela. Samariya ne Yerushalayime nebishale munda mutupu. Neboshe nzubu wa Mvidi Mukulu abutuke, anji kushala nanku awu.

5Pashishe Mvidi Mukulu neafuile bena Izrayele luse, neabapingaje mu ditunga dia Izrayele kabidi. Bobu nebase tshiakabidi nzubu wa Mvidi Mukulu, kadi kakuikala kabidi ne lumu bu muvua wa kumpala too ne didi diba divuabu bambe dikumbana. Pashishe bena Izrayele bonsu nebumuke mu bupika, nebibakulule Yerushalayime bimpe bitambe. Nebibakululemu nzubu wa Mvidi Mukulu, amu bu muvua bambi ba Izrayele bamane kuamba.

6Bantu bonsu ba mu buloba bujima nebapingane kabidi kudi Mvidi Mukulu mulelela buakumunemeka. Nebabenge bonsu mpingu yabu ya dishima ivua ibumusha mu njila muakane. Nebatendelele Mvidi Mukulu wa tshiendelele. Nebamuenzele amu bidi biakane.

7Mu tshikondu atshi, Mvidi Mukulu neapandishe bende bonsu badi bamulamate. Neabasangishe, kabidi neabafikishe ku Yerushalayime. Neanyishe bua base mu buloba bua Abrahame. Nebasombe mu butalala kashidi. Bantu bonsu badi bananga bulelela Mvidi Mukulu, nebasanke. Kadi bantu badi benza malu mabi, ne bonsu badi kabayi balamate Mvidi Mukulu nebabutuke pa buloba.

8-9“Kadi mpindiewu, bana banyi. Telejayi mibelu yanyi. Kuatshilayi Mvidi Mukulu mudimu ne muoyi umue. Enzayi bidi bimulengelela. Ambilayi bana benu, benze malu makane, badileje ne kalolu kudi bapele. Balamate Mvidi Mukulu bamutumbisha misangu yonsu mu bulelela kabidi ne bukole buabu bonsu.

“Kadi wewe Tobiyase muananyi, umbuka mu Ninive, kusombimu to. Pawikala mumane kujika mamuebe pamue nanyi, kuena mua kunengakana kabidi mu ditunga edi. Bualu, ndi mujadike ne: buenzayi mbupite bungi mu ditunga edi. Bantu badi bashimangana amu kushimangana kabayi ne bundu nansha bukese.

10Muananyi, uvuluke muvua Nadabe muenzele Akikare, tatuende uvua mumukoleshe. Kumueleshaye mu nzubu wa mashika muikala bu lukita. Amu Mvidi Mukulu kumusombuela bua tshilema tshiende atshi, tshivuaye muenzele Akikare. Pashishe Akikare kupanda, kadi Nadabe kuya amu kuya munkatshi mua miidima kashidi. Yeye uvua muanyishe mua kushipesha Akikare. Bualu yeye ewu, uvua umueneka muntu wa kalolu kudi bapele, kupandaye ku njiwu ya lufu ivua Nadabe mumulongoluele. Nadabe kudifikisha ku lufu nkayende kudibutuka.

11Nenku bana banyi, monayi tshidi dipa dia pa luse ditukebela kabidi ne tshidi buenzayi butupetesha, buenzayi budi bupatula lufu.

“Mpindiewu lufu lukadi bankuata.”

Pashishe, bobu kumuladika pa bulalu buende, kukulaye muoyi. Kumujikabu biakane.

Ndekelu wa Tobiyase

12Musangu udi mamuende ufua. Tobiyase udi umujika pabuipi ne tatuende. Pashishe kuyaye ku Madayi ne mukajende, kuasaye mu musoku wa Ekbatane pamue ne Raguwele, tatuende muenu.

13Uvua ukuba ne unemeka baku bende bimpe mu bukulakaje buabu. Bobu bamane kufua, kubajikaye mu musoku wa Ekbatane mu ditunga dia Madayi. Pashishe kupianaye bintu bia Raguwele amu bu musuaye mumane kupiana bintu bia tatuende Tobite.

14Tobiyase mene kufua, muikale ne bidimu lukama ne dikumi ne muanda mutekete. Bantu bonsu bavua bamunemeka.

15Pavuaye kayi muanji kufua, uvua mumvue bua kabutu ka Ninive, kabidi uvua mumone bena Ninive bavuabu bakuate mu bupika kudi Kyaksare, mukalenga wa bena Madayi, bafika nabu mu Madayi. Uvua utumbisha Mvidi Mukulu bua dinyoka divuaye mukengeshe nadi bena Ninive ne bena Ashure. Uvua usanka bua dibutuka dia ditunga dia Ninive pavuaye ne muoyi. Uvua wela Maweja-Nangila Mvidi Mukulu tuasakidila bualu udi muakane bua bantu bamutumbishe tshiendelele.