Sira 27 - MUKANDA WA MYIDI MUKULU（TSH96）

1Bua kupeta bintu bia bungi,

bantu bavule badi benza bibi.

Muntu udi musue kunema,

kena musue kumanya tshintu tshikuabu to.

2Mudi kabaya kabuela mu mpandakanyi ya mabue abidi malamakana,

ke mudi bubi bubuela munkatshi mua muntu

udi upanyisha bintu ne mukuabu udi ubisumba.

3Pikala muntu kayi utshina Maweja-Nangila muende muonsu,

nzubu wende neabutuke.

Muntu udi umanyika ku bidiye wamba

4Padibu basenga nseke mu munyingu, nseke idi ishala.

Ke mudi bilema bia muntu bimueneka padiye wakula.

5Bu mudibu bateta ngesu ya mufumbi padibu bayosha mu kapia,

ke mudibu bamanya dimanya dia muntu padibu bayukila nende.

6Badi bamanyina mutshi wa mu budimi ku bimuma biawu;

ke mudibu bajingulula meji adi munda mua muntu ku miaku idiye wakula.

7Kuena mua kudianza kutumbisha muntu kuyi muanji kumvua mudiye wakula.

Bualu tudi tuangata muntu ne mushinga ku bidiye wakula.

Buakane

8Paudi udibamba bua kufika ku dienza buakane,

udi mua kufikaku,

neuvuale tshipeta tshimpe atshi bu tshinkutu tshia lumu.

9Nyunyi ya mushindu umue,

bua kuikisha, idi idikungujila muaba umue;

nenku buakane budi bulonda padi bukuabu.

10Mudi nyama wa ntambue walamina nyama udiye ukeba kudia,

ke mudi bubi bualamina bantu badi benza bibi.

11Muntu udi unemeka Mvidi Mukulu, udi wakula ne meji matuku onsu,

kadi muntu mutshimbakane udi ukudimuka bu mudi ngondu.

12Paudi ufika munkatshi mua bantu kabayi ne lungenyi,

kunengakanyi mu tshisumbu tshiabu,

ulamata bantu badi bela meji.

13Diyuki dia bantu batshimbakane didi dikeba tshiji.

Badi baseka padibu benza bualu bubi.

14Bantu badi baditshipa amu kuditshipa, kapayi bualu,

badi bafikishangana munda.

Padibu batandangana ne bantu bakuabu,

bantu bonsu badi bajibika mu matshi.

15Matandu a bena ditambisha adi afikisha bantu ku lufu,

bipendu biabu bidi bitutonda.

Malu masokome

16Muntu udi usokolola malu a mulunda wende,

udi unyanga diumvuangana diabu.

Kena mua kupeta kabidi wende mulunda wa pa muoyi.

17Unange mulunda webe, umulamate,

kadi pawikala musokolola malu ende, kumvuanganyi kabidi nende to:

18bulunda mbumane kufua,

budi bu muntu mufuishe muanabu.

19Bu mudi nyunyi mukufinuke mu bianza,

uya kuyi mua kumukuata tshiakabidi,

ke muudi ujimija mulunda webe kuyi mua kumupeta kabidi.

20Kuena mua kumuipatshila to, bualu ukadi kule.

Mmumane kukunyema bu kabuluku katuka mu bukondu.

21Badi mua kuondapa mputa wa muntu,

badi batandangana badi mua kulengejangana kabidi.

Kadi muntu udi musokolola malu a mulunda wende,

kena mua kumutekemena kabidi.

Bena mpala ibidi

22Muntu udi uvinya mukuabu disu,

udi ukeba kuenza bibi.

Paudi umutabalela, umuke muaba udiye.

23Panudi nende, udi wamba bimpe,

I usanka paudi wakula, ukatshila.

Kadi paudi umbuka, udi wamba munga,

wenduluka ne biuvua muambe bua kukubutula.

24Yeye mmupite bionsu bindi ndiwula.

Maweja-Nangila kabidi mmumudiwula.

Badi basombuela bua malu mabi avuabu benza

25Kuudi wela tshinkelenda nkuyaya kudishinda.

Muntu udi wenzela mukuabu bibi, nebamuenzele kabidi bibi.

26Muntu udi uteya mukuabu, umuimbila tshiina,

umuelela bukondu, nebimuenzekele amu nanku.

27Bubi budi muntu wenza budi amu bumupinganyina,

kayi mua kumanya kudibu bufumina.

28Muena diditambisha udi upenda bantu, ubaseka,

dikenga ndimuindile,

bu mudi nyama wa ntambue walamina bua kukuata nyama.

29Bantu badi basanka padi bantu bakane bapeta dikenga, nebadishinde.

Kabidi nebakenge bikole patshidibu ne muoyi.

Bidi bimpe kufuilangana luse, pa mutu pa kuikala ne njiya(Nsum 20.22; 24.49; Mat 5.38-42; Rom 12.17)

30Njiya ne tshiji mbibi,

muenji wa bibi ke mfumuabi.