Sira 20 - MUKANDA WA MYIDI MUKULU（TSH96）

Tumanye mua kubelangana pa diba

1Kudi mibelu idi kayiyi pa diba diayi.

Muntu udi upuwa, misangu mivule udi uleja mudiye ne lungenyi.

2Mbimpe kubela muntu

pa mutu pa kulama tshiji munda.

3Muntu udi utonda bubi buende,

udi wepuka dikenga.

4Bu mudi muntu mutungu, ukeba mua kuangata mukaji ku makanda,

ke mudi muntu udi musue kukosa bilumbu bia bantu ku bukole.

5Bamue bantu mbapuwe, bamueneka ne badi ne meji,

bakuabu badi ne buakulavi, badi babadiwula.

6Kudi mishindu ibidi ya bantu badi kabayi bakula:

kudi bantu badi kabayi ne tshia kuandamuna,

kudi bantu badi bindila diba dia kuandamuna.

7Muntu wa meji udi upuwa

too ne padiye ufika tshikondu tshia kuakula.

Kadi muena tshiakulakula ne mutshimbakane

kena mumanye diba didiye mua kuakula.

8Bantu badi badiwula muntu udi wakula upitshisha.

Muntu udi ukimina kuakula,

kabena mua kumunanga.

Malu adi akudimuka ku tshikondu ku tshikondu

9Misangu mikuabu dikenga didi mua kupetesha muntu disanka,

bu mudi disanka mua kukudimuka dikenga.

10Kudi kupa kuudi upa muntu bua kumusankisha

kakuyi mua kukupetesha tshintu.

Kadi kudi kupa kukuabu, kudi mua kukupetesha bintu bia bungi.

11Muntu udibu batumbisha,

badi mua kumupuekesha,

kadi muntu udibu bapuekesha,

badi mua kumutumbisha.

12Kudi muntu usumba bintu bia bungi

ku mushinga mukese,

kadi pashishe bidi bimueneka ne

mmubisumbe ku mushinga mukole mupite.

13Badi bananga muntu wa meji ku meyi makese adiye wakula,

kadi meyi mimpe a batshimbakane adi ajimina.

14Kupa kudi muntu mutshimbakane ukupa bua kukusankisha,

kakuena mua kukuambuluisha,

bualu amu biudi mua kumupingajila ke bidiye mutekemene.

15Udi ukupesha bintu bikese, kadi ukuamba bia bungi,

udi uteka mutoyi bu mudi muntu udi usumbisha mu tshisalu.

Lelu udi ukusombesha tshintu, butshia udi utshinana.

Bantu ba nanku mbantu babi.

16Muntu mutshimbakane udi wamba ne: “Tshibi ne mulunda to,

kakuena muntu udi muanyishe bimpe bindi ngenza to.

Bonsu bandiadia nabu, kabena bammanya kabidi.”

17Bantu bonsu badi baseka bikole muntu wa nanku.

Tulekele kuakula meyi mabi

18Mbimpe kudishinda tshibuta pa mutu pa kuakula meyi mabi.

Muntu mubi udi udishinda ubutuka lukasa.

19Muntu mukolesha bibi udi bu diyuki dia tshianana,

didi bantu batshimbakane bakula amu kuakula.

20Kabatu bangata ne mushinga lusumuinu ludi muntu mupote wela,

bualu kena uluela pa diba dialu.

21Kudi bamue bantu bapele, badi babayi

mua kuenza malu mabi,

nanku badi balala, kondu kabu ka munda amu ne ditalala.

22Kudi bantu badi bajimija mioyi yabu bua bundu,

batshina mua kubela muntu mutshimbakane.

23Kudi bakuabu badi babutuka

padibu balaya mulunda wabu tshintu bua tshiena bundu.

Pashishe badi bakinangana.

24Dishima ntshilema tshibi kudi muntu,

badi nadi misangu mivule kudi bantu batshimbakane.

25Muivi muimpe mupite muena dishima wa kalanda musenga.

Kadi bubidi buabu mbena kabutu.

26Bantu kabena basue muena dishima,

muena dishima udi ne bundu matuku onsu.

Nsumuinu ya pa malu mimpe

27Muntu wa meji udi ukengela amu miaku mikese menemene,

bua bantu bamuanyishe padiye wakula;

muntu wa lungenyi udi usankisha bamfumu.

28Tshidime muimpe udi ne ntete ya bukula ya bungi,

muntu yonsu udi usankisha bamfumu, badi bamutuila luse,

bua bilema biende bidiye wenza.

29Milambu ne mabuejila bidi bipangisha

bena meji mua kumonabu bulelela.

Kabena mua kubela muntu,

bualu badi bu mbua udi ne tshiseba tshisuika ku mbanga.

30Meji masokoka nansha biuma bijika mu buloba,

bidi mua kuambuluisha ku tshinyi?

Bubidi buabi kakuena tshidi ne mushinga to.

31Muntu udi usokoka bupote buende,

mmupite muntu udi usokoka meji ende.