Sira 1 - MUKANDA WA MYIDI MUKULU（TSH96）

TSHITUPA TSHIA KUMPALAKutua Meji makumbu

1Meji onsu mmafuma kudi Mvidi Mukulu,

adi ashala kudiye kashidi.

2Nganyi udi mua kubala lusenga lua ku mayi manene,

mamata a mvula nansha matuku a muoyi wa kashidi?

3Udi mua kupima butumbuke bua diulu,

bualabale bua buloba,

nansha buondoke bua mayi manene malabale, nnganyi?

4Mbafuke Meji kumpala kua bintu bionsu.

5Biangatshile ku ntuadijilu, lungenyi luvuaku.

6Udibu baleja muvua meji matuadija nnganyi?

Udi mua kumanya tshidi Meji enza nnganyi?

8Muena meji udi amu Maweja-Nangila.

Utudi ne bua kutshina udi amu umue.

Ke yeye udi usomba mu nkuasa wende wa bumfumu.

9Maweja-Nangila ke udi mufuke Meji.

Yeye ke uvua muamone, muapime,

muuwuje mu bintu bionsu bidiye mufuke.

10Mmuapeshe muntu yonsu bu mudiye musue.

Mmuapeshe badi bamunanga yeye Maweja-Nangila.

Mutudi mua kutshina Maweja-Nangila

11Muntu udi unemeka Maweja-Nangila udi upeta lumu ne butumbi,

udi udiumvua ne diakalenga kabidi ne musangelu.

12Muntu udi unemeka Maweja-Nangila

udi wenda ne disanka tente mu muoyi wende,

uleja mpala wa mimuemue, ulala

matuku a bungi pa buloba.

13Muntu udi utshina Maweja-Nangila

malu ende onsu neajike amu bimpe.

Dituku dia lufu luende, Mvidi Mukulu neamuele lupemba.

14Muntu udi utshina Maweja-Nangila ke udi ne meji.

Bantu bakane badi baapetela munda mua bamamuabu.

15Meji adi munkatshi mua bantu, mmashindamemu kashidi,

neashale kudi ndelanganyi yabu.

16Udi utshina Maweja-Nangila udi ne meji mapite bungi.

Bantu badi nawu badi bapeta mapa awu mavule.

17Meji adi uwuja nzubu yabu ne mayeba abu

ne bintu bionsu bidibu bajinga.

18Muntu udi utshina Maweja-Nangila udi ne Meji.

Meji adi amupa bupole ne bukole bua mubidi.

19Meji adi afila lungenyi ne dimanya dijalame kudi bantu.

Bantu badi bakidila meji bimpe badi bapeta lumu.

20Kutshina Maweja-Nangila

ke muji wa Meji.

Mapa a Meji nkulala panu kuboboka.

Tuikale ne lutulu, tudikande

22Muntu udi ufika munda kakuyi bualu,

udi muena tshibawu.

Bualu tshiji tshiende tshidi mua kumufikisha ku kabutu.

23Muntu muena lutulu udi mumanye mua kutukija,

pashishe neapete disanka diende tshiakabidi.

24Nealame ngenyi yende too ne ku diba didiye mua kuyimanyisha bakuabu.

Nanku bantu bonsu nebatumbishe lungenyi luende.

Muntu wa meji udi ufika kudi Mvidi Mukulu

25Mu biuma bidi nabi Meji,

mudi nsumuinu idi itulongesha malu.

Kadi kunemeka Mvidi Mukulu,

mbualu budi muenji wa bubi kayi musue.

26Wewe musue kupeta meji,

lama mikenji ya Maweja-Nangila.

Nanku yeye neakupeshewu.

27Muntu udi utshina Maweja-Nangila udi ne meji,

mmupete dilongesha dimpe.

Mvidi Mukulu udi unanga muntu udi umulamata ne udi usomba ne bupole.

28Leja muebe muonsu muudi utshina Maweja-Nangila.

Paudi umutendelela, kutumi muoyi webe ku bunga bualu.

29Paudi uyukila ne bakuebe, kuikadi muena mpala ibidi.

Manya bimpe tshiudi wamba.

30Kuditambishi, bualu udi mua kupona, bantu bakupepeja.

Maweja-Nangila neasokolole malu ebe masokome,

kabidi neakufuishe bundu munkatshi mua bantu.

Bualu kuvua mutshine Maweja-Nangila,

kabidi uvua ne lubombu munda muebe.