Yoshuwa 4 - MUKANDA WA MYIDI MUKULU（TSH96）

Mabue dikumi ne abidi a tshivulukilu

1Bena Izrayele bonsu bamane kusabuka Yardene, Maweja-Nangila kuambila Yoshuwa ne:

2— Sungula bantu balume dikumi ne babidi, bilondeshile bungi bua bisamba bienu. Ku tshisamba tshionsu kuikala muntu umue.

3Ubambile baye kukeba mabue dikumi ne abidi mu musulu wa Yardene, anu muaba uvua batuangaji bimane awu. Badi ne bua kutuala mabue awu, nuenu kuateka muaba unuaya kulala.

4Yoshuwa kubikila bena Izrayele dikumi ne babidi bavuaye musungule,

5ubambila ne:

— Pitayi kumpala kua mushete wa Maweja-Nangila Mvidi Mukulu wenu. Nubuele munkatshi mua musulu wa Yardene. Muntu yonsu wa kunudi ambule dibue dia muaba awu, aditeke pa makaya ende. Nanku tshisamba tshionsu tshia bena Izrayele netshikale ne diatshi dibue.

6Mabue aa neanu-vuluije bionsu bivua binuenzekela muaba ewu. Nanku mu matuku adi kumpala, padi bana benu banukonka ne: Mabue aa avua a tshinyi,

7nubambile ne: “Pavua batuangaji basabuka musulu wa Yardene, bambula mushete wa ndondu wa Maweja-Nangila, mayi akimana. Eyowa, bobu basabuka Yardene ne mushete wa ndondu, mayi avua mimane. Nenku mabue aa adi ne bua kuvuluija bena Izrayele kashidi tshishima etshi.”

8Bantu bavua Yoshuwa musungule, kukumbajabu bionsu abi. Kuambulabu mabue dikumi ne abidi munkatshi mua musulu wa Yardene. Dibue dimue ku tshisamba, bu muvua Maweja-Nangila nkayende muambile Yoshuwa. Kuyabu kuteka mabue awu muaba uvuabu ne bua kulala.

9Ke Yoshuwa kuimanyika kabidi mabue dikumi ne abidi, munkatshi mua musulu wa Yardene, muaba uvua batuangaji bavua bambula mushete wa ndondu bimane. Mabue awu, atshidipu too ne mpindiewu.

10Batuangaji, bavua bambule mushete wa ndondu, kuimanabu munkatshi mua Yardene too ne padi bena Izrayele bakumbaja bionsu bivua Maweja-Nangila mubambile kudi Yoshuwa. Ke muvua Yoshuwa mukumbaje bionsu bivua Moshe mumuambile nanku. Bena Izrayele kusabuka musulu lukasa.

11Nanku bantu bonsu bamane kufika dishiya dia musulu, batuangaji kusabuka, kupita kabidi kumpala kua bena Izrayele bonsu, bambule mushete wa tshijila.

12Bena Rubene, bena Ngade, tshitupa tshia bena Menashe, kusabuka ne bia mvita mu bianza, kumpala kua bena Izrayele bakuabu bonsu, amu muvua Moshe mubambile.

13Bantu bu binunu makumi anayi, bambule bia mvita, kusabuka musulu wa Yardene, Maweja-Nangila mutangile, balonde njila wa ku mpata ya Yeriko.

14Dituku adi, Maweja-Nangila kujadika bumfumu bua Yoshuwa ku mesu kua bena Izrayele bonsu. Matuku onsu avua Yoshuwa mulale panu, bena Izrayele bavua bamunemeka bu muvuabu banemeka Moshe.

15Pashishe Maweja-Nangila kuambila Yoshuwa ne:

16— Ambila batuangaji badi bambula mushete udi ne mabue a ndondu, bapatuke mu musulu wa Yardene.

17Yoshuwa kutuma diyi bua bumuke mu mayi.

18Batuangaji kuitaba. Amu bobu bamane kumuka mu mayi, bafike ku muelelu, musulu kupingana muawu mua kale, kuwula tente too ne ku bibungubungu.

19Bena Izrayele bavua basabuka musulu wa Yardene mu matuku dikumi a ngondu wa kumpala. Pashishe bakasa mitanda yabu ku Ngilgale, ku luseke ludi diba dipatukila lua Yeriko.

20Yoshuwa kuimanyika mu Ngilgale mabue dikumi ne abidi, avuabu bambule mu musulu wa Yardene.

21Pashishe kuambilaye bena Izrayele ne:

— Matuku adi kumpala, bana benu banukonke bua mabue aa,

22nubumvuije muvua bena Izrayele basabuka musulu wa Yardene ku makasa kume.

23Maweja-Nangila Mvidi Mukulu wenu uvua mumishe mayi a musulu wa Yardene bua nusabuke, bu nuwuaye mumishe bualu buenu Mayi manene makunze.

24Maweja-Nangila uvua muenze nanku, bua bantu bonsu ba pa buloba bamanye bukole buende. Kabidi bua nutumikile Maweja-Nangila Mvidi Mukulu wenu kashidi.