Yobe 35 - MUKANDA WA MYIDI MUKULU（TSH96）

Pashishe Elihu kuamba ne: Yobe udi wamba malu a tshianana

1Elihu kuamba kabidi ne:

2Yobe, paudi wambila Mvidi Mukulu ne: tshiena ne bualu,

udi wenza bimpe anyi?

3Wewe udi umukonka ne: nansha meme tshiyi ne bualu,

bidi bindengelela ku tshinyi?

Meme kabidi ndi mpeta tshinyi?

4Nanku, meme nenkuandamune ku lukonku elu.

Nengandamune kabidi ya balunda bebe.

5Ujoje mavuba,

utangile tshibuashibuashi,

kabiena bikupite ku bule anyi?

6Paudi wenza bibi udi ukengesha Mvidi Mukulu anyi?

Bilema biebe bionsu bipite bungi,

bidi bimuenzela tshinyi?

Tshintu nansha tshimue.

7Paudi wenza bimpe,

udi wambuluisha Mvidi Mukulu anyi?

Tshidiye upeta kuudi ntshinyi?

8Bimpe nansha bibi biudi wenza,

bidi biambuluisha nansha bikengesha anu bantu nebe.

9Padi bena tshikisu babakengesha bikole,

bantu badi batua mikemu.

Badi bela mbila bua bantu babambuluishe.

10Kadi muntu nansha umue kena ukonka ne:

“Mvidi Mukulu uvua mumfuke udi penyi?

Yeye udi utuimbisha misambu nansha butuku.

11Udi utulongesha mudiye kayi ulongesha nyama.

Udi utupa meji adi nyunyi kayiyi nawu.”

12Badi balomba diambuluisha bua kuluisha

bena ditambisha, bantu babi.

Kadi kena ututeleja nansha.

13Nansha tuetu bela mbila,

Mvidi Mukulu wa bukole buonsu kena utumvua,

kena ututeleja ne ntema to.

14Wewe Yobe, udi wamba ne: tshiena mumone Mvidi Mukulu to.

Kadi indila katupa,

tshilumbu tshiebe tshikadi kumpala kuende.

15Udi wela meji, nansha yeye ne tshiji, kena mua kukunyoka,

kabidi kena ulondolola bibi bidi bantu benza anyi?

16Kadi biudi wewe Yobe wamba, bidi amu bia patupu,

bidi bimueneka ne udi wakula amu kuakula,

kuyi mumanye malu audi wamba.