1 Kulondolola 6 - MUKANDA WA MYIDI MUKULU（TSH96）

Ndelanganyi mikuabu ya Levi

1Bana ba balume ba Levi badi nenku: Ngershone, Kekate ne Merari.

2Bana ba balume ba Ngershone badi nenku: Libni ne Shimeyi.

3Bana ba balume ba Kekate badi nenku: Amrame, Ishare, Ebrone ne Uziyele.

4Bana ba balume ba Merari badi Mali ne Mushi. Mena a meku a bena Levi mmafumine ku mena a bankambua babu aba.

5Ndelanganyi ya Ngershone ya munda muende menemene idi nenku: Libni, Yakate, Zima,

6Yowa, Ido, Zera ne Yeyatrayi.

7Ndelanganyi ya Kekate idi nenku: Aminadabe, Kora, Ashire,

8Elkana, Abiyashafe, Ashire,

9Takate, Uriyele, Oziya ne Shawule.

10Elkana uvua kabidi ne bana ba balume babidi: Amashiya ne Akimote.

11Ndelanganyi ya Akimote ivua nenku: Elkana, Sofayi, Nakate,

12Eliyabe, Yerowame ne Elkana.

13Bana ba balume ba Samuwele bavua nenku: Yowele muanabute, bamulonda kudi Abiya.

14Ndelanganyi ya Merari ya munda muende menemene ivua nenku: Mali, Libni, Shimeyi, Uza,

15Shima, Agiya ne Ashaya.

16Davide uvua musungule ndelanganyi ya Levi bu tungimba tua mu muaba wa tshijila wa Maweja-Nangila diba divuabu bamane kutekamu mushete wa tshijila.

17Bangabanga ne Shelomu kayi muanji kuashila Mvidi Mukulu nzubu mu Yerushalayime, bantu aba bavua bimba misambu kumpala kua ntenta wa kusambakena, bilondeshile meyi ne mikandu bivuabu nabi.

18Bantu bavua benza mudimu ewu, pamue ne bena misambu ba mu meku abu, ke: Emane wa mu diku dia Kekate, uvua mulombodi wa tshisumbu tshia kumpala tshia bena misambu. Bankambua bende menemene bavua Yowele, Samuwele,

19Elkana, Yerowame, Eliyele, Towa,

20Sufe, Elkana, Makate, Amashayi,

21Elkana, Yowele, Azariya, Sefanya,

22Takate, Ashire, Abiyashafe, Kora,

23Ishare, Kekate, Levi ne Yakobe.

24Ku dia balume dia Emane kuvua Ashafe mulombodi wa tshisumbu tshibidi tshia bena misambu. Bankambua bende menemene bavua nenku: Berekiya, Shima,

25Mikayele, Basheya, Malkiya,

26Etni, Zera, Adaya,

27Etane, Zima, Shimeyi,

28Yakate, Ngershone ne Levi.

29Tshisumbu tshisatu tshia bena misambu ba mu diku dia Merari tshivua ku dia bakaji diabu: Etane ke uvua utshilombola. Bankambua bende bavua nenku: Kishi, Abdi, Maluke,

30Ashabiya, Amashiya, Ilkiya,

31Amsi, Bani, Shemere,

32Mali, Mushi, Merari ne Levi.

33Bantu bakuabu ba mu tshisamba tshia Levi bavua benza midimu mikuabu yonsu ivua itangila muaba wa tshijila wa Mvidi Mukulu.

34Kadi amu Arone ne ndelanganyi yende bavua benza mudimu wa batuangaji, wa kulambula milambu ya nyama ne ya manananshi, kuyiteka pa bilambuilu biayi. Amu bobu ke bavua babuela muaba wa tshijila menemene bua kuenzela Maweja-Nangila midimu yonsu. Bobu ke bavua bakobolola bena Izrayele, bilondeshile mikenji ya Mvidi Mukulu ivuaye muambile Moshe, muntu wende.

35Ndelanganyi ya Arone ya munda muende menemene ivua nenku: Elazare, Pinase, Abishuwa,

36Buki, Uzi, Zeraya,

37Merayote, Amariya, Akitube,

38Sadoke ne Akimase.

Bimenga bivua bena Levi bapeta

39Tutele miaba ya mu ditunga ivua ndelanganyi ya Arone ya mu diku dia Kekate mipete bua kuasa. Ndelanganyi ya Arone ya mu diku dia Kekate ke ivua midianze kupeta buabu buloba, bilondeshile muvuabu babutshinke.

40Bobu kupeta tshimenga tshia Ebrone, mu ditunga dia Yuda, ne mpata ya ku mpenga kuatshi bua kudisha bimuna.

41Kadi madimi ne misoku bivua ku bumfumu bua tshimenga atshi, bavua bamane kubipesha Kalebe, muana wa Yefune.

42-45Ndelanganyi ya Arone ivua mipete bimenga bia kunyemena ebi: Ebrone, Libna, Yatire, Eshtemowa, Ilene, Debire, Ashane, Bete-Shemeshe. Kabidi mu buloba bua bena Binyamine, bavua bapeta Ngeba, Alemete ne Anatote. Bavua bapeta tshimenga tshionsu tshia ku bimenga ebi dikumi ne bisatu pamue ne mpata ya pabuipi natshi bua kudisha bimuna biabu.

46Meku a ndelanganyi mikuabu ya Kekate kupeta bimenga dikumi, bilondeshile muvuabu babitshinke. Bimenga ebi bivua mu buloba bua bena Efrayime, bua bena Dane, ne mu buloba bua bena Menashe bavua basomba luseke ludi diba dibuelela lua Yardene.

47Meku a ku ndelanganyi ya Ngershone ivua mipete bimenga dikumi ne bisatu bivua mu buloba bua bena Isakare, bua bena Ashere, bua bena Naftali ne bua bena Menashe bavua basomba mu Bashane.

48Ndelanganyi ya Merari kupeta, bilondeshile muvuabu batshinke, bimenga dikumi ne bibidi, bivua mu buloba bua Rubene, bua Ngade ne bua Zebulone.

49Bena Izrayele bavua bapesha ndelanganyi ya bena Levi bimenga ebi ne mpata ya kudishila bimuna biabu.

50Bimenga bivua mu buloba bua bena Yuda, bua bena Shimeyone ne bua bena Binyamine, bituvua bamane kutela ebi, bavua babiabanya bilondeshile muvuabu batshinka.

51-55Meku a tshisamba tshia Kekate akapeta miaba ya kuasa mu bimenga bia kunyemena ebi: mu buloba bua bena Efrayime, bakupeta Shekeme ku mikuna, Ngezere, Yokneyame, Bete-Orone, Ayalone ne Ngate-Rimone. Mu buloba bua bena Menashe bavua basomba luseke ludi diba dibuelela lua Yardene, bavua bapeta tshimenga tshia Anere ne tshia Bileyame. Bimenga bionsu ebi, bavua babifile pamue ne mpata ya kudishila bimuna.

56-61Meku a bena Ngershone avua mapete bimenga ebi: buloba bua bena Menashe bavua basomba luseke ludi diba dipatukila lua Yardene, kupetabu tshimenga tshia Ngolane mu Bashane, ne tshia Ashetarote. Mu buloba bua bena Isakare, kupetabu tshimenga tshia Kedeshe, tshia Dabrate, tshia Ramote ne tshia Aneme. Mu buloba bua bena Ashere, kupetabu tshimenga tshia Mashale, tshia Abdone, tshia Ukoke ne tshia Rekobe. Mu buloba bua bena Naftali, kupetabu tshimenga tshia Kedeshe mu Ngalileya, tshia Amone ne Kiriyatayime. Bimenga bionsu ebi, bavua babifile pamue ne mpata ya kudishila bimuna biabu.

62-66Ndelanganyi mikuabu ya Levi ya mu diku dia Merari ivua mipete bimenga ebi: mu buloba bua bena Zebulone, kupetabu Rimonu ne Tabore. Mu buloba bua bena Rubene buvua ku luseke ludi diba dipatukila lua Yardene, butangilangane ne Yeriko, kupetabu tshimenga tshia Beshere mu tshipela, kupetabu kabidi tshimenga tshia Yakase, tshia Kedemote ne tshia Mefate mu buloba bua bena Ngade. Kupetabu tshia Ramote mu buloba bua Ngilaade, Makanayime, Eshebone ne Yazere. Bimenga bionsu ebi bavua babifile pamue ne mpata ivua pabuipi nabi, ya kudishila bimuna biabu.