Estere ngreke A - MUKANDA WA MYIDI MUKULU（TSH96）

Mordekayi udi ulota ndota 1 Mu tshidimu tshibidi tshia bumfumu bua mukalenga Artashasta munene, mu dituku dia kumpala dia ngondu wa Nisane, Mordekayi kulota ndota. Mordekayi uvua muana wa Yayire, wa ku ndelanganyi ya Shimeyi ne ya Kishe. Kabidi uvua wa mu tshisamba tshia Binyamine. 2 Mordekayi mmuena Yuda muase mu Suze. Uvua mumanyike bikole, uvua ukuatshila mudimu mu lupangu lua mukalenga. 3 Bualu uvua kabidi wa ku tshisumbu tshia bantu bavua Nebukadnesare, mukalenga wa Babilone mutume mu bupika ku Yerushalayime pamue ne Yekonya, mukalenga wa bena Yuda. 4 Mordekayi uvua mulote ndota yende nenku: Uvua mumvue diakamue mbila mikole, kabidi ne mutoyi wa bungi, makubakuba, buloba buzakala, bantu kukuatshika bowa bikole. 5 Kabidi yeye kumona nyoka ya tshidika ibidi, yenda ikeba kulengangana, ivua yela mikunda mikole, ikuatshisha bowa. 6 Nanku bisamba bionsu kudilongolola bua kuya kubunda bantu bavua balamate Mvidi Mukulu. 7 Ndituku dia miidima mikole, dia lutatu, ne dikengakana, dia disumpakana pa buloba ne bowa bunene. 8 Bantu bonsu ba mu tshisumbu tshia badi balamate Mvidi Mukulu kuzakala bua makenga manene nenku avua mabakuate! Ke kudiumvuabu ne: tudi ne bua kufua. 9 Bobu kuelabu Mvidi Mukulu mbila. Mbila ayi kuandamukayi musulu mualabale wa mayi mavule uvua upatula mayi bu mpokolu. 10 Pashishe butuku kutshia, diba kupatuka. Nanku bena dikenga kujuka, kubutula bena ditambisha bavua babatatshisha. 11 Ke muvua Mordekayi mulote bivua Mvidi Mukulu muele meji bua kuenza nanku. Amu utabuluka ku tulu, diakamue kushalaye wela meji, dituku dijima ukeba bikole mushindu udiye mua kujingulula ndota ayi.Mordekayi udi usokoluela mukalenga tshitungu tshibi 12 Dituku dikuabu Mordekayi uvua uya kuikisha mu lubanza lua mu lupangu lua nzubu wa mukalenga. Kadi mu lupangu amu muvua Ngabata ne Tara, bavua bena mudimu babidi banene ba mu bukalenga bavua balama lupangu. 13 Kubumvuaye bobu nkayabu belangana mpata. Kadi kukebaye bikole mua kumanya bivuabu bayukila, kumanyaye ne badi bela tshitungu bua kushipa mukalenga Artashasta. Diakamue kuyaye kusokoluela mukalenga bualu. 14 Mukalenga kukonka bena mudimu banene babidi aba mushindu uvua bualu, bobu kuitaba, ke yeye kubashipesha. 15 Mukalenga kufundisha bualu abu mu mukanda wa Dilondolola dia malu bua bashale babuvuluka. Mordekayi kabidi kubufunda momumue. 16 Pashishe mukalenga kutuma diyi bua Mordekayi ashale wenzela midimu mu nzubu wa bukalenga, kumufutaye kabidi bintu bia disanka bua mudimu uvuaye mumuenzele. 17 Kadi Amane, muena ditambisha, uvua muana wa Amedata, uvua kabidi usankisha mukalenga bikole. Uvua muele meji bua bakengeshe Mordekayi ne bena diende, bualu uvua mushipeshe bena mudimu babidi banene ba mu bukalenga.Mukalenga Artashasta udi wenza didia dinene

1Malu aa avua menzeke mu tshikondu tshia mukalenga Artashasta. Ke yeye uvua ne bumfumu mu bitupa bia buloba lukama ne makumi abidi ne muanda mutekete, bifika too ne ku Inde.

2-3Mu tshidimu tshisatu tshia bukalenga buende, mukalenga Artashasta uvua musombe mu nzubu wende wa bukalenga, mu tshimenga tshia Suze. Kulambishilaye balunda bende ne bantu banene ba bena Persa ne ba bena Madayi, kabidi ne balombodi ba bitupa bia maloba ne bamienampala ya matunga makuabu didia dinene.

4Pashishe munkatshi mua matuku lukama ne makumi muanda mukulu, mukalenga kubaleja bubanji buvua bufumina mu matunga adi mu bukalenga buende, kulongololaye nabu masanka mavule.

5Ku ndekelu kua tshibilu atshi, mukalenga kulambishila kabidi bantu ba bisamba bionsu bavua mu tshimenga tshia Suze didia dinene. Bantu kudila mu nzubu wa bukalenga matuku asambombu.

6Amu bua tshibilu atshi, bavua balengeja lubanza ne bilamba bia buanda bua mitshi, bilembelejila ku mikaba mienza ne buanda bukunze bua mitshi, ne tukanu tua mpawungi ne tshiamu tshitoke tshia mushinga mukole, kabidi muvua makunji a mishindu mishilangane mikale ne mabue a mushinga mukole. Bayua bateka nkuasa ya bisaka mienza ne mpawungi ne tshiamu tshitoke tshia mushinga mukole panshi pavua palamika mabue a mushinga mukole a mayi a matamba ne a makalumakalu ne matoke. Muvua kabidi mbulanketa ya manda engelela kabidi muvua ne bilongu biteka miaba yonsu.

7Makopu a kunuina avua menza ne mpawungi ne tshiamu tshitoke tshia mushinga mukole; dikopu dimue dia ku wowu divua dilengeja ne mabue a mushinga mukole, divua ne mushinga mupite wa kilo binunu nkama muanda mukulu bia tshiamu tshitoke tshia mushinga mukole. Muvua nwinyo muimpe muvule uvuabu balamina mukalenga.

8Mu tshibilu atshi, bantu bavua banua mudibu basue, bualu mukalenga uvua mutumine bena mudimu bende bavua mu nzubu wa bukalenga diyi bua bamuenzele mudiye musue, benzele kabidi ne benyi bende.

9Astine, mukalenga mukaji uvua pende mulambishile bakaji nende bavua mu nzubu wa bukalenga wa mukalenga Artashasta didia dinene.

Mukalenga mukaji udi ujebula bayende

10Dituku dia muanda mutekete dia tshibilu, mukalenga Artashasta uvua ne disanka divule, ke kubikilaye batungu muanda mutekete nangananga bavua bamukuatshile mudimu: Ke Amane, Bazane, Tara, Boraze, Zatolta, Abataza ne Taraba.

11Kubatuminaye diyi bua bamutuadile mukalenga mukaji. Uvua musue kumusombesha mu nkuasa wa bukalenga, ne kumuvuadika nsala wa bukalenga kabidi uvua musue kuleja bena mudimu bende ba mu bukalenga ne bantu bavuaye mubikile ba mu bisamba bionsu, bua bamone muvua Astine muimpe. Uvua mulengele be.

12Kadi mukalenga mukaji Astine kavua muanyishe mua kulonda bantu batungu to. Pashishe, mukalenga kufika munda bikole.

13Mukalenga kuandamuna balunda bende ne:

— Bu mudi Astine muandamune nanku nutangile tshilumbu tshiende atshi, nutshikose bilondeshile mudi mikenji ya ditunga.

14Ke Arkesayi, Sarsatayi ne Maleseyare, kutantshilabu kuvua mukalenga. Balombodi banene ba mu bukalenga bua bena Persa ne bua bena Madayi aba, bavua ne mianzu minene.

15Nanku, bobu kuleja mukalenga dinyoka didibu ne bua kunyoka nadi Astine, mukalenga mukaji bilondeshile muvua mikenji, bualu mukalenga mukaji kavua mukumbaje meji a mukalenga, avua bantu batungu bamuambila.

16Pashishe Mukayi kuambila mukalenga pamue ne balombodi bende ba mu bukalenga ne:

— Mukalenga mukaji Astine kena mukuenzele amu wewe nkayebe bibi to. Mutuenzele kabidi ne balombodi bebe banene bonsu ba mu bukalenga, kabidi ne balombodi ba midimu yebe.

17-18Kabidi bantu mbamane kuambilangana bionsu ebi, kabidi ne miaku ivua mukalenga mukaji muandamune mukalenga. Lelu nansha bakaji bonsu bamukalenga muadi, badi balombodi banene ba mu bukalenga bua bena Persa ne bena Madayi basela, nebumvue mushindu uvua mukalenga mukaji muandamune mukalenga Artashasta, pashishe nebandamune babayabu amu mushindu wa momumue, kabayi batshina mua kubafikisha munda nansha kabidi mua kubafuisha bundu to.

19Mukalenga, paudi mumone bimpe, utume mikenji ya bumfumu, ufunde mu mikenji ya bena Madayi ne bena Persa: Neukandike Astine mukalenga mukaji bua kafiki paudi nansha. Nenku, muanzu wa bu mukalenga mukaji neupeshe munga mukaji udi mumupite ku nsombelu muimpe! Kakuena mushindu mukuabu utudi mua kuamba nansha.

20Mukenji ewu uudi wela nebaumanyishe bantu bonsu bua baukumbaje mu bukalenga buebe. Mushindu ewu ke udi mukaji yonsu mua kunemeka bayende, nansha yeye muneme nansha yeye mupele.

21Mukalenga ne balombodi bende banene ba mu bukalenga kuanyisha lungenyi alu. Mukalenga kuitaba meji avua Mukayi muambe.

22Ke kutumaye mukanda mu tshitupa tshionsu tshia buloba tshia mu bukalenga buende, mukanda mufunda mu muakulu wa bantu ba mu ditunga adi, bua banemeke badi ne bumfumu mu meku onsu.