Ngalate Diumvuija - MUKANDA WA MYIDI MUKULU（TSH96）

Diumvuija— Bankambua ba bena Ngalate bavua bafuma ku matunga a ku Mputu, babuela mu Aziya Mukese (lelu ke tshitupa tshia ditunga dia Turkiya tshidi mu Aziya,) bu bidimu nkama ibidi nansha isatu bgbg ne Y.K. Bavua basomba mu buloba buvua pabuipi ne tshimenga tshia Ankara tshia lelu. Polu uvua mulongeshe momu Lumu lua Disanka mu luendu luende luibidi ne luisatu (MM 16.6 ne 18.23.)Kadi panyima pa mupostolu Polu, bantu bakuabu kufika, kubanga kulongesha bena Ngalate ne: bena Kristu badi kabayi bena Yuda badi amu ne bua kulama bibidilu bia bena Yuda, nangananga tshibidilu tshia kuditekesha panshi. Polu uvua ubenga bionsu abi, bualu uvua umona ne: malu adibu benzeja bantu ba bisamba bikuabu ku bukole nanku, kaena umvuangana ne Lumu lua Disanka nansha. Adi apingaja bena Ngalate mu bupika. Polu uvua mua kuikala mu Efeze diba divuaye mumvue tshilumbu etshi. Bavua bamuambile kabidi ne: bena Ngalate bakadi bafuana kuanyisha dilongesha dia baluishi bebe abu. Ke mudi Polu utumina bena Ngalate mukanda, ubabela muende muonsu.Nanku bua kubapingaja mu njila umue epele wa “Lumu lua Disanka,” Polu udi ulongesha malu asatu:— Udi wanji kuleja bena Ngalate bivua bimuenzekele yeye muine: dikudimuka diende; muvuaye umvuangana ne balombodi ba Tshisumbu tshia bena ditaba ba mu Yerushalayime (bena ditaba bavua kabayi bena Yuda, kabavua ne bua kulama mikenji ya bena Yuda;) muvuaye ubela bikole mupostolu Petro, pavuaye muenze malu avua abengangana ne diumvuangana diabu adi. Polu udi uleja kabidi bena Ngalate mudiye mupostolu menemene, muvuaye mupete muanzu ewu kudi Mfumu Yezu nkayende (bit. 1-2).— Udi umvuija bantu ne miaku ya mu Mikanda ya tshijila, mudibu bapeta lupandu ki nku mikenji ya bena Yuda idibu balama, kadi amu bua padibu bitaba Yezu Kristu (bit. 3-4).— Udi ulomba bonsu bua bikale bantu badikadile badi babenga bupika buonsu, banyisha amu bua Mueyelu wa Mvidi Mukulu nkayawu ubaludike. Bualu Mueyelu ewu udi upatula munda mua muntu malu mapiamapia, nangananga muoyi wa dinanga (bit. 5-6)Lubila elu lua Polu ludi mua kuambuluisha Tshisumbu tshionsu tshia bena ditaba, ne muena Kristu yonsu, bua bitabe Kristu muabu muonsu, babenga bupika bua mishindu yonsu.