Estere ngreke 3 - MUKANDA WA MYIDI MUKULU（TSH96）

Amane ne Mordekayi badi batandangana

1Malu aa mamane kupita, mukalenga Artashasta kusankisha bikole Amane, muena ditambisha, muana wa Amedata. Kumubandishaye mu muanzu munene mupite wa balunda bende bonsu.

2Bena mudimu bonsu ba mu bukalenga bavua binyika mitu panshi kumpala kua Amane bu mutua mukalenga mutume diyi. Amu Mordekayi utua mubenge mua kuenza nanku.

3Bena mudimu bakuabu ba mu bukalenga kukonka Amane ne: Mudi Mordekayi kayi utumikila mikenji ya mu bukalenga mbishi?

4Dituku dionsu batua basa amu kuasa bilumbu, kadi Mordekayi kasua ubiangata ne mushinga nansha. Uvua mumane kubambila ne: ndi muena Yuda. Ke bobu kumanyisha Amane ne: Mordekayi kena ulonda mikenji ya bukalenga nansha.

5Amane kujadika ne Mordekayi kena umunemeka, kufikaye munda bikole.

6Nenku kushindikaye bua kubutula bena Yuda bonsu batua mu bukalenga bua Artashasta.

7Mu tshidimu tshia dikumi ne tshibidi tshia bukalenga bua Artashasta, Amane kuelaye mukenji bua kubutula bena Yuda. Kadi kutshinkaye bua kumanya dituku ne ngondu bidibu ne bua kubutula diakamue tshisamba tshia Mordekayi dituku dimue. Muvuabu batshinka amu mbapete dituku dia dikumi ne dinayi dia ngondu wa Adare.

Amane udi ulongolola kabutu ka bena Yuda

8Amane kuambila Artashasta ne:

— Mukalenga, kudi tshisamba tshidi ne bantu batangalake nseke yonsu ya mu bukalenga buebe. Badi balonda bibidilu bidi kabiyi bifuanangana ne bia bisamba bikuabu nansha kakese, badi babenga kuitaba mikenji ya bukalenga! Kuena mua kulekela bantu aba mu ditalala kabayi ne tshidibu bakuenzela to.

9Paudi umona ne: bidi bimpe, tuma diyi bababutule. Buanyi meme, ndi nteka kilo binunu nkama isatu ya tshiamu tshitoke tshia mushinga mukole mu mushete wa bukalenga.

10Ke mukalenga kukopola kakanu kende ka ku munu, kukapa Amane bua atue tshitampi pa mukanda uvuaye mufunde awu bua bamone mua kubutula bena Yuda.

11Pashishe mukalenga kuambila Amane ne:

— Lama makuta ebe! Kadi enzela tshisamba etshi muudi musue.

12Kubikilabu bafundi ba mu bukalenga mu matuku dikumi ne asatu a ngondu wa kumpala, bilondeshile muvua Amane mutume diyi. Bobu kufundila balombodi banene ba bena nwita, balombodi ba tshitupa tshionsu tshia buloba bavua mu bukalenga, kabidi ne bamfumu bashilangane ba bisamba bivua mu bukalenga, mikanda. Ku tshitupa tshionsu tshia buloba tshia ku bitupa lukama ne makumi abidi ne muanda mutekete bivua mu bukalenga, biangatshile ku Inde too ne ku bena Kushe, bavua bafunde mukanda mu dina dia mukalenga Artashasta mu muakulu wa bena tshitupa tshia buloba atshi.

13Kutumabu bantu bavua mua kufikisha mukenji awu mu ditunga dijima dia bukalenge bua bamone mua kubutula bena Yuda bonsu ne kunyanga bintu biabu amu dituku dimue dia mu ngondu wa dikumi ne muibidi, nansha ngondu wa Adare.