Sira 21 - MUKANDA WA MYIDI MUKULU（TSH96）

Nyemayi bubi

1Muananyi, pawikala muenze bualu bubi, kuenji kabidi.

Kadi ulombe luse bua bubi buebe buuvua muenze.

2Tshina bubi bu muudi utshina nyoka wa ntoka.

Bualu wewe musemene padiye, udi ukusuma.

Bualu bubi budi ne menu bu a nyama wa ntambue, adi ashipa bantu.

3Bualu bubi buonsu budi bu muela wa nkanza.

Kuenza bubi kudi kushiya mputa wa lubangu.

4Tshimvundu ne kukuatshisha bantu bowa bidi bifikisha bantu ku kabutu.

Bena ditambisha nebabutuke ne bubanji buabu pamue ne meku abu.

5Dilomba dia mupele didi difika kudi Mvidi Mukulu,

Mvidi Mukulu neamuambuluishe lukasa.

6Muntu udi ubenga mibelu, udi ulonda dikasa dia muenji wa bubi.

Kadi udi utshina Maweja-Nangila, udi udilengeja ku bubi buende.

7Muntu udi wakula bimpe badi bamunanga kudi bantu bonsu.

Kadi padiye utupakana, muntu wa meji udi umvua.

8Muntu udi wibaka nzubu ne lupetu lua bende,

udi ufuanangana ne muntu udi wangula mabue bua kudibakila lukita.

9Bantu badi babenga mikenji ya Mvidi Mukulu,

badi bonsu pamue bu bisosa bibi mu tshisumbu:

bidibu mua kuosha mu kapia.

10Njila wa benji ba bibi udi mulandakane, kena ne nsoka,

kadi ku ndekelu kuende kudi kandondu ka bafue.

Muntu wa meji ne muntu mutshimbakane

11Muntu udi ulama mikenji ya Mvidi Mukulu, udi uludika meji ende.

Muntu udi utshina Maweja-Nangila udi ne meji.

12Kabena mua kulongesha muntu,

udi ne meji ku tshintu nansha tshimue.

Kadi kudi meji makuabu

adi apetesha muntu kanyinganyinga kavule.

13Lungenyi lua muntu wa meji ludi bu musulu muwule mayi tente,

mibelu yende idi bu mpokolu wa mayi mimpe.

14Muoyi wa muntu mutshimbakane udi bu dibungu difue.

Muntu awu kena mua kulama bualu bua meji.

15Padi muntu wa meji, umvua diyi dia meji,

udi udiangata ne mushinga, wenduluka nadi.

Kadi padi muntu mutshimbakane udiumvua, kadiena dimulengelela,

udi udibenga.

16Diyuki dia muntu mutshimbakane didi ne bujitu,

bu mudi dibuki dia muena luendu.

Kadi miaku ya muntu wa lungenyi

misangu yonsu idi isankisha bantu.

17Padi bantu mu tshipangu,

badi bajinga mua kuteleja diyi dia muntu wa meji,

belangana meji ku bidiye wamba.

18Ku mesu a muntu mutshimbakane,

meji adi bu nzubu mupuke,

dimanya dia muntu udi kayi ne lungenyi

didi anu bu diyuki didi kadiyi dibota.

19Muntu mutshimbakane udi umona mubelu bu makopa mamuela ku makasa,

ne nkanu mimuela ku bianza.

20Muntu mutshimbakane udi useka, ukedidia.

Kadi muntu mudimuke udi usekela mu matama.

21Muntu mudimuke udi umona mubelu bu tshilenga tshia mpawungi,

bu tshikupa tshiela ku diboku.

22Muntu mupote udi ufuilakana bua kubuela mu nzubu,

kadi muntu wa meji udi ubuela ne bukalanga.

23Muntu mutshimbakane udi udingidila ku tshiibi,

bua kumona mu nzubu,

kadi muntu mukolesha bimpe udi windila pambelu.

24Muntu udi uteya ditshi mu tshiibi, mmukolesha bibi,

kadi muntu wa meji udi umvua bundu!

25Muena tshiakulakula, udi wambulula bidi bakuabu bamba,

kadi muntu wa meji udi upima meyi ende.

26Muntu mutshimbakane udi udianza kuakula, ushisha wela meji.

Kadi muntu wa meji udi udianza kuela meji, pashishe wakula.

27Padi muntu mubi utshipa muluishi wende,

udi uditshipa nkayende.

28Muntu udi ujana bantu udi udienzela bibi yeye nkayende.

Bena mutumba nende badi bamudiwula.