Sira 38 - MUKANDA WA MYIDI MUKULU（TSH96）

Muondapi ne mubeedi

1Unemeke munganga bua midimu idiye wenza,

bualu Maweja-Nangila ke udi mumufuke.

2Bukole bua kujikija disama budi bufuma kudi Muena Kulu,

munganga udi ubupeta bu dipa dia kudi mukalenga.

3Badi batumbisha munganga bua dimanya diende,

nansha bamfumu badi bamukatshila.

4Manga adi afumina mu bifukibua,

Maweja-Nangila ngudi mubifuke.

Muntu wa meji kena mua kubipetula.

5Numanye ne amu tshitupa tshia mutshi,

ke tshivua Moshe mutalaje natshi mayi,

bua kuleja bantu bukole bua Mvidi Mukulu.

6Maweja-Nangila wakapa bantu lungenyi lua kumanya bintu ebi bionsu,

bua bamutumbishile ku bia dikema bidiye wenza.

7-8Ku biobi ebi, ke kudi muntu udi ukuata mudimu wa manga

wangata bintu ubisambakaja,

pashishe munganga udi wondapa mabeedi.

Bidi Mvidi Mukulu mufuke kabiena ne ndekelu,

pa buloba bujima, bukole bua mubidi budi bufumina kudiye.

9Muananyi, paudi usama kutombokedi Maweja-Nangila,

kadi umutendelele, neakondape, neajikije disama diebe.

10Benga bilema biebe, enza malu makane,

udikobolole bubi budi mu muoyi webe.

11Paudi ne mushindu, ulambule Mvidi Mukulu milambu ya muenyi muimpe,

ya bukula, musenga wa kamonya ne mafuta.

12Pashishe uye kudi munganga, bualu amu Maweja-Nangila ke udi mumufuke.

Munganga kena ukushiya to, bualu wewe udi nende dijinga.

13Kudi misangu mikuabu idi bamunganga mua kujikija disama diebe.

14Bualu bobu kabidi badi batendelela Maweja-Nangila bua abambuluishe,

bua bamone mua kujikija disama diebe, upande.

15Padi muntu wenzela Mumufuki wende bibi,

ndi mmujingila bua asame.

Madilu(22.11-12)

16Muananyi, dila muntu mufue,

umudile ne kanyinganyinga, wimba misambu ya madilu,

ujike tshitalu tshiende mu lukita ludi lumuakanyine,

kulenguludi ku lukita luende to.

17Udile bikole, udituute pa tshiadi ne kanyinganyinga,

umuenzele madilu adi mamuakanyine.

Ashale dituku dimue nansha abidi bua kuepela bijanu.

Pashishe ulekele kunyingalala.

18Kanyinganyinga kadi mua kufikisha muntu ku lufu;

dibungama didi dikepesha dikanda dia mubidi.

19Padi muntu ne dikenga ne kanyinganyinga,

udi udiumvua bu muntu udi mumane kutshipa, udi ushala bu mupele.

20Kuanyishi bua muoyi webe wikale ne kanyinganyinga,

ukalekele, vuluka matuku ebe atshidi kumpala.

21Kupu bualu ebu muoyi: muntu mumane kufua kena upingana kabidi panu.

Kanyinganyinga kebe kakena ne tshidiku mua kuenzela muntu mumane kufua,

amu wewe nkayebe ke udiku mua kuenzela bibi.

22Vuluka ne: tshivua tshienzekela muntu awu netshikuenzekele kabidi,

makelela lufu luvua luende, lelu nduebe.

23Padi muntu mumane kufua, lekela kabidi kumuvuluka,

yeye mumane kuya, ukole amu muoyi.

Buenzayi bua bena midimu ya bianza

24Bua kuikala muena meji ne mulongeshi wa meji,

mbiakane kuikala ne diba dikumbane diudi mua kulonga.

Muntu udi kayi ne midimu mivule udi upeta meji.

25Kadi mudi tshidime mua kufika ku dipeta meji mbishi?

Udi ne disanka dia kusaka ngombe,

ne dia kuyitshingulula mu mitshi,

kukuata nayi mudimu, kabidi ne dia kuyukila pa tuana tua ngombe.

26Udi muteke muoyi wende amu ku diela mabula.

Udi utshisha butuku bua kupa tuana tua ngombe biakudia.

27Nenku ke mudi muibaki wa nzubu ne muena mudimu wa bianza,

udi wenza mudimu butuku ne munya,

udi uzola pa biamu, usonga bimfuanyi bishilangane,

muoyi wende udi ku bimfuanyi bia mishindu mivule bia kuenza.

Udi utshisha butuku amu bua kukumbaja mudimu wende onsu.

28Ke mudibi ne bua nsenda udi muzonzame ku ngindu,

udi ujooja tshiamu tshidiye ufula.

Luya lua kapia ludi lumutudisha luanga,

udi ukuata mudimu bikole, ukopakana ne luya lua mu ditanda.

Ngindu udi udila amu kudila ku matshi ende,

ne mesu kabidi mmatuile ku tshiamu tshidiye ufula,

muoyi wende udi ku tshiamu tshiende atshi,

ulala tshitabela bua kutshilengeja.

29Bidi bia momumue ne mufumbi wa ngesu,

padiye usopa dima ne tshiamu tshia kunyungulula ne dikasa,

meji ende onsu adi amu ku mudimu wende awu,

bua apete ngesu mimpe, bungi budiye ukengela.

30Udi ufumba dima ne bianza biende,

udi udibotesha ne makasa.

Udi wenza muende muonsu bua kulaba bintu biende tshilabu tshimpe.

Udi utshisha bua kukomba mu diku didiye oshila ngesu.

31Bantu bonsu aba badi bamanye mua kuenza bintu ne bianza biabu,

muntu yonsu udi ne lungenyi lua mudimu wende.

32Bena midimu ya bianza aba kabayiku, bantu kabena mua kuasa tshimenga,

kabena mua kusombamu, kabena nansha mua kuendakanamu.

Kadi, padi bantu basangila mu tshipangu tshia mu tshimenga,

kabena mua kuebeja bena mudimu wa bianza kalu.

33Bena mudimu wa bianza kabena mua kupeta mianzu mibandile, mu tshisangilu tshia bantu,

kabena mua kushala bandumbulula,

kabena bamanye meyi ne mikandu bia ditunga.

Kabena bamanye mua kulongesha nansha kubela bantu.

Kabena nansha balonge nsumuinu, mbalamate amu ku bia panu.

34Kadi midimu yabu idi ilengelela buloba,

badi balomba kudi Mvidi Mukulu amu bua bamone mua kuenza midimu yabu bimpe.

Tutue mulongeshi wa mikenji makumbu

Kadi bidi bishilangane ne muntu udi welangane meji a mikenji ya Mvidi Mukulu Muena Kulu.