Misambu 139 - MUKANDA WA MYIDI MUKULU（TSH96）

Maweja-Nangila udi mummanye

1Musambu wa mulombodi wa bena misambu. Mu mukanda wa misambu ya Davide.

Maweja-Nangila, udi mujingulule muoyi wanyi,

udi mummanye:

2Udi mumanye pandi nsomba nansha mbika,

majinga anyi udi muamanye kale.

3Udi umona pandi pambelu nansha pandi mu nzubu,

udi mumanye bionsu bindi ngenza.

4Tshiyi muanji kuamba diyi mukana muanyi,

wewe ukadi mumanye bionsu bindi musue kuamba.

5Udi kumpala ne kunyima kuanyi kabidi,

udi muntenteke tshianza tshiebe.

6Mushindu uudi mummanye udi unkemesha,

mmupite bionsu bindi mua kumvua.

7Nenkusokome muaba kaayi?

Muaba kaayi undi mua kukunyema?

8Nansha meme mubande mu diulu, udimu;

nansha mulale mu kandondu, udi anumu.

9Nansha meme muye kudi diba dipatukila,

nansha muye kusomba kudidi dibuelela,

10nansha kuinaku, tshianza tshiebe tshidi tshinkuata,

diboku diebe dia bukole kadiena dindekela.

11Meme muambe ne: “Miidima imbuikile,

butuku bungidile!”

12Miidima yandamuke butoke ku mesu ebe,

butuku nebukenke bu munya;

miidima nansha butoke bidi bia momumue ku mesu ebe.

13Wewe ngudi mumfuke

mumfumbe munda mua mamu.

14Maweja-Nangila, tuasakidila,

bualu udi muenzele mubidi wanyi,

malu a dikema.

Biudi muenze bidi bia dikema,

ndi mubimanye.

15Mubidi wanyi kauvua musokome ku mesu ebe,

pauvua umfuka mu musokoku,

umfumba munda mua mamu.

16Uvua mummone ntshidi mu lukutu;

mu mukanda webe, ukavua mufunde matuku onsu andi ndala panu,

dimue dia kudiwu kadiyi dianji kubanga.

17Mvidi Mukulu wanyi, mbikole bua meme kumanya meji ebe,

mmapite bungi!

18Mua kuabala mmunyi?

Adi mapite lusenga bungi.

Nansha meme muabale,

tshiena mfika ku dikujingulula.

19Mvidi Mukulu wanyi butula bantu babi,

ipata bashipianganyi ku mesu anyi.

20Badi bakutela bua kudinga,

badi batela dina diebe bua kushima.

21Maweja-Nangila, ndi mbenga bonsu badi bakubenga.

Ndi nkina bonsu badi bakukina.

22Ndi mbakina bikole,

mbaluishi banyi.

23Mvidi Mukulu wanyi, jingulula malu adi mu muoyi wanyi,

ummanye.

Untete,

umanye majinga anyi onsu.

24Manya ne tshiena mukukuile bamvidie ba dishima,

undombole mu njila webe matuku onsu.