Sira 43 - MUKANDA WA MYIDI MUKULU（TSH96）

Diulu ne diba

1Ndisanka kaayi patudi tumona bulenga bua tshibuashibuashi!

Ndumu kayipu ludi nalu diulu patudi tuditangila!

2Padi butuku butshia, diba didi dipatuka ne lumu,

dituleja mudi Muena Kulu muenze tshintu tshia dikema!

3Padi diba dibanda, difika munda munya, buloba budi buuma.

Udi mua kutuila nkenke ya diba nkanana udiku anyi?

4Badi basonsola kapia mu tshikutu bua kulundukaku.

Kadi diba didi diosha mikuna ndipite kapia ka mu tshikutu misangu isatu.

Diba didi dituma luya lukole, diela nsese itua mu mesu.

5Maweja-Nangila udi mufuke diba, udi munene!

Diba didi dilonda amu njila mudifundila kudiye!

Ngondu(Tun. 6-7: Tshib 1.14; 8.22; Mis 104.19)

6Ngondu udi ubala amu pa diba diende,

uleja bikondu, utapulula tshidimu mu ngondu ne mivu.

7Ngondu ke udi ushindika matuku a bibilu.

Dibulunge edi didi dienda dikepela padidi ditua ku tshibanda.

8Muenji onsu udi upeta dina diawu kudi ngondu wa kulu.

Bukenke buende budi buenda budiunda ku dituku ku dituku,

buleja tshiluilu tshia mulu njila wa kuyila,

butokesha tshibuashibuashi tshia mu diulu.

Mitotu(Yesh 40.26; Yob 25.2-3; Bar 3.34-35)

9Mabulunge adi mulu ke butumbi bua tshibuashibuashi.

Wowu ke adi adileja mulu mua Maweja-Nangila ne bukenke buawu.

10Adi enda malondangane bu mudi wa Tshijila muatumine diyi,

kaena apangila nansha alala mu njila.

Bia dikema bia pa buloba(Tun. 11-12: Tshib 9.12-17; Yez 1.28; Tun. 13-33: Yob 36.27—37.24; 38.22-38)

11Tangila muanza-nkongolu, ela udi muufuke tuasakidila.

Muanza nkongolu udi ubalakana bimpe.

12Udi muenze tshijengu tshia lumu mulu

bu buta budi Maweja-Nangila unana.

13Maweja-Nangila udi ulokesha mvula wa neje bu mudiye wamba,

udi utuma mikenya ya mvula bua kuenza tshidiye musue.

14Ke padi mabungu manene a mayi a mulu unzuluka,

ke mavuba kubuuka bu nyunyi.

15Mavuba adi akuatakana ku bukole bua Maweja-Nangila,

adi aloka mvula wa mabue.

17aMukungulu wa dikubakuba diende udi unyungisha buloba,

16padi mikuna imona bukole buadi idi izakala.

Tshipepela tshia kuinshi kua ditunga tshidi tshituuta,

17bmvula wa tshipupu wa ku mutu kua ditunga, ne mvunde mukole kabidi,

bidi bienzeka bu mudiye musue.

Maweja-Nangila udi ulokesha mvula wa neje,

bu mudi nyunyi ikila panshi,

neje udi umata panshi bu mudi mpasu imata.

18Butoke bua neje budi butua mu mesu,

padiye umata panshi, muoyi udi usanguluka munda.

19Maweja-Nangila udi witshikija tubue tua mayi pa buloba,

bu tusoka tua luepu, tudi tukuatakana ne mashika, tuenza

bu meba adi atua bantu.

20Padi tshipepela tshia mashika tshia ku mutu kua ditunga tshituuta,

mayi adi akuatakana, enza dibue dia mashika

pa mutu pawu ponsu, diabuikila bu kazaku ka tshiamu.

21Tshipepela tshidi tshiumisha mikuna, tshiosha tshipela,

tshishidisha bisuku bu mudi kapia.

22Kadi dibungi didi dipandisha ku kapia.

Lumuma ludi lulonda luya lukole ludi lutupingajila disanka.

23Maweja-Nangila kutekesha mayi manene malabale,

kutekamu bidila.

24Badi benda pa mayi badi batulondela njiwu idibu bamonapu,

patudi tumvua bidibu batulondela, tudi tukema.

25Mu mayi manene amu, mudi bintu bia dikema,

mudi nyama mivule ya mishindu ne mishindu,

nyama ya bidika minene idi ikuatshisha bowa.

26Muntu yonsu udi Maweja-Nangila utuma, udi ufika muaba udiye uya.

Bionsu bidi bienzeka mu diumvuangana bu mudiye wamba.

27Tudi mua kuamba malu a bungi,

katuyi mua kuajikija.

Kadi tudi mua kuamba mu tshikosu ne:

Bionsu bidi amu ku bumfumu bua Maweja-Nangila.

28Katuena bakumbane mua kumutumbisha to.

Bualu udi ku mutu kua bifukibua biende bionsu.

29Maweja-Nangila ngua kutshina. Mmunene kayi ne ndekelu,

bumfumu buende budi bukemesha.

30Tumbishayi Maweja-Nangila,

ne muenu muonsu, bualu udi mupite binudi mua kuamba.

Mutumbishayi ne bukole buenu buonsu, kanupungidi,

bualu kanuakufika ku ndekelu.

31Muntu ukadi mumumone bua kuamba mudiye, udiku anyi?

Muntu udi mua kumutumbisha bu muende mudiye anyi?

32Kudi bintu bivule bidiye muenze bitudi katuyi bamanye,

kudi bikuabu bitudi katuyi tumona,

bikale ne bunene bupite.

33Bualu Maweja-Nangila ngudi muenze bionsu,

kabidi uvua mupeshe bantu badi bamulamata meji.