Muambi Diumvuija - MUKANDA WA MYIDI MUKULU（TSH96）
Diumvuija— Biangatshile ku kanungu ka kumpala, mufundi wa mukanda ewu udi udileja Muambi. Kadi kena ufunda meji avua bena Izrayele ne tshibidilu tshia kulongeshangana, bu mudi bena meji benza mu mukanda wa nsumuinu. Muambi wetu mmumane kulala panu, mumonamona malu. Udi mujadike ne: diakalenga kaditu dinenga, bionsu bidi bantu benza bua kudipeta bidi amu bia tshianana. Ke mudiye udiebeja ne: tshitudi bavua kuenza panu ntshinyi? Kuikala ne muoyi nkulenga ku tshinyi? Udi musue bua mubadi wa mukanda wende adiele nkonku ya momumue nende. Bu muvua mukanda wa Yobe mubenge mandamuna matekete avua bantu ne tshibidilu tshia kuandamuna ku nkonku mikole ayi, Muambi udi wabenga. Kadi kena udiabakena bua makenga adi bantu badi kabayi bualu, bumvua panu, bu muvua Yobe wenza. Muambi wetu udi amu ukatshila, bualu bantu badi bakeba amu kukeba diakalenga, kabayi badipeta.Mukanda wa Muambi, udi didikonkonona dia malu adi apita panu. Udi wamba misangu ne misangu ne: masanka a muntu ne midimu idiye ukuata (bunsonga, bubanji, lumu, mudimu, meji, dinemekangana) kabiena bimupetesha tshintu, bidi amu bu kuipatshila lupepele bua kulukuata. Tudi mu njiwu ya lufu diba dionsu ne miaba yonsu. Bantu badi benzelangana bibi bikole bitambe. Katuena ne mushindu wa kumanya mudi Mvidi Mukulu musue kulongolola malu a bantu panu. Ke mudi muntu usomba panu amu ne bowa, malu ende kaayi mua kushindama, kayi nansha mua kumanya, kundi nya menemene nkuepi? Muambi, ku ndekelu udi utulongesha kabidi ne: bu mudi malu a panu nanku, ke binudi ne bua kuenza bua numone mua kusomba panu. Bushuwa, miaku mikuabuya mu mukanda wa Mvidi Mukulu idi itulongesha diandamuna dikuabu ku lukonku lua ne: tshitudi bavua kuenza panu ntshinyi? Kadi bidi bimpe bua tusangane mu mukanda wa Mvidi Mukulu meji etu ne milandu yetu bitudi nabi amue matuku atudi tutekesha mu maboku. Bidi bimpe kabidi bua Muambi atuvuluije ne: muntu udi witaba menemene Mvidi Mukulu, kena mua kuikala mpofu udi kayi musue kumona ntatu, makenga, butekete, kayi musue kumvua mpata ne nkonku, bidi bantu nabi panu.
